Bombanakampi guerra utjayaña | ¿Bibliajj uka toqet kamsisa?

Potencia mundialanakan bombanakapajj wali imkatatawa, ukanaksa jukʼampiw jiljjattayasipkaki, ukatwa jaqenakajj oraqpachan mä jachʼa guerran utjañapat llakisipjje. Niyakejjay jukʼamp bombanakajj utjchejja, mä akatjamatwa mä jachʼa guerrajj utjarakispa, uk yatisaw jaqenakajj wal llakisipjjaraki. Mä markatï mä jiskʼa bomba phallayaspa ukhajja, aka oraqe tukjañkam guerraw qalltaspa, uk yatisaw waljanejj ajjsaras jakapjje. Mä qellqatarjamajja, “sapüruw bombampi guerra utjañapätapat jukʼamp parlapjje” sasa (Bulletin of the Atomic Scientists).

¿Oraqpachankir mä jachʼa guerrajj cheqapunit utjaspa? ¿Aka oraqejj tukjatäpachäniti? ¿Bombanakampi guerran utjañapatï llakisiychistu ukhajj kunsa lursna? ¿Bibliajj uka toqet kamsisa?

Aka yatichäwinjja, aka jisktʼanakaruw qhanañchaskañäni:

¿Oraqpachankir mä jachʼa guerran utjañapat Bibliajj parljjänti?

Bombanakampi, armamentonakampi guerranakat janiw Bibliajj parlkiti, ukampis jaqenakajj kunjamäpjjanisa, kunsa lurapjjani, kuna jan walinakas oraqen mä jachʼa guerra utjañapatakejj apani ukwa Bibliajj qhanañchäna.

Kunanakatï aka oraqen pasaski ukasa kuntï Bibliajj siskäna ukasa, kunansa niya kikpakïpjje uk igualtʼayam:

Texto: Jesusan discipulonakapajj akham sasaw jupar jisktʼapjjäna: ‘Sapjjetaya, ¿jumajj kuttʼankäta uka tiemposa akapachajj niya tukusiñampïskani ukhasa kuna señalas utjani’ sasa. Jesusasti akham sänwa: “Mä jachʼa markajj yaqha jachʼa marka contraw nuwasini, mä gobiernosti yaqha gobierno contrarakiw nuwasini” sasa (Mateo 24:3, 7).

Kunanakas akapachan pasaski: Walja markanakaw nuwasisipki, ukanakat yaqhepajj kawkïr markanakantï bombanaksa armamentonaksa lurapki ukanakawa.

“Aka qhepa maranakanjja, walja markanakaw jukʼamp chʼajjwasipki, jukʼamp guerranakaw utjaraki” (Proyecto de Datos de Localización y Eventos de Conflictos Armados).

Texto: “Tukuy tiemponsti rey del sur ukajj mä jan waltʼäwinwa jupampejj [rey del nortempejj] uñjasini” (Daniel 11:40).

Kunanakas akapachan pasaski: Kunjamtï Bibliajj siskänjja, jupanakkam uñisir markanakampi jupanakar yanaptʼir markanakampiw nuwasisipki, jan ukajj khitis jukʼamp chʼamanïpjje uk uñachtʼayañwa munapjje. Bombanak lurir markanakajj inas jupanakkam jan nuwasipkchiti, ukampis jukʼamp bombanakwa lurasipki.

“Aka qhepa tunka maranakanjja, markanakkam nuwasirejj jukʼampiw uñjasiwayi. Chʼamani markanakas ukhamarakiw nuwasir markanakar yanaptʼapjje” (Programa de Datos sobre Conflictos de la Universidad de Uppsala).

Texto: “Qhepa urunakanjja chʼama tukuña jan wali tiemponakaw utjani”. Jaqenakajj “jan kuna acuerdorus mantañ munirinaka, kʼarintirinaka, munañapampi apnaqayasirinaka, qhorunaka” ukhamäpjjaniwa (2 Timoteo 3:1-3).

Kunanakas akapachan pasaski: Jichhürunakanjja, walja jaqenakajj janiw mä acuerdor purirjamäpkiti, marka apnaqerinakas ukhamäpjjarakiwa. Jan walinak sumankañamp askichañat sipansa, jupanakkam jan waltʼayasisa jan ukajj chʼajjwasakiw askichañ munapjje. Taqe ukanakajja, mä jachʼa guerra utjañapatakiw chʼamañchi.

“Janitï jiwaskam yanaptʼasiñajj utjkanejja, jan waltʼayir guerranakajj jukʼampiw utjani” (Samir Saran ukhamarak Jane Harman, Foro Económico Mundial).

¿Diosajj mä jachʼa guerra utjañap ukhamakti uñjaspa?

