¿Kunjamsa mayninakar munasiñ uñachtʼaysna?

Niyakejjay taqenis Adán nayrïr chachat jutstanjja, mä familiakïtanwa. Cheqas mä familianjja maynit maynikam munasiña, respetasiñaw utjañapa, ukampis jichha tiemponjja janiw ukhamäjjeti. Diosajj maynit maynikam munasiñampi respetompi uñjassna ukwa muni.

¿KAMSIS SAGRADO QELLQATANAKAJJ MUNASIÑ TOQETJJA?

“Jaqe masimarusti juma kipkarjama munarakim” (LEVÍTICO 19:18).

“Enemigonakamar munasiñampi uñjasipkakim” (MATEO 5:44).

¿KUNJAMSA MAYNINAKAR MUNASITAS UÑACHTʼAYSNA?

1 Corintios 13:4-7 textonjja, munasir jaqejj kunjamasa ukwa Diosajj qhanañchistu.

“Munasir jaqejj paciencianiwa, khuyapayasiriwa”.

Ak amuytʼam. Maynitï paciencianïspa munasirïspa, pantjaskta ukhas jan jankʼak coleraskaspati ukhajja ¿kunjamakis jikjjatasisma?

“Munasir jaqejj janiw envidiasirïkiti”.

Ak amuytʼam. Maynitï jumar jan confiykiristam, envidiasirakiristam ukhajja, ¿kunjamakis jikjjatasisma?

Munasir jaqejj “janiw kunatï jupatak walïki ukak thaqkiti”.

Ak amuytʼam. Maynitï amuykta uk respetaspa janirak munañaparjamak kuns lurkaspa ukhajja, ¿kunjamakis jikjjatasisma?

Munasir jaqejj “janiw kuna jan wal luratas amjjäskiti”.

Ak amuytʼam. Diosajj arrepentisipki ukanakar perdonañatakejj jankʼakiwa. ‘Jupajj janiw pantjasitanakasat sapa kuti juchañchkistaniti, ni wiñayatakis coleratäkaniti’ (Salmo 103:9, TNM). Maynir chuym ustʼaytan ukhajja, jiwasar perdonañap wal muntanjja. Ukhamajj maynitï chuym ustʼayistani ukhajja, perdonañatakejj jankʼakïñasawa (Salmo 86:5).

Munasir jaqejj “kunatï jan cheqapäki ukatjja janiw kusiskiti”.

Ak amuytʼam. Mä jan walir purtʼasis tʼaqestan ukhajja, janiw mayninakan kusisipjjañap munktanti. Ukhamajja jan sum uñjkistu uka jaqetï tʼaqesini ukhajja, janiw tʼaqesitapat kusisiñasäkiti.

Diosan bendicionap katoqañ munstan ukhajja, janiw khitirus yaqhachañasäkiti, wawäpasa jilïr jaqëpasa, kuna markatäpasa kuna religionatäpasa taqeniruw munasiñasa. ¿Kunjams uk lursna? Yanaptʼatäñ munapki ukanakar yanaptʼasaw munasiñ uñachtʼaysna.