¿Kunsa Paraison jakañatakejj lurañasa?

Nayrïr yatichäwinakanjja, Diosajj niyaw jan walinak lurir jaqenakarusa kuna jan walinakatï aka oraqen utji ukanaksa chhaqtayjjani sasaw yateqaniwaytanjja. ¿Kunatsa ukajj phoqasiniwa sasin confiysna? Diosan Arupanjja akham sasaw sistu:

‘Akapachajj tukusiskiwa’ (1 JUAN 2:17).

Ukampis yaqhep jaqenakajj salvasipjjaniwa sasaw confiytanjja, uka textojj akham saskakiwa:

“Khititejj Diosan munañap lurki ukajja wiñayatakiw jakani”.

Ukhamasti Diosar istʼañäni ukhakiw salvasiñäni. Ukampis Diosar istʼañatakejja, nayraqatajj jupar uñtʼañasawa.

SALVASIÑATAKEJJ DIOSARUW UÑTʼAÑASA

Fotonaka: 1) Mä enfermeraw wali qarita llakita mä hospitalan pisopan qontʼatäski. 2) Samarki ukhajja, kunjamsa trabajir masipajj wali kusisita mä revista liyiski ukwa uñchʼukiski. 3) Trabajir masipajj Bibliat mä texto liytʼarapi, Internetan jw.org cheqar mantañapatakiw mä tarjeta churaraki.

Jesusajj akham sänwa: ‘Khitinakatï wiñay jakañ katoqapkani ukanakajja, juma sapa cheqpach Diosar uñtʼapjjañapaw wakisi’ (Juan 17:3). Akapachan tʼunjasiñapat salvasiñatakisa wiñay jakañatakisa, Diosar uñtʼañaw wakisi. Ukatakejja janiw Diosan utjatap creyiñakisa, jupat mä qhawqha yatiñakis wakiskiti. Jan ukasti Diosan amigopäñasawa. Kunapachatï maynin amigopäñ muntan ukhajja, jupar uñtʼañatakejj tiempow munasi. Diosan amigopäñatakejj ukhamarakiw tiempojj munasi. Bibliajj uka toqet kamsisa uk jichhajj uñjapjjañäni.

Bibliajj akhamwa yatichi

Diosajj qalltatpachwa mä paraison jakasiñas munäna.

Diosaw Adanampi Evampir luräna, jupanakaw nayrïr chacha warmïpjjäna. Jupanakarojj Edén sat mä suma jardinaruw uchäna. Adanampi Evampejj perfectöpjjänwa, kusisita jakasipjjañapatakejj taqe kunwa Diosajj churarakïna. Jupanakatï Diosan amigopäñatak chʼamachasipjjaspäna ukhajja, wiñayatakiw jakasipjjaspäna. Ukampis janiw ukhamäkänti, kuntï Diosajj maykäna ukar jan istʼasajj jupa contraw saytʼasipjjäna.

Kunatsa problemanakasa tʼaqesiñas utji.

Diosar jan istʼasajja, Adán chachajj wiñay jakañwa aptʼawayi, ukatwa wawanakapajj wiñay jakasiñ jan puedktanti. Bibliajj akham siwa: “Mä sapa jaqen juchapatwa juchajj akapachar mantani, jiwañajj uka juchan utjatapatwa mantaniraki, ukhamatwa jiwañajj taqe jaqenakar katunti” (Romanos 5:12). Kunjamtï mä jaqejj awk taykapat mä usu katoqkaspajja, Adán chachan wawanakapajj ukhamarakiw jucharar nastanjja. Ukatwa taqenejj awkipttansa jiwaraktansa.

Diosajj juchatwa jaqenakar salvawayistu.

Bibliajj akham siwa: “Diosajj akapachar wal munatap laykuw mä sapa Yoqap churäna, ukhamat taqe khitinakatï jupar confiyapjjatap uñachtʼayapki ukanakajj jan jiwapjjañapataki, jan ukasti wiñay jakañ katoqapjjañapataki” (Juan 3:16). Ukhamasti Diosajj Jesusaruw aka oraqer khitanïna, ukhamat jaqenak layku vidap sacrificiot loqtasiñapataki. Uka toqet wal lupʼisajja, India markan jakiri, 86 marani Prabhakar sat chachajj akham siwa: “Jehováa Diosajj nayar wal munasitapwa ukajj uñachtʼayitu. Ukaw wiñay jakasiñ suytʼañatak wal yanaptʼitu” sasa.

