Diosajj wal cuidañ muntamjja
BIBLIAN wali suma ewjjtʼanakaw utji, kunattejj uka ewjjtʼanakajj Diosatwa juti. Bibliajj janiw qollanak toqet parlir librökiti, ukampis ewjjtʼanakapajja jan walinakan uñjasktan ukar saykatañataki, aynachtʼayir amuyunak apanukuñataki, jan chuym usuyasiñataki, jañchi toqet usutäñar saykatañataki, ukat llaki usur saykatañatakiw yanaptʼistu.
Janiw ukakïkiti, Bibliajja akwa yaticharakistu: taqe kun Luriri Jehováa Diosasajj kunjamas jikjjatastan, kunanakas llakisiyistu taqe ukanak sumwa amuyistu. Jan walinakan uñjasktan ukhajj janiw jaytanukuñ munkistuti, wal yanaptʼañ munarakistu. Biblian pä textonakapajj akjjar uñstki ukanakat amuytʼam. Ukanakajj wal chʼamañchtʼätam.
“Jehová Diosajj khitinakatï chuyma pʼakintatäpki ukanakan jakʼapankiwa, jupaw sinti desanimatäpki ukanakarojj salvaraki” (SALMO 34:18).
“Naya Jehová Diosamaw kupi amparam katjjasiskta, nayaw jumarojj akham sissma: ‘Jan ajjsaramti. Nayaw yanaptʼaskäma’” (ISAÍAS 41:13).
Ukhamajja ¿kunjamsa Jehová Diosajj llaki usuru ukat ukar uñtasit yaqha usunakar saykatañatak yanaptʼistu? Diosajj jiwasar cheqapun yanaptʼañ munatap kunayman toqenakatwa uñachtʼayistu, ukwa akjjar jutki uka yatichäwinakan amuyäta.
a Diosan sutipajj Jehová satawa (Salmo 83:18).