¿TAQE KUN JILJJATTATAPAT KUNS LURSNA?
Wajjtʼasirïñasawa
Kunanaktï necesitktan ukanakan jiljjattatap laykojj ukanak alañajj chʼamakïspawa, ukhamïpan wajjtʼasirïñajj janiw faciläkaspati. Ukampis wajjtʼasirïñajj taqe kunan jiljjattatapar saykatañatakiw yanaptʼistaspa. Kunjamsa qollq imassna ukat wajjtʼasirirakïsna uk uñjañäni.
¿KUNATS IMPORTANTEJJA?
Mä jukʼaks maynir wajjtʼchiñänejja, kusisitäñäniwa. Yaqhep doctoranakajja, wajjtʼasirïñajj kʼumaräñataki sumak jikjjatasiñatakiw yanaptʼistu sasaw sapjje. Sañäni, jan aynachtʼañataki, jan sint llakisiñataki, jan presión altanïñataki, ukat yaqha ukhamanakanwa yanaptʼistaspa. Sum iktʼañatakis yanaptʼarakistaspawa.
Mayninakarojj qollqempisa yaqha ukhamanakampis yanaptʼapuntan ukhajja, yanaptʼa munkañäni ukhajj yanaptʼayasiñajj janiw chʼamäkaniti. Inglaterra markan jakasiri Howard chachajj akham siwa: “Esposajasa nayasa, mayninakar yanaptʼañatakisa wajjtʼasirïñatakis chʼamachasipjjapuntwa. Ukat kunapachatï yanaptʼatäñ munapkta ukhajja, yanaptʼa mayiñajj janiw nanakatak chʼamäkiti”. Cheqas taqe chuym wajjtʼasirinakajj janiw maynit mä kun katoqañs suykiti. Ukampis wajjtʼasirïsajj cheqpach amigonakwa jikjjatapjje, uka amigonakaw necesitapkani ukhajj yanaptʼapjjani.
¿KUNSA LURSNA?
Wajjtʼasirïñäni. Jukʼa utjirinikïstansa wajjtʼasirïsnawa, inas mä jukʼa manqʼa maynir wajjtʼsna. Uganda markankir Duncan chachampi familiapampejj pisinwa jakasipjje. Ukhamäkchisa, wajjtʼasirïpjjewa. Duncan chachajj akham siwa: “Esposajasa nayasa, domingonakajj utajar manqtʼasir jutañapatakiw maynir invittʼapjjta. Ukat mayninakamp qamartʼañas gustapjjarakituwa” sasa.
Maynir mä kuns wajjtʼañ munstan ukhajja, wali amuyumpiw uk lurañasa ukhamat familiasar jan walin jan uñjasiyañataki (Job 17:5).
Akwa kursna: Maynirojj manqtʼasiñataki jan ukajj mä kun umtʼasiñatakiw invittʼsna. Mä kuns jan necesitjjstan ukhajja, necesitki uka amigosaru jan ukajj vecinosaruw chursna.
Yaqha toqenakatwa mayninakar yanaptʼaraksna. Mä suma regalojja janiw qollqetakipunïkiti. Sañäni, mayninakar yanaptʼañatakejj tiempwa apstʼassna jan ukajj yaqha ukhamanakampiw yanaptʼsna. Munasiñamp mayninakar parljjayañajj mä suma regalorakispawa. Ukhamajj mayninakarojj qhawqsa munastan qhawqha valoranisa ukwa sissna.
Akwa lursna: Mayninakarojja, kuna lurañanakapatï utanakapan utjki ukampiw yanaptʼsna, inas utanakap askichtʼarapsna jan ukajj kuntï necesitki uk aliriw sararapsna. Mä munat amigor yuspärañatakejj mä nota jan ukajj mä mensajwa qellqtʼsna, uka toqerakiw jupat jan armasitas uñachtʼaysna.
Wajjtʼasirïñäni ukhajj kusisitaw jakasiñäni.