Kuntï Diosajj jaqenak layku lurawayki ukar yuspäratas uñachtʼaysnawa.

“Jiwasatejj mandamientonakap phoqaskakiñäni ukhajja”, Diosar yuspärataswa uñachtʼayañäni sasaw Bibliajj qhanañchi (1 Juan 2:3). Jehová Diosajj wali munasiñampiw kunjamsa jichha tiempon kusisit jakassna uk yatichistu (Isaías 48:17, 18, nota). Jupajj janiw tʼaqesiñas munkiti, ukatwa ‘nayar istʼasajj kusisitaw jakasïta, jutïrinsa wiñayatakiw jakasïta’ sasin sistu.

SAPÜRU BIBLIA LIYIPJJAÑÄNI

Mä enfermeraw Biblia liytʼasajj alajjpach uñtaski. — Akapachan tʼunjasiñapat salvasiñatakejj Diosaruw yanaptʼa mayisiñasa, kunatï jupar kusisiyki ukwa lurañasaraki.

Jakaskakiñatakejja, sapüruw manqʼasiñasa. Ukampis Jesusajj akham sänwa: “Jaqejj janiw tʼantʼa sapampikejj jakañapäkiti, jan ukasti Jehová Diosan lakapat mistki taqe uka arunakampi jakañapawa” (Mateo 4:4).

Jichhürunakanjja Jehová Diosan arunakap Biblianwa jikjjatsna. Uka sagrado libro yatjjatasajja, kunsa Diosajj nayra tiempon luräna, kunsa jichhajj luraski, kunsa jutïrin lurarakini ukanakwa yateqañäni.

DIOSAR YANAPTʼA MAYISIPJJAÑÄNI

Kunanakatï jan walïki ukanak jan lurjjañatakisa ukhamarak Diosar istʼañatakisa, ¿kunsa lursna? Ukatakejja Diosar uñtʼañaw yanaptʼistaspa.

Sakura sat warmimpejj kunas pasäna uk uñjapjjañäni. Jupajj qʼañu juchanwa sarnaqäna, ukampis Bibliat yateqañ qalltäna ukhajja, Diosajj ‘¡qʼañu juchat jitheqtapjjam!’ sasin satapwa yateqäna (1 Corintios 6:18). Sakura warmejj Diosaruw uk jaytañatak chʼam mayisïna, Diosasti yanaptʼarakïnwa. Ukampisa uka jan walir mayampi jan purtʼasiñatakejj chʼamachasiskakiñapawa. Jupajj akham siwa: “Awisajj jan wali amuyunakaw jutitu, ukampis Jehová Diosaruw yanaptʼa mayista. Jupakiw uka jan walinak armañatak yanaptʼitaspa. Oración lurañajja, Jehová Diosar jukʼamp jakʼachasiñatakiw yanaptʼitu” sasa. Sakura warmjamarakiw walja millón jaqenakajj Diosar uñtʼasipki. Diosasti cambiapjjañapatakiw jupanakarojj chʼam churaskaraki, ukhamat kunjamtï jupajj munki ukham jakapjjañapataki (Filipenses 4:13).

Diosar jukʼamp uñtʼañäni ukhajja, jupajj jiwasanakar jakʼachasirakistaniwa, ukhamatwa jupampejj wali suma amigöñäni (Gálatas 4:9; Salmo 25:14). Diosar uñtʼasajj akapachan tukusiñapat salvasiñäniwa, arski uka Paraisonwa jakasirakiñäni. ¿Kunjamas Paraison jakasiñäni? Akjjar jutki uka yatichäwinwa ukajj qhanañchasini.

a Diosan sutipajj Jehová satawa sasaw Bibliajj yatichi.