1 JISKTʼA
¿Kunjam jaqëtsa?
¿KUNSA JUMAJJ LURASMA?
Karen tawaqetat amuytʼañäni. Jupajj mä fiestaruw puri. Ukhamaruw maynin arup akham sir istʼi:
“Karen, ¿kuns sapak akan luraskta?”
Qhep uñtasajja, Karen tawaqetajj Rebeca amigaparuw pä cerveza aptʼat uñji. Jupasti, akham sasaw mä cerveza churañ muni: “Janiw jumajj wawäjjtati. Mä jukʼjja kusistʼasmawa, umtʼam” sasa.
Karen tawaqetajj minus maranïskatap laykojj janiw umtʼañ munkiti, janirakiw amigapampis jan walit uñjayasiñ munkiti. ‘Rebecajj suma chuyman tawaqowa, jupatï cerveza umtʼchejja, nayajj umtʼarakiristwa’ sasaw Karen tawaqetajj amuytʼasi, ukat akham sarakiwa: “Mä cervezakiwa, janiw drogäkiti” sasa.
Jumatï ukhaman uñjasisma ukhajja, ¿kuns lurasma?
NAYRAQAT SUM AMUYTʼASIM
Suma amtanakar puriñatakejja, kunjam jaqëtas uk sum amuytʼasiñamaw wakisi, ¿ukajj kamsañsa muni? Kuna yatichäwinakarjamas sarnaqta, kunarus creyta uk sum amuytʼasiñamawa. Uk yatisajj juma pachpaw kun lurañsa amtäta, janiw mayninakajj munañaparjam apnaqapkätamti (1 Corintios 9:26, 27).
¿Kunas ukham lurañatak yanaptʼiristam? Uk jichhajj pusi toqet uñjañäni.
1 ¿KUNANAKSA SUM LURAÑ YATJJA?
Kunjam chuymanïtasa, kunanaksa sum lurañ yatta uk yatiñajja, juma pachpat jan pächasiñamatakiw yanaptʼätam.
YATEQASIÑATAKI: Apóstol Pablojj akham sasaw qellqäna: “Parlatajjajj inas jan sumäkchiti ukampis yatitanakajjajj janiw ukhamäkiti” sasa (2 Corintios 11:6). Pablojj Qollan Qellqatanak sum uñtʼäna, ukatwa jaqenakajj jiskʼachapkäna ukhajj jan aynachtʼkänti, ni jupa pachpatsa pächaskänti (2 Corintios 10:10; 11:5).
AMUYKIPTʼASIM ¿Kunsa sum lurañ yatta? Uk qellqtʼasim.
Kunjam chuymanïtas uk jichhajj qellqtʼasirakim (inas munasiri, khuyaptʼayasiri, confiykaña, jan ukajj horasapar phoqeri ukhamästa).
2 ¿KUNANAKAN CHʼAMACHASIÑAJAS WAKISI?
Mä cadenat amuytʼañäni, mä argollapatï jan sumäkaspa ukhajja, tʼaqasjjakispawa, jumampejj ukhamarakïspawa. Kunanakan chʼamachasiñamas wakisi uk jan sum amuyaskäta ukhajja, ukhamarakiw jankʼak aynachtʼasma.
YATEQASIÑATAKI: Pablojj kunanakansa aynachtʼirjamäna uk sum amuyasïna, ukatwa akham qellqäna: “Chuymajj manqhenjja Diosan leyiparu wal munta, ukampis naya kipkanjja mayaw utjitu, kuntejj nayajj munkta uka contrawa, ukasti janchejjankkis uka juchan munañapawa, ukan katuntatarakïtwa” sasa (Romanos 7:22, 23).
AMUYKIPTʼASIM ¿Kuna toqenakan chʼamachasiñamas wakisi?
3 ¿KUNA AMTANAKANÏTSA?
Maynejj mä taxir makatasin janiw choferur akham siskaspati: “Gasolina tukusiñapkam aka cuadra muytayita” sasa. Jan amuytʼasir jaqekiw ukham inamayar qollqep tukjasispa.
¿Kunsa ukat yateqasma? Kunanaksa jakäwiman luräta uk sum amtäta ukhajja, sum amuytʼasisaw kuns luräta.
YATEQASIÑATAKI: Pablojj akham sänwa: “Nayajj janiw ina pampaki jalkti” sasa (1 Corintios 9:26). Pablojj janiw jan sum amuytʼasisak kuns lurkänti, antisas kunanaksa jakäwipan lurani uk sum amtäna, ukat ukarjam lurañatakiw chʼamachasïna (Filipenses 3:12-14).
AMUYKIPTʼASIM Aka jutïr phajjsinakan kunanaksa lurañ munasma ukanakat kimsa luräwinak qellqtʼasim.
4 ¿KUNARUS CREYTJJA?
Kunjam jaqëtas uk sum amuyasïta ukhajja, suma saphintata mä qoqar uñtasitaw jachʼa jan waltʼäwinakar saykatäta.
Kunarus creyta uk jan sum amuyaskätajja, taqe kunatwa pächasisma. Kunjamtï camaleón jiskʼa animalajj mayj mayja coloranakar tukkejja, ukhamarakiw jumajj amigonakamamp askit uñjatäñ laykojj jupanakjam tukusma. Ukham tukurinakajj janiw sum uñtʼasipkiti.
Ukampis jumatï kuntejj amtkta ukarjam phoqäta ukhajja, kunsay mayninakajj lurasipkpan, janiw jupanakamp apnaqayaskätati.
YATEQASIÑATAKI: Daniel profetat amuytʼañäni. Jupajj qʼajjo waynitükäna ukhaw familiapat jayarstʼayat uñjasïna. Ukhamäkchïnsa, Diosan leyinakaparjam sarnaqañatakiw ‘chuymapan amtäna’ (Daniel 1:8). Kunjam jaqënsa ukjja, janiw Daniel waynajj armkänti, kuntï lurañ amtkäna ukjja phoqapunïnwa.
AMUYKIPTʼASIM ¿Kunarus creyta? Sañäni, ¿Diosan utjatap creytati? ¿Kunatsa ‘Diosajj utjaskapuniwa’ sista? Ukham amuyañatakejj ¿kunas yanaptʼawaytam?
¿‘Qʼom sarnaqañ toqet Diosajj ewjjtʼkistu ukanakajj yanaptʼitaspaw’ sasmati? ¿Kunatsa ukham amuyta?
¿Kunjamäñsa munasma? ¿Thayan apata qoqa laphir uñtasitäñti munasma? Jan ukajj ¿jan kamachkaya suma saphintat qoqjamäñcha munasma? Qoqar uñtasitäñ munsta ukhajja, kunjam chuymanïtas uk sum amuyasiñamawa. Ukhakiw aka jisktʼarojj jaysasma: ¿Kunjam jaqëtsa?