¿Cheqpach cristianonakajj kunjamäpjjañapasa? | ¿Bibliajj uka toqet kamsisa?

Jichhürunakanjja, walja jaqenakaw cristianöpjjatapat wal jachʼañchasipjje, ukampis jan sinttʼasisaw jaqe masipar kunayman jan walinak lurapjje. Cristianonakat yaqhepajja, jupan askipak thaqerinaka, jan honrado chuymaninaka, qhorunaka ukhamäpjjewa. Yaqhepasti, adulterio juchanwa sarnaqapjjaraki. Uk uñjasaw yaqhep jaqenakajj akham jisktʼasipjje: “¿Cheqpach cristianonakajj kunjamäpjjañapasa?” sasa.

¿Cheqpach cristianonakajj kunanaksa lurapjjañapa?

“Nayajj cristianötwa” sañajj facilakïspawa, ukampis janiw ukham sañakejj wakiskiti. Bibliarjamajja, Jesucriston discipulonakapaw cristianonakat uñtʼatäpjje (Hechos 11:26). Jupasti discipulonakapat akham sänwa: “Jumanakatï arunakaj imapjjapunïta ukhajja, nayan cheqpach discipulojäpjjtawa” sasa (Juan 8:31). Qhana arunjja, pantjasirïtas laykojj janiw khitis Jesusjampun sarnaqksnati. Ukampis mä cheqpach cristianojja, sapüruw Jesucriston yatichäwinakaparjam sarnaqañatak chʼamachasiñapa, ukajj luratanakapanwa uñjasiñaparaki. Kunanaksa mä cristianojj lurañapa uk jichhajj mä qhawqhanak uñjañäni.

Cristianonakajj cheqpachapuniw munasipjje

Jesusajj akham sänwa: “Nayajj mä machaq mandamiento churapjjsma: jumanakajj maynit maynikam munasipjjam. Kunjamtï nayajj munasipksmajja, ukhamarak jumanakajj maynit maynikam munasipjjam. Cheqpachans jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasa (Juan 13:34, 35).

¿Kunsa Jesusajj luräna? Jesusajj kunayman markatäpkchïnsa, taqe jaqenakaruw munasiñamp uñjäna. Jupajj qollqeninakarusa, jan qollqeninakarusa, wali uñtʼatäpkäna ukanakarusa, aleq jaqenakarus yanaptʼapunirïnwa, usutanakarojj qollirïnwa, manqʼat awtjatäpkäna ukanakarojj manqʼwa churïna, taqenir salvañatakiw vidap sacrificiot churawayaraki (Mateo 14:14-21; 20:28).

¿Kunsa cristianonakajj lurapjjañapa? Cristianonakajj Jesusjamarakiw mayninakan askip thaqapjje, jupanakajj wajjtʼasiri, jan yaqhachasiri, perdonasiri ukhamäpjjewa. Jan walinakan uñjasipki ukanakarojj yanaptʼapjjapuniwa, munañanakap maysar apanukusajj jaqe masipar yanaptʼañatakejj jankʼakïpjjarakiwa (1 Juan 3:16).

Cristianonakajj honrado chuymanïpjjewa

Jesusajj akham sänwa: ‘Nayätwa cheqajja’ sasa (Juan 14:6).

¿Kunsa Jesusajj luräna? Jesusajj kunatï cheqäki ukpunwa parlirïna, honrado chuymampipuniw kunsa lurarakirïna. Janipuniw jupan askipak thaqasajj jaqenakar engañjirïkänti, ni kʼarinaksa parlirïkänti. Taqeniw honradötap yatipjjäna. Awisajj honradötapat jan walinsa uñjaskchïnjja, honrado chuymampipuniw sarnaqerïna (Mateo 22:16; 26:63-67).

¿Kunsa cristianonakajj lurapjjañapa? Cristianonakajj janiw kʼarisipkiti. Horasaparuw impuestonaksa pagapjje, janiw lunthatasipkiti, qhawqha horanaktï trabajipjjañapäki ukarjamaw trabajopan phoqapjje (Romanos 13:5-7; Efesios 4:28). Janipuniw mayninakar engañjapkiti, examenanakansa janiw trampanak lurapkiti, trabajo jikjjatañatak documentonak phoqapki ukanakansa yaqha ukham documentonakansa kunatï cheqäki ukpunwa uchapjje (Hebreos 13:18).

Cristianonakajj munasiñampipuniw mayninakar uñjapjje

Jesusajj akham sänwa: “Nayan ukar jutapjjam, taqe qarjatanaka, jatjatanaka, nayaw jumanakar samartʼayapjjäma. Nayan yukuj jumanakjjar apapjjam, nayat yateqasipjjarakita. Nayajj llampʼu chuymanïtwa, humilde chuymanirakïtwa, ukatsti jumanakatakejj samarañsa jikjjatapjjätawa. Nayan yukuj apañajj facilakiwa, qʼepijas phisnakirakiwa” sasa (Mateo 11:28-30).

¿Kunsa Jesusajj luräna? Jesusajj wali munasiñampiw jaqenakar uñjirïna, janiw khitis jupar jakʼachasiñ ajjsarkänti. Wawanakarus wali munasiñampiw uñjirïna, llakitäpkäna ukanakarus chuymachtʼirïnwa, respetompipuniw taqenirus uñjirïna (Marcos 10:13-15; Lucas 9:11).

¿Kunsa cristianonakajj lurapjjañapa? Cristianonakajj munasiñampipuniw mayninakar parlapjje, janiw chuyma ustʼayir arunakamp parlapkiti, ni qhorüpkarakisa (Efesios 4:29, 31, 32). Jaqe masipat llakisipjjapuniwa, kunjamat yanaptʼañsa thaqapjjapuniwa (Gálatas 6:10).

Cristianonakajj janipuniw adulterio juchan sarnaqapkiti

Jesusajj akham sänwa: “Kuntï Diosajj mayachki ukjja, jan khiti jaqes jaljtaypanti” sasa (Marcos 10:9).

¿Kunsa Jesusajj luräna? Jesusajj janis kunapachas casaraskchïnjja, chacha warminakarojj casaratäkasin yaqhanakamp jan sarnaqapjjañapatakiw arkirinakapar yatichäna (Mateo 19:9). Kunanakas maynir adulterio juchar apaspa, matrimoniorus jan waltʼaykaspa uk qhanwa Jesusajj yaticharakïna (Mateo 5:28).

¿Kunsa cristianonakajj lurapjjañapa? Cristianonakajj janipuniw kuntï esposoparusa jan ukajj esposaparus jan waltʼaykaspa uk lurapkiti, respetompipuniw matrimoniopar uñjapjje (Hebreos 13:4). Casarat chacha warmejj munasiñampi respetompiw jupanakkam uñjasipjje (Efesios 5:28, 33).