Qhuru Faraonaw Egipto apnaqi

AKA jaqinakax munkir jan munkirwa lurayaski. ¡Khuri maynix chikutimpiw wal jawqʼjaski! Tʼaqhisisipki ukanakaxa Jacobun familiapawa, israelitanak satäpxiwa. Jawqʼjaski ukanakaxa egipcionakarakiwa. Israelitanakaruxa irnaqirinakapatwa tukuyapxatayna. ¿Kunatsa ukax paspachäna?

Walja tiempow Jacobun familiapax Egipton sum jakasipkäna. Faraonan jilïrit uttʼayat Joseyaw familiaparux uñjaskäna. Ukampis Joseyax jiwxänwa. Ukat mä machaq Faraonaw Egipto apnaqirjam uttʼasxarakïna, jupasti israelitanakarux wal uñisïna.

Ukatwa aka qhuru Faraonax israelitanakarux irnaqayäna. Ukatxa jan sinttʼasir qhuru jaqinakwa israelitanakar uñjiritakix uchäna. Uka jaqinakasti israelitanakarux munkir jan munkirwa Faraonataki jachʼa utanaka utachayapxäna. Ukampis israelitanakax jilxattasipkakïnwa. Ukatxa egipcionakax axsarxapxänwa, israelitanakax waljaniptasin chʼamaniptapxaspaw sasa.

¿Uk amuyasisax Faraonax kamachataynasa uk yattati? Israelit warminakaru ususiñ yanapir warminakaruw akham säna: ‘Yuqall wawa ususini ukhax uka wawar jiwayapxätawa’ sasa. Ukampis uka warminakax janiw qhuru warminakäpkänti, janiw yuqall wawanakar jiwayapkänti.

Ukatwa Faraonax akham mä kamachi markapatak apsüna: ‘Israelit taqi jiskʼa yuqall wawanakarux jiwarayapxma. Imill wawanakarux niyas jakayasipkasmawa’ sasa. ¿Wali qhurupunïnxay ukham sañatakixa? Jichhax kunjamsa mä yuqall wawar qhispiyapxatayna uka tuqit yatxatañäni.