¿Kunjamsa oracionajj yanaptʼistaspa?

Pamelajj wali usutänwa, ukatwa doctoramp qollayasir saräna, ‘aguantañatakejj chʼama churita’ sasaw Diosar oracionan mayisirakïna. ¿Orasiñajj jupar yanaptʼänti?

Jupajj akham siwa: “Cancerat qollayaskayäta ukhajj sapa kutiw ajjsarayäta. Ukampis, Jehová Diosar orasiñaw jan llakisiñataki, jan sinti ajjsarañatak yanaptʼawayitu. Walsa ususkchitojja Diosar orasiñajj jan aynachtʼañatakiw yanaptʼitu. Jaqenakajj ‘kunjamasktasa’ sasin jisktʼapjjetu ukhajja, ‘usutakïsktwa ukampis kusisitakiw jikjjatasta’ sasaw jupanakar sista”.

Cheqas, janiw jan walin uñjasktan ukhakejj Diosar oracionan mayisiñasäkiti. Taqeniw kunayman jan waltʼäwinakan uñjastanjja, ukatwa aguantañatakejj yanaptʼa muntanjja. ¿Oracionajj yanaptʼistaspati?

Bibliajj akham siwa: “Diosar llakinakam katuyam, jupasti chʼaman tukuyätam, Diosar jaysirin aynachtʼañapjja, janipuniw jupajj munkaniti” sasa (Salmo 55:22). ¡Uka arunakajj wali chʼamañchtʼkiriwa! Ukhamajj, ¿kunjamsa orasiñajj yanaptʼistaspa? Kunjamtï Diosajj munki ukarjam oracionan mayisiñäni ukhajja, kunanakatï jan waltʼäwinakar saykatañatakejj munaski ukanak churistaniwa (“¿Kunjamsa oracionajj yanaptʼistaspa?” siski uka cheqa uñjjattʼäta).

¿Kunjamsa oracionajj yanaptʼistaspa?

Sumankaña

“Taqe llakinakamjja Diosaru oracionan yatiyapjjam [...]. Diosaw sumankañapjja churapjjätam, uka sumankañapasti kuntï jaqejj amuyki ukat sipansa jukʼampiwa. Uka sumankañaw chuymanakamsa amuyunakamsa Cristo Jesús taypejj jarkʼaqapjjätam” (Filipenses 4:6, 7). Kunanakatï llakisiykistu ukanak Diosar yatiyañäni ukhajja, jupajj jan sinti llakisiñataki, jan walinkkasas yatiñampi kuns lurañatakiw yanaptʼistani.

Diosan yatiñapa

“Jumanakat maynitejj yatiñanïñ munchejja, Diosar mayiskakpan, jupajj taqenirus taqe chuyma walja chuririwa, mayisirirus jan colerasisakiw churani” (Santiago 1:5). Jan walin uñjasktan ukhajja, awisajj janiw suma amtanakar purktanti. Ukampis Diosar yatiñap oracionan mayisiñäni ukhajja, Biblian qellqatäki uka wakiskir ewjjtʼanakwa jupajj amtayistaspa.

Diosamp chʼamañchtʼatäña chuymachtʼatäña

“Khititejj nayar chʼam churkitu ukan chʼamapampejja taqe kunatakiw nayajj chʼamanïta” (Filipenses 4:13). Jehová Diosajj taqe chʼamani Diosawa, ukhamajj jan waltʼäwinakar saykatañatakisa aguantañatakisa chʼam churistaspawa (Isaías 40:29). Jehová Diosajj ‘taqe kunan chuymachtʼasiri Diosawa’, jupaw “taqe llakinakasan chuymachistu” sasaw Bibliajj qhanañchi (2 Corintios 1:3, 4).

ORACIONAJJ YANAPTʼIRISTAMWA

Jehová Diosajj janiw jupar orasiñatak obligktamti, ukampis munasiñampiw orasiñamatak invitʼtamjja (Jeremías 29:11, 12). ¿Nayrajj Diosar oracionan mayisirïtati? Ukampis ‘Diosajj janiw uka oracionanakajar contestkituti’ ¿sasat amuyirïta? Jan llakisimti, janirak qarjtamti. Wawanakapar munasiri awk taykanakajja janiw kunjamtï wawanakapajj munapki, kuna ratutï munapki ukarjampun yanaptʼapkiti. ¿Kunatsa? Inas wawanakapar yanaptʼañatakejj jukʼamp suma amtanïpjjchi. Cheqansa, wali munasiri awk taykanakajj wawanakapar yanaptʼapjjapuniwa.

Wali munasiri Jehová Diosajj wal jumar yanaptʼañ munaraktamjja. Biblian kawkïr yatichäwinakaptï uñjawayktan ukanakat jumajj jukʼamp sum yatjjatäta, ukat ukarjam sarnaqañatak chʼamachasirakïta ukhajja, Diosajj wakisitarjamaw oracionam contestätamjja (Salmo 34:15; Mateo 7:7-11).