9. Kunjam jaqëtas uk yatiña

¿KAMSAÑSA MUNI?

Kuna sutinïtasa, kunjam uñnaqanïtasa, ukanakajj janiw kunjam jaqëtas uk uñachtʼaykiti, jan ukasti kunanakarus creyta, kunjam chuymanïtasa ukanakaw kunjam jaqëtas uk qhan uñachtʼayi.

¿KUNATSA WALI WAKISKIRI?

Kunapachatï kunjam jaqëtas uk sum yatisjjta ukhajja, kunatï walïki ukpun lurtajja, janirakiw wayna masinakamampis apnaqayasktati.

“Waljaniw isi aljañ tiendanakan utjki uka jachʼa muñeconakar uñtasitäpjje, kuna laykutejj kuna issa uchasipjjani uk janiw jupanak pachpajj amtirjamäpkiti” (Adrian).

“Chʼamäkipansa kunatï walïki ukjjat saytʼasiñwa yateqawayta. Amigonakajajj kunjam jaqëpjjesa uk luratanakap uñjasaw yatta, nayas jupanakampïsaw kunjam jaqëtsa uk yatisirakta” (Courtney).

BIBLIAJJ KAMSISA: “Jan jukʼampejj akapachankir jaqenakat yateqasis sarnaqapjjamti, jan ukasti machaqar tukupjjañamatakejj amuyunakam machaqar tukuyapjjam” (Romanos 12:2).

¿KUNSA LURASMA?

Jichhajj kunjam jaqëtasa, kunjam jaqer tukuñsa munta uk yatiñatakejja, kunanaksa sum lurta, kunanakansa pantjasiskta, kunanakarus creyta ukanak amuytʼañamawa. Ukatakejj akham jisktʼasiñaw yanaptʼätam:

Suma luratanakama: “¿Kunanak lurañsa sum yattjja? ¿Kunanakansa nayranktjja? ¿Munañanakajar atipjtti? ¿Horasapar phoqeri, trabajtʼiri, wajjtʼasiri ukham jaqëtti? ¿Kunanaksa sum lurtjja?”.

AKHAMWA LURASMA: ¿Kunjam jaqëtas uk amuyañajj jumatak chʼamakiti? Ukhamächejja, awk taykamaru jan ukajj mä amigomaruw uk yatiñatak yanaptʼa mayisma.

BIBLIAJJ KAMSISA: “Sapa mayniw pachpa luratanakapat amuykiptʼasiñapa, ukhamatwa luratanakaparjam kusisini. Jupajj janiw luratanakapjja yaqhan luratanakapampejj igualayañapäkiti” (Gálatas 6:4).

Pantjasitanakama: “¿Kunanakansa chʼamachasiñaja? ¿Kunapachas jan walïki uk lurañatak jukʼamp yantʼat uñjastjja? ¿Kunjamanakan uñjasisas munañanakajar atipjañajajj jukʼamp wakisi?”.

BIBLIAJJ KAMSISA: “Jiwasatejj ‘janiw juchanïktanti’ sisstan ukhajja, jiwas pachpaw engañjasisktanjja” (1 Juan 1:8).

Creyitanakama: “¿Kuna yatichäwinakarjamas sarnaqtjja, kunatsa ukham sarnaqtjja? ¿Diosar creyti? ¿Diosajj utjatap kunjamsa uñachtʼayiristjja? ¿Kunanakas nayatakejj jan walïki, kunatsa ukham sistjja? ¿Kunsa jutïr urunakat amuytjja?”.

BIBLIAJJ KAMSISA: “Jumarusti suma ewjja arunakampi, chʼikhi chuymampiwa imätam” (Proverbios 2:11).