Bibliajj janiw uk siskiti, ukampis aka tiempot parlkasin “wali ajjsarkañanakaw uñjasini” sasaw säna (Lucas 21:11). Ukanakat mayajja, Segunda Guerra Mundialan bombas atómicas phallayaskäna ukawa. Kunatsa Diosajj guerranak jan chhaqtaykpacha ukwa Bibliajj sum qhanañchi. Uka toqet jukʼamp yatiñatakejja, ¿Kunatsa Diosajj tʼaqesiñanak jan chhaqtaykpacha? sat video uñtäta.

¿Aka oraqejj janit tukjatäkani?

Janiw tukjatäkaniti. Mayampis bombanakajj phallayaskchinejja, oraqen tukjatäñap janipuniw Diosajj munkaniti. Oraqejj janipuniw tukjatäkaniti, jaqenakajj wiñayatakiw ukan jakapjjani sasaw Bibliajj qhanañchi.

“Oraqejj wiñayatak utjaskakiniwa” (Eclesiastés 1:4).

‘Cheqpach Diosäki, oraq lurki ukajja, janiw aleq ukhamakïñapatak oraq lurkiti, jan ukajj jaqenïñapatakiw luri’ (Isaías 45:18).

Jan kunas utjkani ukhamarak oraqejj radiacionampi qʼala tukjat uñjaskani ukhajj mä qhawqha jaqenakakiw salvasiñatakejj chʼamachasipjjani sasaw waljanejj amuyapjje. Ukampisa, guerranakajj aka oraqe jan waltʼayki ukanakajj sumaruw tukuni sasaw Bibliajj qhanañchi.

“Wasarasa waña oraqesa kusisiñamp phoqtʼatäpjjaniwa, pampa wasarasa kusisiniwa, azafrán panqarjamaw panqararakini” (Isaías 35:1).

Mä paraisonwa jaqenakajj mayachtʼata kusisita trabajisipki. — Mä paraison kusisit jakasiñaswa Diosajj muni.

Taqe kun Luriri Diosajja, aka oraqejj jupapachpa askichasiñapatakiw lurawayi. Ukatsti, Diosajj chʼamapampiw aka oraqe sumar tukuyani, jaqenakajj ukanwa wiñayatak suman jakasipjjarakini (Salmo 37:11, 29; Apocalipsis 21:5).

¿Oraqpachankir mä jachʼa guerran utjañapar jan ajjsarañatakejj kunas yanaptʼistaspa?

Walja jaqenakajja, “bombanakampi armamentonakampi mä guerraru ukhamarak kuna jan waltʼäwinakas uka qhepat utjani” ukaruw wal ajjsarapjje. Ukar jan ajjsarañatakisa, jan sinti llakisiñatakisa, ¿kunjamsa Biblian utjki uka promesanakasa, ewjjtʼanakapas yanaptʼistaspa?

Aka oraqejj wali sumäjjaniwa, jaqenakas suman jakasipjjani sasaw Bibliajj qhanañchi. Uk yatiñajja, “kunjamtï mä anclajj barcor katjjäskejja, ukhamarakiw jakäwisar katjjasi”, jan sint llakisiñatakiw yanaptʼarakistaspa (Hebreos 6:19). Maysa toqetjja, kunatï sapa urojj paski ukatakwa llakisiñasa, janiw kunatï jutïrin paskani ukat sint llakisiñasäkiti. Jesusajj akham sänwa: “Sapüruw jan walinakajj utji” sasa (Mateo 6:34).

Jan sinti llakisiñatakisa, sumak jikjjatasiñasatakisa taqeniw chʼamachasiñasa. Ukatakejja, kunatï ajjsaraykistaspa uk jan istʼañatakiw chʼamachasiñasa, bombanakampi armamentonakampi guerra utjañapat jichhak mistir yatiyäwinakat parlapki uksa janiw istʼañasäkiti. Ukajja, kunatï pasaski uk janis uñjañ munksna ukham janiw sañ munkiti, jan ukasti kunatï jan paskaspa jan ukajj jan askichañ puedksna ukanakat jan sint llakisiña sañwa muni.

“Llakisiñajj jaqen chuymaparojj aynachtʼayiwa, ukampis mä suma arojja chʼamañchtʼiwa” (Proverbios 12:25).

Jan wali yatiyäwinak jan istʼañatak chʼamachasim. Antisas kuna sumanakatï jakäwiman utjki ukanakat amuytʼam.

“Suytʼañasatak yanaptʼkistu uka Diosay chuymanakamarojj phoqatpach kusisiñampi sumankañampi phoqantpan” (Romanos 15:13).

