¿Celularajj jan waltʼayistaspati? Amuyusaru
Jaqenakajj sapüruw yateqtanjja. Escuelankkasasa, trabajonkkasasa jan ukajj yaqha horasanakansa yateqapuntanwa. Celularajj yateqañatak jaqenakar yanaptʼarakispawa. Nayrat sipansa, jichha tiempojj facilakwa kunayman toqenakat jan utat mistusa, jan ukajj mä sillan qontʼatäkasas yateqsna.
Ukampis celular sinti apnaqerinakajj aka jan walinakanwa uñjasipjje:
Liyipki ukhajj janiw concentrasiñ puedipkiti.
Mä kun lurapki ukhajj facilakwa yaqhanak lurañar uchasipjje.
Sapakïpki ukhajj jankʼakiw aburrisipjje.
AKWA YATIÑAMA
LIYIÑA
Yaqhep jaqenakajj celularapana jan ukajj computadorapan mä yatichäw phoqatpach liytʼañatakejj janiw paciencianïpkiti, aleq pata patakwa liyipjje.
Ukham aleq pata patak liytʼañajj kun jisktʼasktan uk yatiñatakejj yanaptʼistaspawa. Ukampis mä toqet yatjjatañ munañäni ukhajja janiw ukham liytʼañajj yanaptʼkistaspati.
AK AMUYTʼAM: ¿Mä yatichäwi phoqatpach liytʼañajj jumatak chʼamakiti? Mä yatichäwi phoqatpach sum liytʼañajja ¿kunatsa yateqañatakejj yanaptʼätam? (PROVERBIOS 18:15).
CONCENTRASIÑA
Yaqhep jaqenakajja celular utjatap laykojj kun lurkasas yaqhanak luraraksnawa sasaw amuyapjje. Sañäni, ‘estudiasktan uka horasajj amigonakasarojj mensajenak apayasksnawa’ sasaw sapjje. Ukampis kuntï estudiaski ukar janitï sum concentraskani ukhajja, janiw kunsa sum lurkaniti.
Concentrasiñajj janis faciläkchejja, sum yateqañatakiw yanaptʼätam. Grace sat mä tawaqetajj akham siwa: “Janiw sint pantjasktati, janirakiw sint llakisktati. Mä kun lurkta ukhajj uka sapaki lurañatakiw chʼamachasta, ukham lurañaw jukʼamp sumajja, ukwa yateqawayta” sasa.
AK AMUYTʼAM: Mä pachpa horasan waljanak lurasajja, ¿kuntï yateqkta uk amuytʼañasa, amtañasa chʼamakiti? (PROVERBIOS 17:24).
SAPAKÏKTA UKHA
Yaqhep jaqenakarojj janiw sapakïñajj gustkiti. Ukatwa celularap uñapjje, Internetarus mantapjjapuni. Olivia sat mä warmejj akham siwa: “Janiw ni mä 15 minutonakas jan kun lurasa qontʼaskiristti. Celularsa, tabletsa jan ukajj televisionsa naktayapuntwa. Sapakejj aburristwa” sasa.
Ukampis waynanakasa jilïrinakasa, taqeniw sapakïñatakejj yaqhep horasanakajj tiempo apstʼasiñasa. Ukhamat kuntï yateqktan ukanakat lupʼiñataki. Ukaw sum yateqañatakejj yanaptʼistani.
AK AMUYTʼAM: ¿Sapakïkta uka horasanakajj piensañatak chʼamachastati? (1 TIMOTEO 4:15).
AKWA LURASMA
KUNJAMSA CELULAR APNAQTA UK AMUYTʼAM
¿Kunjamanakatsa celularajj jukʼamp yateqañamatakejj yanaptʼiristamjja? Yateqaskta uka horasajj ¿kunjamatsa celularajj jan waltʼayiristamjja?
BIBLIAJJ AKHAM SIWA: “Yatiñanïñsa amuytʼasirïñsa jarkʼaqam” (PROVERBIOS 3:21).