¿Kunjamatsa yatichktan ukanakan chuymapar purtʼsna?
1. Jesusan yatichäwinakap istʼasajj ¿kunjamsa jaqenakajj jikjjatasipjjerïna?
1 Jesusajja, jaqenakan chuymanakaparuw purtʼirïna. Diosan Arupat wali sum qhanañchasajja, mä kutejj arkirinakapan chuymanakapajj ‘nakkaspas’ ukham jikjjatasïna, mä arunjja, chuymanakaparuw purtʼäna (Luc. 24:32). Niyakejjay Diosar taqe chuyma istʼañajj sapa maynitächejja, ¿kunjamatsa yatichktan ukanakan chuymapar purtʼsna, ukhamat nayra jakäwinakap jaytapjjañapataki? (Rom. 6:17).
2. Amuyumpi, jan chuym ustʼayas yatichañajja, ¿kunjamsa jaqenakan chuymapar purtʼañatak yanaptʼistaspa?
2 Amuyumpi, jan chuym ustʼayas yatichañäni. Kunatï askïki uk lurañatak chʼamachasipjjañapatakejja, janiw kunatï walïki ukat jan walïkaraki ukanak parlañakejj wakiskiti. Kunarutï creyipki ukanakar Biblian jiskʼa tʼaqanakampi cheqañchañäni ukhajja, chuymap ustʼaysna ukat janiw istʼañ munjjaspati. Kunatï askïki uk lurañapatak yanaptʼañatakejja, nayraqatajj kunatsa ukar creyipjje, kunatsa ukanak lurapjje ukanakwa amuyañasa. Jiwasatï amuyumpi, jan chuym ustʼayas jisktʼañänejja, kunatï chuymapan utjki ukwa yatiyistani (Pro. 20:5). Ukhamatwa Biblian kawkïr jiskʼa tʼaqapas chuymapar purtʼaspa uk sum ajlltʼsna. Ukampis jupat llakisitaswa uñachtʼayañasa ukat paciencianïñasarakiwa (Pro. 25:15). Cheqas janiw taqenejj mä kikpaki ajay toqen nayrar sartapkiti, uk amtañasapuniwa. Ukampis Diosan qollan ajayupajj jaqenakar yanaptʼañapatakejja, pacienciampiw suytʼañasa (Mar. 4:26-29).
3. Yatichktan ukanakarojja, ¿kunjamsa kunatï askïki uk lurapjjañapatak yanaptʼsna?
3 Kunatï askïki uk lurañapataki yanaptʼañäni. Jehová Diosan khuyapayasiñapata ukhamarak munasiñapat Biblian parlki uka sarnaqäwinakajj yatichktan ukanakarojj kunatï askïki uk lurapjjañapatakiw yanaptʼaspa. Ukatakejja, Salmo 139:1-4 jan ukajj Lucas 12:6, 7 qellqatanakampiw Jehová Diosajj qawqsa sapa maynir munasistu uk uñachtʼayañasa. Jaqenakatï taqe ukanakat Diosar yuspärapjjani ukhajja, Diosarojj jukʼampiw munasipjjani ukat yupaychañsa munapjjarakiniwa (Rom. 5:6-8; 1 Juan 4:19). Janiw ukakïkiti, jan wali luratanakapajj Diosan chuymap ustʼayatap amuyapjjani ukhajja, Diosatakjam sarnaqañatakiw chʼamachasipjjani (Sal. 78:40, 41; Pro. 23:15).
4. Yatichktan ukhajja, ¿kunjamsa jupanak pachpa amuyasipjjañapataki yanaptʼsna?
4 Jehová Diosajj janiw khitirus munkir jan munkir mayitanakap phoqaykiti. Jan ukasti, ewjjanakaparjam sarnaqañajj kunja sumasa uk qhanañchasaw jaqenakan chuymapar purtʼi (Isa. 48:17, 18). Jiwasatï jupanak pachpa amuytʼasipjjañapatak yatichktan ukanakar yanaptʼañäni ukhajja, Jehová Diosat yateqasitaswa uñachtʼayañäni. Jaqenakajj kuntï lurapki ukajj jan walïtap jupanak pachpa amuyasipjje ukhajja, jan mayampitakiw ukanak jaytjjapjje (Rom. 12:2). Ukhamatwa Jehová Diosar jakʼachasipjjani, Jupasti ‘jaqenakan chuymanakap uñtʼiwa’ (Pro. 17:3, NM).