Jan jiwasatakik kuns muniri jachʼa jachʼa tukupjjañäniti
JUMAJJ amuypachätawa, akapachan waljaniw mayninakamp suma uñjatäñsa, jan ukajj derechonaksa privilegionaks katoqañ munapjje. Qhawqsay katoqapkchinejja, jukʼampwa munapjje. Jupatakik kuns muniri jan yuspärasiri jaqenakajj qhepa urunakan utjapuniniwa sasaw Bibliajj qhanañchi (2 Tim. 3:2).
Maynitakik kuns munañajj nayratpachaw utjäna. Adanampi Evampejj kunatï walïki kunatï jan walïkaraki uk amtañatakejj derechonïpkaspasa ukhamwa amuyapjjäna, ukatwa taqenis kunayman jan walinakan uñjastanjja. Walja maranak qhepatjja, Judá oraqenkir Uzías reyejj jupas templon incienso loqtañapäkaspa ukhamwa amuyäna, ukajj sinti jan walipunïnwa, jupajj janiw uk lurañatakejj autoridadanïkänti (2 Crón. 26:18, 19). Fariseonakampi saduceonakampejj Abrahanat jutatäpjjatap laykojj suma uñjatäpjjañapas wakiskaspa ukhamwa amuyasipjjäna (Mat. 3:9).
Niyakejjay jupatakik kuns muniri jaqenak taypin jakstanjja, jupanakjamaw amuyjjaraksna (Gál. 5:26). Mä privilegio katoqañasa jan ukajj suma uñjatäñas jiwasarus waktʼkistaspa ukhamwa amuyjjsna. Jan ukham amuyañatakejj ¿kunsa lursna? Nayraqatajj kunsa Jehová Diosajj uka toqet amuyi ukwa yatiñasa. Biblian pä wiñay yatichäwinakap jichhajj uñjañäni.
Kun katoqañas waktʼistu uk Jehová Diosaw amti. Uka toqet mä qhawqhanak uñjañäni.
Familianjja, chachajj esposapan respetatäspa, warmejj esposopan munatäspa ukwa Jehová Diosajj muni (Efes. 5:33). Maynejj chachapasa jan ukajj warmipas juparuk munasispa ukwa muni (1 Cor. 7:3). Awk taykanakajja, wawanakapamp istʼatäñatakejj derechonïpjjewa, wawanakasti tatap mamapamp cuidatäñatakisa, wali munasiñamp uñjatäñatakis derechonïpjjarakiwa (2 Cor. 12:14; Efes. 6:2).
Congregacionanjja, ancianonakajj wal trabajipjjatapat respetatäpjjañapawa (1 Tes. 5:12). Ukampis kunsa jilat kullakanakajj lurasipki uk controlañatakejj janiw derechonïpkiti (1 Ped. 5:2, 3).
Gobiernonakarojj impuestonak pagañ mayipjjañapatakisa respetomp uñjatäñ mayipjjañapatakis Diosaw autoridad churawayi (Rom. 13:1, 6, 7).
Jehová Diosajj wali munasiriwa, wakiski ukat sipans jukʼamp churistu. Juchararanakjamajj jiwañaw waktʼistu (Rom. 6:23). Ukampis munasiñat jan jaytjasirïtapatjja, Jehová Diosajj walja sumanakwa churistu (Sal. 103:10, 11). Jupat katoqktan uka bendicionanaksa jukʼampinaksa, wali khuyapayasirïtapatwa churistu (Rom. 12:6-8; Efes. 2:8).
¿KUNAS JACHʼA JACHʼA JAN TUKUÑATAKISA JIWASATAKIK KUNS JAN MUNAÑATAKIS YANAPTʼISTASPA?
Janiw akapachankir jaqenakjam amuyañasäkiti. Jan amuyasisakiw jiwasakis jukʼamp katoqañasäkaspa ukham amuyjjsna. Ukham amuyañarojj facilakwa purtʼassna, ukwa Jesusajj uvas yapuni mä jaqet parlasajj uñachtʼayäna. Jupajj uru jurnäl trabajipjjañapatakiw chachanak contratäna, mä denario qollq pagañaparakïna. Ukjjarojj jukʼamp jaqenakaruw contratäna, jupanakajj jukʼa tiempokiw trabajipjjäna, yaqhepajj mä horakiw trabajipjjarakïna. Arumthapirusti taqeniruw mä denario pagäna. Ukampis alwatpach lupins lupjat trabajipkäna ukanakajja, walja pago katoqañwa suyapjjäna (Mat. 20:1-16). Jesusajj uka toqet parlasinjja, kuntï Diosajj jupanakar churañ munki ukamp kusisitäpjjañapatakiw discipulonakapar yatichaskäna.
Jurnäl trabajir chachanakajj walja qollqe katoqañwa suyapjjäna.
Yuspärasirïña, jan jukʼamp mayiña (1 Tes. 5:18). Apóstol Pablot yateqasipjjañäni, derechonïkchïnsa janiw Corintonkir cristianonakarojj yänakamp yanaptʼatäñ maykänti (1 Cor. 9:11-14). Jukʼampinak mayiñat sipansa, katoqktan ukanakat yuspärañasawa.
Apóstol Pablojj janiw khitirus qollqe maykänti.
Humildëña. Wali importantëkaspas ukham amuyasirejja, kunatï jupan utjki ukat sipans jukʼamp katoqañapäkaspas ukhamwa amuyi. Ukampis ukham amuyañajj venenor uñtasitawa, humildëñajj qollar uñtasitarakiwa.
Jehová Diosajj humildëtapatwa Daniel profetarojj wali valoranit uñjäna.
Daniel profetajj humildëñat wali yateqaskañawa. Jupajj mä suma familiat jutirïnwa, suma uñnaqtʼanïnwa, chʼikhi amuyuni, mä kuns sum lurtʼiri ukhamänwa. Ukhamajj privilegionak katoqañasa, sum uñjatäñas wakiskaspa ukhamwa amuyaspäna (Dan. 1:3, 4, 19, 20). Ukampis jupajj humildënwa, ukatwa Jehová Diosajj wali valoranit jupar uñjäna (Dan. 2:30; 10:11, 12).
Janipun akapachankir jaqenakjamajj jachʼa jachʼa tukuri jiwasatakik kuns muniri ukhamäpjjañäniti. Antisas wali khuyapayasiñapat Jehová Diosajj churkistu uka bendicionapampejj kusisitäpjjañäni.