Yaqha kasta amigonakwa thaqañasaraki
¿Kunatsa?
Yaqha kasta jaqenakamp jan chikachasksna ukhajja, jukʼampiw jupanakar yaqhachjjsna. Jiwasjam amigonakak thaqasiñäni ukhajja, kunjamtï piensktan kunanaktï lurktan ukanakakis sumäkaspa ukhamwa amuyjjsna.
¿Kunjamsa Bibliajj yanaptʼistaspa?
“Chuymanakamjja wali jachʼa jistʼarapjjam” (2 CORINTIOS 6:13).
¿Kunsa ukajj yatichistu? Chuyma siski uka arojja, kunjamsa jikjjatastan uk sañwa muni. Jiwasjamäpki uka jaqenakampikitï sum apasiñänejja, chuymassa jistʼantksna ukhamäspawa. Uk jan pasañapatakejja, taqe kasta amigonakanïñatakiw chʼamachasiñasa.
¿Kunjamsa taqe kasta amigonakanïñajj yanaptʼistaspa?
Maynir sum uñtʼasajja, kunatsa jan jiwasjam mä kuns lurki uk sumwa yatjjtanjja. Jupamp chikachastan ukhajj janiw yaqhachjjtanti. Antisas jukʼampiw jupar munasjjtanjja, sinttʼasjjaraktanjja.
Nazaré warmit parltʼañäni, ¿kunas yaqha markat jutirinakar jan yaqhachjjañatak yanaptʼäna? Jupajj akham siwa: “Jupanakamp chikachasiña, trabajiñaw yanaptʼitäna. Jupanakajj janiw kunjamtï mayninakajj sapkitäna ukham jan wali jaqenakäpkänti. Yaqha culturani jaqenakan amigopäjjtan ukhajja, janiw juchañchjjtanti, antisas jupanakar wal munasjjtanjja, valoranitwa uñj-jjaraktanjja” sasa.
¿Kunsa lursna?
Yaqha aru parlirinakampi, yaqha markat jutirinakampi, yaqha kasta jañchininakamp parlañatakiw chʼamachasiñasa. Ukatakejj akanakwa lurañasa:
Kunjamsa jakasiwayapjje uk jiwasar cuenttʼapjjañapatakiw mayiñasa.
Jiwasamp chik manqtʼasipjjañapatakiw invittʼañasa.
Kunanakas jupanakar pasawayi uk istʼañasawa, kunanakas jupanakatak wali importantejja uk yatjjatañatakiw chʼamachasiñasaraki.
Kunanakatï jupanakar pasawayki ukanak amuyañatak chʼamachasiñäni ukhajja, kunatsa ukhamäpjje uk sumwa amuyjjañäni, janirakiw jupanak kasta jaqenakarus yaqhachjjañäniti.