¿Mä Lurirejj utjiti janicha uk yatiñajj kunatsa wakisi?

¿Kunatsa uk yatiñajj wali wakiskiri? Taqe chʼamani mä Diosajj utjaskapuniwa sasin amuysta ukhajja, Bibliajj jupan amuytʼayatati janicha uk yatiñ munarakpachätawa. Jumatï Bibliar confiyäta ukhajja, aka askinakwa jikjjatäta:

Jukʼamp kusisitaw jakasïta

BIBLIAJJ AKHAM SIWA: ‘Diosajj suma luräwinak luräna, alajjpachat jallunaka apayanïna, suma cosecha tiemponak churäna, manqʼañanakampi sistʼayäna, chuymanakaps wal kusisiyäna’ (Hechos 14:17).

¿KAMSAÑSA MUNI? Kunanakatï utjki ukajja, Diosan suma regalopawa. Jupajj qhawqsa jumat llakisi uk Bibliat yatjjatäta ukhajja, jukʼamp valoranitwa uka regalonak uñjäta.

Suma ewjjtʼanakwa jikjjatäta

BIBLIAJJ AKHAM SIWA: “Jumasti cheqapar uñjañ toqetsa, justicia toqetsa, jan yaqhachasiñ toqetsa amuyätawa, sarañamäki uka cheqap thakejj kawkïrisa uksa amuyarakïtawa” (Proverbios 2:9).

¿KAMSAÑSA MUNI? Niyakejjay Diosajj jumar lurawaystamjja, kunas kusisitäñatak yanaptʼiristam uk jupaw yati. Bibliajj kamsisa uk yatjjatäta ukhajja, jumar yanaptʼkiri suma ewjjtʼanakwa jikjjatäta.

Jisktʼanakaman qhanañchäwipwa jikjjatäta

BIBLIAJJ AKHAM SIWA: ‘Diosaruw uñtʼäta’ (Proverbios 2:5).

¿KAMSAÑSA MUNI? Mä Luririn cheqapun utjatap yatiñajja, aka wakiskir jisktʼanakan qhanañchäwip jikjjatañatakiw yanaptʼätam: ¿kuna amtampi luratätansa? ¿Kunatsa tʼaqestanjja? ¿Jiwatanakajj kunjamäsipkisa? Biblianwa uka jisktʼanakan qhanañchäwip jikjjatäta.

Kusisitaw jutir uru suyäta

BIBLIAJJ AKHAM SIWA: “‘Kuntï nayajj jumanakatak amtaskta ukanak sum yatta’, siw Jehová Diosajja, ‘nayajj jumanakar sumankañ churapjjäma, janiw jan waltʼañ churapkämati. Nayajj mä suma suytʼäwi jutïritak churañ munapjjsma’” (Jeremías 29:11).

¿KAMSAÑSA MUNI? Diosajj taqe jan walinaka, tʼaqesiñanaka, jiwañsa tukj-jjaniwa, jupaw uk arsuwayi. Jumatï Diosan promesanakapar confiyäta ukhajja, jan walinakarojj jan ajjsartʼasaw saykatäta.

Mä Luririn utjatapar creyiñaw jupanakar yanaptʼawayi

“Diosajj kunjamsa yanaptʼitu uk uñjañajj wal musparayitu. Jupajja, kun lurañas jukʼamp wakiskiri, kunjamsa jan waltʼayasiñanak askichsna, kunjamsa amigosarjam uñjsna ukanak amuyañatakiw yanaptʼitu…” (Cyndi, Estados Unidos markata).

“Mä Luririn utjatap yatiñajja, kusisita jakasiñatakiw yanaptʼitu. Jupa toqet yatjjatañasa, kunanaktï lurawayki ukat yatjjatañasa, Biblia toqet yatjjatañas waljaw utji, ukanak yateqasajj kusisitakïtwa” (Elise, Francia markata).

“Diosajj Biblia toqe ewjjtʼanak churkistu ukan yanaptʼapampiw jichhajj jukʼamp kusisitäjjta. Yaqhanakatsa janiw nayrjam jan walinak parljjti, mayninakatsa llakisiraktwa, jukʼamp kusisitäjjaraktwa. Wawanakajar sum uñjañatakiw yanaptʼarakitu” (Peter, Países Bajos markata).

“Diosar jan uñtʼkayäta ukhajja, manqʼañaru, ikiñaru, trabajiñarukiw chuym uchayäta. Jakäwejj janis valoranïkaspa ukhamwa uñjayäta. Jichhajja jakäwirojj mä suma regalorjamaw uñj-jjta, wali kusisitaw jakasjjta” (Liz, Estonia markata).

“Llakisiñajj utjakipuniwa. Ukampis tʼaqesiñasa, jan walinakasa, ina chʼusat tʼaqesiyatäñas tukusjjaniwa, uk yatiñaw jan sinti llakisiñatak yanaptʼitu” (Adrien, Francia markata).