¿Olimpiadanakajj cheqapunit jaqenakar mayachtʼaspa? | ¿Bibliajj uka toqet kamsisa?

2024 maranjja, mä 5.000 millón jaqenakaw Juegos Olímpicos de Verano ukanak uñtapjjani. Ukanjja, 206 markanakat jutiri deportistanakaw anatapjjani. Presidente del Comité Olímpico Thomas Bach sat chachajj akham sänwa: “Aka anatañanakajj oraqpacharuw mayachthapi” sasa. Ukat akham sarakïnwa: “Jaqenakajj mayj mayjäkstansa, Juegos Olímpicos ukajj taqenis mayachtʼata sum jakasiñatakiw chʼamañchi” sasa.

¿Cheqapunit Olimpiadanakajj mayachtʼat jakasiñ utjayaspa? ¿Kunas cheqpach sumankañampi mayachtʼat jakasiñamp utjayaspa?

¿Olimpiadanakat mayachtʼat jakasiñampi sumankañamp utjayaspa?

Aka marajj apasiski uka Juegos Olímpicos ukanjja, janiw anatañanakak uñjaskiti. Jan ukasti, markanakan política toqet kuna jan waltʼäwinakas utji ukaw qhanstaraki, ukanakajj janiw jaqenakar mayachtʼkiti. Sañäni, jaqenakajj kuna derechonakanïpjjesa uka toqetsa, mayj mayj jañchinïpjjatapatsa, religionapatsa, jan qollqenïpjjatapatsa jiskʼachataw uñjasipjje.

Walja markanakat jutir deportistanakajj Olimpiadanakan anatapjje ukhajja, jaqenakajj mä rat kusistʼapjjewa, ukampis kuna amuyunakatï uka anatañanakan utjki ukanakajj jaqenakar wiñayatak mayachtʼañat sipansa antisakiw tʼaqanoqtayi.

Kunatsa jichhürunakan mayachtʼat jakasiñajj jan utjkaspa ukjja nayratpachaw Bibliajj sisjjäna (2 Timoteo 3:1-5). Bibliankir uka profeciat jukʼamp yatiñatakejja, “¿Predijo la Biblia cómo sería la gente en nuestros días?” siski uka yatichäwi liytʼasma.

¿Kunas cheqpach sumankañampi mayachtʼat jakasiñamp utjayani?

Bibliajja, kunjamatsa cheqpach sumankañasa mayachtʼat jakasiñas utjani uka toqetwa parli. Ukarjamajja, aka oraqpachankir jaqenakajj mä gobiernompik apnaqatäpjjaniwa, uka gobiernojj alajjpachankir ‘Diosan Reinopawa’ (Lucas 4:43; Mateo 6:10).

Uka Reinon Jesucristo sat Reyipaw aka oraqpachan sumankañ utjayani. Bibliajj akham siwa:

• “Cheqap sarnaqer jaqejj panqaraniwa, [...] sumankañajj waljapuniw utjani” (Salmo 72:7).

• “Jupaw yanaptʼa mayiñatak arnaqasir jaqerojj salvani [...]. Jupaw tʼaqesiyirinakatsa nuwasir jaqenakatsa jupanakar salvani” (Salmo 72:12, 14).

Jichhürunakanjja, Jesusan yatichäwinakapajj 239 markankir walja millón jaqenakaruw mayachthapiski. Cristianonakjamajja, aka oraqpachanwa Jehová Diosan Testigonakapajj suman jakasiñatak yateqawayapjje. Kunjamsa uk lurawayapjje uk yatiñatakejja, “Uñisisiñarojj atipjsnawa” sat pʼeqeñchäwini Yatiyañataki revista liytʼasma.