Jericó markan jachʼa uyupa

¿KUNATSA aka Jericó markan uyupax allthaptaski? Jachʼa bombas phallkaspa ukhamarakisä. Ukampis nayrax janiw bombasa ni tanquesa utjkänti. ¡Jehová Diosan yaqha milagropawa! Uka tuqit sum yatxatañäni.

Jehová Diosax Josué tatarux kamsänsa uk istʼañäni: ‘Jumampi, israelit soldadonakamampixa Jericó mark muytapxäta. Arustʼäwir mantat arkas kalltʼasita, suxta uruw muytapxäta, sapürun mä kuti. Paqallq sacerdotenakaw arkan nayraqatap pututtʼasis sarapxani.

‘Paqallqu urunxa paqallq kutiw muytapxäta. Ukatxa wali jay pututtʼasipxäta, chʼaxwirinakjamaw mä kunkaki jachʼat artʼapxäta. ¡Ukat uyux allthaptaniwa!’ sasaw Diosax säna.

Jehová Diosax siskän ukarjamaw Josuempi israelitanakampix lurapxäna. Muytapxän ukhaxa, janiw khitis arskänti. Pututumpi sarnaqapxatapampikiw istʼasïna. Israelitanakar uñisiri Jericó markankirinakaxa wal axsarapxpachäna. ¿Khä ventanan wila wiskha warkkatatäski uk uñjtati? ¿Khitin utapasa? Jïsa, uñaqir israelitanakax sapkän ukarjamaw Rahab warmix luratayna. Familiapampiw uka utankasipkäna.

Ukat paqallq urun paqallq kuti muytxapxän ukhaxa pututtʼasipxänwa ukat Israel soldadonakasa jachʼat artʼapxäna, ukapachaw Jericó markan jachʼa uyupax allthaptäna. Josué tatax akham sänwa: ‘Jaqinakar jiwarayapxam markpach phichkatapxam taqi kunanakapamppacha, ukat quri, qullqi, ukhamarak bronce, hierro ukanak janiw phichkatapxätati, yupaychañ utar apañatakïniwa’ sasa.

Uñaqir sarapkän uka pä israelitanakaruxa, Josué tatax akham sänwa: ‘Rahab warmimpiru familiapampiru irpsunipxam’ sasa. Jupanakasti qhispipxänwa, kunjamtï uñaqirinakax sapkän ukhama.