Sum yatjjatañasawa

¿Kunatsa?

Jilapartejja, jaqenakajj kʼarinak istʼapjjatap laykuw mayninakar yaqhachapjje. Ukanakat yaqhepajj akanakäspawa:

• Yaqhep jefenakajja, warminakajj janiw computadoranaksa ni yaqha maquinanaksa sum apnaqañ yatipkiti sasaw jan sum yatisajj parlapjje.

• Camponkir jaqenakajj jayranakäpjjewa sasaw waljanejj sapjje.

• Discapacitadonakajja, llakita aynachtʼata ukhamaw jakasipjje sasaw waljanejj amuyapjje.

Taqe uka kʼarinak creyiri jaqenakajja, ‘razonaniw ukham amuyta’ sasaw sapjje, jupanakjam jan amuyapki ukanakajj jan yatiñan jaqenakäpkaspasa ukhamwa amuyapjjaraki.

¿Kunjamsa Bibliajj yanaptʼistaspa?

“Jan sum kunsa yatjjatasa lurañajja janiw walïkiti” (PROVERBIOS 19:2).

¿Kunsa ukajj yatichistu? Jan sum yatkasin parlañajj pantjasiyistaspawa. Kuntï jaqenakajj sapkistu ukanakajj cheqäskapuniti janicha uk jan sum yatjjatkañäni ukhajja, mayninakat jan walinakwa amuyañäni.

¿Kunatsa sum yatjjatañasa?

Jaqenakar sum uñtʼtan ukhajja, janiw kuna jan walinaktï jupanakat sapkistu ukanak creykañäniti. Kuna jan walinaktï mä kasta jaqenakat sapkistu ukanakajj kʼarïtap yatisajja, janiw kuna jan walinaktï yaqha kasta jaqenakat sapkarakistani ukanak creykañäniti.

¿Kunsa lursna?

• Inas mä kasta jaqejj jan wali jaqëchispa, ukampis janiw jiwasajj taqenis ukhamäpkaspa ukham amuyañasäkiti.

• ‘Janiw jupanakar sum uñtʼkti’ sasaw amuyañasa.

• Sum yatjjatañatakejja confiykay yatiyäwinakatwa yatjjatañasa.