Mayninakampi sum jakasiñatak ewjjtʼanaka

Perdonasirïñamawa

‘Jumanak taypin kuna quejasiñas utjchi ukhajja, jumanakkamajj taqe chuyma perdonasipjjam’ (COLOSENSES 3:13).

Taqeniw pantjasirïtanjja, ukatwa maynirojj chuym ustʼaysna jan ukajj jiwasar chuym ustʼayapjjestaspa. Ukhamasti taqeniw perdonasirïñasa. Perdonktan ukhajja, chuym ustʼaykistu ukarojj janiw jan walit uñj-jjtanti, janirakiw “jan walit jan walimpi” kuttʼayktanti, ni pantjasitanakapatsa jukʼamp parljjtanti (Romanos 12:17). Ukampis ¿sintpun chuym ustʼayistu ukhajj kamachsnasa? Jupa sapampik parltʼañaw wakisispa, ukatjja respetompiw parlañasaraki. Jupamp sumankthapiñatakiw ukham lurañasa, janiw chʼajjwañan atipañ munktanti (Romanos 12:18).

Humildëñamawa, mayninakar respetañamarakiwa

“Mayninakarojj humilde chuymamp uñjapjjam, jumanakat sipansa jilïrïpkaspas ukhama” (FILIPENSES 2:3).

Humildëñäni, respetomp mayninakar uñjarakiñäni ukhajja, jaqenakajj jiwasampïñ wal munapjjani. Janiw jupanakarojj amanut jan walinak lurañasäkiti, antisas munasiñampi sinttʼasiñampiw uñjañasa. Ukampis jiwasakis jukʼamp importantëksna ukham amuysna, munañasaruk kuns lurayañ munaraksna ukhajja, jan walinakakwa utjaysna. Jaqenakajj janiw jiwasampïñ munjjapjjaspati, ukhamarus janiw ni mä amigonëjjsnasa.

Janiw yaqhachasirïñamäkiti

“Diosajj janiw khitirus yaqhachkiti. Jan ukasti khitinakatï taqe markanakan jupar ajjsartʼapki, kunatï cheqapäki ukarjam lurapki ukanakajja, jupan katoqatäpjjewa” (HECHOS 10:34, 35).

Diosajj jaqenakarojja kawkïr markatäskpasa, kuna arsa parlaskpan, qollqenïskpasa janisa, kuna kasta jañchinïskpasa, mä igualakwa taqenirus uñji. Diosajja “mä sapa jaqetakwa taqe markankir jaqenak luri” (Hechos 17:26). Ukhamasti taqe jaqenakajj mä familiakïtanwa. Mayninakarojj respetompi munasiñampi uñjktan ukhajja, jupanakajj wal kusisipjje, jiwasas kusisiraktanwa, Diosas wal kusisiraki.

Jan ratuk colerasimti

“Llampʼu chuymanïñampi [...] isthapisipjjam” (COLOSENSES 3:12).

Llampʼu chuymanïktan janirak ratuk colerasktan ukhajja, mayninakarojj jiwasampïñajj wal gusti, kun cuenttʼañsa janirakiw ajjsarapkiti. Ukhamarus jan jankʼak colerasirïtas yatisajja, cheqañchañsa janiw ajjsarapkistuti. Maynitï jiwasatak coleratächi ukhajja, suma arunakampiw jaysañasa, ukaw colerap apjtayaspa. Proverbios 15:1 textojj siwa: ‘Suma arunakampi jaysañajja colerasiñ apaqewa, ukampis usuchjir arunakajj colerayiwa’ sasa.

Wajjtʼasiri yuspärasiri ukhamäñamawa

“Katoqañat sipansa churañanwa jukʼamp kusisiñajj utji” (HECHOS 20:35).

Jilaparte jaqenakajj jupanak pachpatakwa llakisipjje, walja cosasanakanïñwa munapjjaraki. Ukampis jiwasatï wajjtʼasirïñänejja, kusisitaw jakasiñäni (Lucas 6:38). Wajjtʼasirïpki ukanakajj kusisitäpjjewa, kuna laykutejj cosasanakar munasiñat sipansa jaqenakaruw jukʼamp munasipjje. Uka munasiñaw yuspärasirïpjjañapatak chʼamañchi, mayninakat kuns katoqapki ukhajj wal yuspärapjjaraki (Colosenses 3:15). Akham jisktʼasim: “¿Kunjam jaqenakampïñsa munirista? ¿Jupatakik kuns muniri jan yuspärasir jaqenakampi, jan ukajj wajjtʼasiri yuspärasir jaqenakampicha?” sasa. ¿Kuns ukat yateqsna? Kunjamtï mayninakampi uñjatäñ munktan ukhamwa jiwasajj jupanakar uñjañasaraki (Mateo 7:12).