Jukʼamp jaqenakaw llaki usunëjjapjje
“Llakitäñatak janis razonajj utjkchejja, llakitakïsktwa”.
“Kusisitäkta ukhajja, uka pasatat wali llakitaw jikjjatasëjja sasaw llakisjjta”.
“Qharürut jan llakisiñatakejj sapüruw chʼamachasta, ukampis awisajja phajjspachatsa llakinakajajj juntthaptkaspa ukhamawa”.
Llaki usunïpki ukanakaw uka arunak sapjje. ¿Jumajj jupanakjamat jikjjatasta, jan ukajj khitin ukham jikjjatasitapcha yatta?
Ukhamächi ukhajja, janiw juma sapak ukhaman jikjjatasktati. Oraqpachanjja, walja jaqenakaw llaki usunïpjje, jan ukajj familiaranakapat maynin ukham usutätap laykuw tʼaqesipjje.
‘Chʼama tukuña jan wali tiemponakanwa’ jakasktanjja, ukajj qhanaw amuyasi, ukatwa kunaymaninakajj llakisiyistu, tʼaqesiyarakistu (2 Timoteo 3:1). Organización Mundial de la Salud (OMS) ukarjamajja, sapa kimsaqallqo jaqenakat mayniw llaki usuni. COVID-19 pandemia utjipanjja, 2020 maran jukʼamp jaqenakaw llakita uñjasiwayapjje (26%), llaki usuninakasti, jukʼampiw uka maran jiljjattawayaraki (28%).
Llaki usuninakajj qhawqsa jiljjattawayi uk yatiñat sipansa, jumasa munat familiaranakamas sum jikjjatasiñatakejj kunsa lurapjjasma uk yatiñaw jukʼamp importantejja.
¿Jan llaki usuni jaqejj kunjamasa?
Maynejj jan llaki usunïki ukhajja, sumakiw jikjjatasi, lurañanakapsa facilakwa luraraki. Jakäwin jan walinakajj utjki ukanakarus facilakwa saykati, jukʼamp sumwa trabaji, kusisitakiw jakasiraki.
¿Llaki usuni jaqejj kunjamasa?
Uka usuni jaqejj janiw débil jaqëkiti, ukham usutätapajj janirakiw jupan juchapäkiti.
Uka usuni jaqejj wal llakisi, janiw sums piensañ puedkiti, kusisitäkasin aleqatakwa llaktʼasjjaraki.
Llaki usuni jaqetakejja, mayninakamp sum apasiñajj chʼamakiwa, lurañanakap phoqañas janiw faciläkiti.
Taqeniw uka usump usuntsna, sañäni, kunayman edadaninakaru, kunayman markankirinakaru, kunayman religionankirinakaruw uka usojj jan waltʼayaspa. Pisin jakasirinakarusa, qollqeninakarusa, jukʼa yatjjatatanakarusa, wali yatjjatatanakarus jan waltʼayarakispawa.
Yanaptʼa thaqañamawa
Yaqhepanakajj mä akatjamatwa cambiapjje, janiw sum manqʼjjapjjeti ni sumsa ikjjapjjeti. Jan ukajj jaya tiempow llakita jikjjatasipjje. Jumarusa jan ukajj mä familiaramarus ukajj pasaskchi ukhajja, uka usu toqet yatjjatatanakaw yanaptʼapjjeristam, ukhamatwa kun lurañas wakisispa uk yatipjjasma. Ukhamajj ¿kawkinsa yanaptʼa jikjjatasma?
Taqet sipan wali yatiñani Jesusajj akham sänwa: “Jan usuta jaqenakatakejj janiw doctorajj munaskiti, usutäpki ukanakatakikiw munasi” sasa (Mateo 9:12). Uka usut yatjjatatäpki ukanakan yanaptʼapampejja, jukʼat jukʼat sumakiw jikjjatasjjäta, ukat kusisitaw jakasjjarakïta. Usutätam qhan amuyasjjsta, jaya tiemporak ukham jikjjatasjjsta ukhajja, jankʼakiw yanaptʼa thaqañama.a
Bibliajj janiw qollanak toqet parlir librökiti, ukampis ewjjtʼanakapajj jan llaki usunïñatakiw yanaptʼistaspa. Akjjar jutki uka yatichäwinakanjja, llaki usur saykatañatakejj kunjamsa Bibliajj yanaptʼistaspa uka toqenakatwa qhanañchaskani. Ukanak liytʼapjjañamatakiw invittʼapjjsma.
a Yatiyañataki sat aka revistajj janiw kunjamsa qollasiñama uk siskiti. Janïr mä amtar purkasajja, sapa mayniw kunjamsa qollayasini uk sum amuykiptʼañapa.