Rahab warmejj uñaqerinakaruw imanti

Uñaqer israelitanakajj Jericó markar sarapjjäna ukhajja, Rahab sat warmin utapanwa quedasipjjäna. Jericó markan reyipajj uk yatïna ukhajja, soldadonakwa Rahab warmin utapar khitäna. Jupajj uta techoparuw uñaqeri jaqenakar imantäna, soldadonakarusti yaqha cheqaruw khitanukurakïna. Rahab warmejj uñaqerinakar akham sänwa: ‘Jehová Diosajj jumanakampïskiwa, aka markarus atipjapjjarakïtawa, ukatwa yanaptʼapjjsma. Mirä amp suma, nayarus familiajarus salvañatak mä promesa lurawayapjjam’ sasa.

Uñaqer israelitanakajj Rahab warmir akham sapjjänwa: ‘Mä wila color pitampi jan ukajj sogampi ventanamar warkkatäta ukhajja, utamankirinakarojj janiw kunas paskaniti. Ukhamatwa familiamajj salvasini’ sasa.

Rahab warmejja uñaqer israelitanakarojj ventanapatwa mä pitamp jan ukajj sogamp warkoqäna, ukhamwa Jericó markat mistupjjañapatak yanaptʼäna. Jupanakasti kimsüruw qollunakan imantasipjjäna, uka qhepatwa Josué chachan ukar sarjjapjjäna. Ukatsti israelitanakajj Jordán jawir paskatapjjäna, Canaán oraqe katuntañatakiw wakichasipjjarakïna. Jericó markwa nayraqat katuntapjjäna. Diosajj akham sänwa: ‘Sapüruw Jericó marka mä kuti muytapjjäta’ sasa. Sojjta urunakaw ukham lurapjjäna. Paqallqöri urunsti paqallqo kutiw Jericó marka muytapjjäna. Ukatjja sacerdotenakajj pututunakwa phustʼapjjäna, israelit soldadonakasti taqe chʼamampiw artʼapjjarakïna. Ukatsti markan jachʼa perqanakapaw allthapisïna. Rahab warmin utapajj murall patjjankchïnsa janiw allthapiskänti. Rahab warmimpi familiapampejj salvasipjjänwa, kuna laykutejj Jehová Diosaruw jupajj confiyäna.