Moisesajj Jehová Diosar serviñwa ajllïna

Egipto markanjja, Jacobun familiapajj israelitanaka sasin uñtʼatänwa. Jacobusa Joseas jiwjjapjjäna ukhajja, yaqha faraonaw Egipto apnaqjjäna. Israelitanakajj egipcionakat sipansa wali chʼaman markaruw tukusipkäna, uk uñjasaw uka machaq faraonajj ajjsarayasïna. Ukatwa israelitanakarojj esclavor tukuyäna, ladrillonak lurayäna, camponakan trabajiyäna. Egipcionakajj walsa tʼaqesiyapkchïnjja, israelitanakajj waljaptasipkakïnwa. Faraonarojj janiw ukajj gustkänti, ukatwa asu yoqall wawanakar jiwarayañatak mä orden churäna, imill wawanakarukiw jan jiwayapjjañapäkänti. Israelitanakajj wal ajjsarapjjpachäna, ¿uk amuytati?

Jokébed sat mä israelit warmejj mä suma asu wawanïnwa. Jan jiwayapjjañapatakejj Nilo jawiraruw mä canastar ichuntasajj cañanak taypir imantanïna, uka wawan Míriam sat kullakapaw kunas pasani uk uñchʼukiskäna.

Faraonan phuchapaw uka jawirar jarisir saräna, ukatjja mä canasta uñjäna. Ukan mä wawaw jachaskäna, wal uka wawat sinttʼasïna. Miriamajj akham sasaw jisktʼäna: ‘¿Aka wawar uywañapatak mä warmiruch jawsanirapïma?’ sasa. Jupasti ‘mirä amp suma, jawsanim’ sasaw säna, Miriamajj mamap irptanïna. Faraonan phuchapajj Jokébed warmir akham sänwa: ‘Aka waw uywarapita, pagaskämawa’ sasa.

Wawajj jachʼäjjäna ukhajj faraonan phuchaparuw Jokébed warmejj churjjäna. Faraonan phuchapajj Moisés sasaw sutiyäna, wawapäkaspas ukham uywasirakïna. Moisesajj mä principjamaw jilsüna, kuntï munkäna ukwa churapjjäna. Ukampis janiw Jehová Diosat armaskänti. Jupajj janiw egipciökänti, israelitänwa uk sum yatisïna. Diosar serviñwa ajllirakïna.

Moisesajj 40 maranëjjäna ukhajj israelit masinakaparuw yanaptʼañ munäna. Mä urojj mä egipcio jaqew mä israelita esclavor nuwjaskäna. Moisesajja, uk uñjasajj wali chʼamampi nuwantasaw uka jaqer jiwayäna. Ukatjja chʼallaruw uka jiwat imantäna. Faraonajj uk yatïna ukhajja, Moisesar jiwayañwa munäna, ukatwa jupajj Madián sat lugarar escapjjäna. Ukanwa Jehová Diosajj jupar cuidäna.