Fotonakanjja, mä chacharuw uñjasi, jupajj taqe chuymaw kunatï jutïrin paskani uk suytʼaski. 1. Jupa qhepäjjan guerraw utji, militaranakan mä avionapa, bombanaka ukat yaqha ukhamanakaw uñjasi. 2. Jupa nayraqatanjja, mä suma oraqew uñjasi. Ukanjja jamachʼinaka, qollunaka, vallenaka ukhamarak jawiraw uñjasi. — Jutïritak Diosajj mä suytʼäwi churkistu ukarojj taqe chuymaw confiysna.

Diosan promesanakapat jukʼamp yatiñajja, suytʼañataki, kusisitäñataki ukhamarak chuymasan sumankañ jikjjatañatakiw yanaptʼistaspa.

¿Armagedonajj bombanakampi, armamentonakampi mä jachʼa guerräniwa sasat Bibliajj sispachäna?

Yaqhepanakajja, Armagedonajj oraqpachan bombanakampi armamentonakampi mä jachʼa guerräniwa sasaw amuyapjje. Cheqas ukhamäspa ukhajja, sinti jan walinakwa aka oraqen utjayaspa.

Ukampis Biblian Armagedón siski uka arojja, ‘oraqpachankir reyinakata’, mä arunjja gobiernonakampi Diosampi chʼajjwapkani ukatwa parlaskia (Apocalipsis 16:14, 16). Janiw bombanakampi armamentonakampi jan waltʼayir guerrat parlkiti. Armagedonanjja, Diosajj janiw mä igualatak taqenir tukjkaniti, jan ukasti jan wali jaqenakarukiw tukjani. Ukhamatwa sumankañasa, kusisit jakasiñas utjani (Salmo 37:9, 10; Isaías 32:17, 18; Mateo 6:10).

¿Guerranakan tukusiñapat Bibliajj kamsisa?

“Jupaw oraqpachanjja guerranak chhaqtayaski. Jupaw flechtʼañ arcsa pʼakjaski, jiskʼa jiskʼwa lanzarojj tʼunjaski, juparakiw militaranakan carretanakapsa ninamp phichanti” (Salmo 46:9).

Jehováb Diosaw markanakjjar chʼamanïtap uñachtʼayani, uksti markanakkam chʼajjwapki uk chhaqtayasa ukhamarak guerratak armanakap tukjasaw uñachtʼayani. Cheqasa, alajjpachat aka oraqer apnaqankani uka Reinop toqew lurani (Daniel 2:44).

Diosan Reinopaw jaqenakarojj sumana ukhamarak mayachtʼata jakañ yatichani. Aka oraqpachanjja mä gobiernokiw utjani, uk utjatapatjja janiw markanakkam jan waltʼayasiñajj utjkaniti. ¡Jaqenakajj janiw guerran nuwasiñatak yateqjjapjjaniti! (Miqueas 4:1-3). ¿Uka qhepat kunjamsa jakasjjañäni? “Sapa mayniw uvas alipan chʼiwipar qontʼasipjjani ukhamarak higos qoqapan chʼiwipar qontʼasipjjani, jupanakarojj janiw khitis ajjsaraykaniti” (Miqueas 4:4).

a “¿Qué es el Armagedón?” sat yatichäwi liytʼam.

b Diosan sutipajj Jehová satawa (Salmo 83:18). “¿Quién es Jehová?” sat yatichäwi liytʼarakim.

¿Apocalipsis librojj bombanakampi, armamentonakampi mä jachʼa guerratti parli?

Apocalipsis libronjja, Armagedonajj bombanakampi armamentonakampis taqe kunan tukjatäñapatsa parlkaspa ukhamwa yaqhep jaqenakajj amuyapjje (Apocalipsis 6:14; 8:7-12; 16:1-21). Amuytʼañataki, ‘alajjpachat oraqerojj ninaw saraqanini’ sasaw sapjje (Apocalipsis 13:11-13). Ukampis Jehová Diosan Testigonakapajja, Bibliajj oraqpachan bombanakampi armamentonakampi guerran utjañapätapatsa parlkaspa ukham janiw amuyktanti, jan ukasti Segunda Guerra Mundialan bomba phallayawayapki ukat parlatapwa amuytanjja.

Apocalipsis librojj bombanakata, yaqha ukham armanakatsa parlkchejja, janiw ukanakat wali ajjsarkañ parlkiti. Apocalipsis libro liytʼkäta ukhajj akanak amtam:

Uka librojj uñachtʼäwinakatwa parli, ukhamajj janiw ukhamapunis phoqasiñapäkaspa ukham parlkiti. (Apocalipsis 1:1).
Uka librojj janiw jaqenakar ajjsarayañatak qellqaskänti, jan ukasti uka libro amuytʼapki liytʼapki ukarjam sarnaqapki ukanakan kusisipjjañapatakiw qellqasïna (Apocalipsis 1:3).

Jukʼamp yatiñatakejja, “¿Cuál es el mensaje del libro de Apocalipsis?” sat yatichäwi liytʼam.