Jan axsarir jaqi

UÑTAM aka jaqinakax uka waynar uñkatasaw larusipxi. ¿Khitïpachas uka waynaxa? Jeremiasawa, Diosan suma profetapawa.

Josiasax lurat diosanak tʼunthapkäna uka qhipatxa, Jehová Diosax profetajäñamatakiw uchsma sasaw Jeremiasar säna. Ukatsti profetäñatakixa wawäsktwa sänwa. Ukampis nayaw yanaptʼaskäma sänwa Jehová Diosaxa.

Jeremiasaxa, jan wali luräwinakam apanukxapxam sänwa israelitanakaruxa. ‘Yaqha markankirinakax yupaychasipki uka diosanakax inamayawa’ sänwa. Ukampis walja israelitanakax Jehová Diosar yupaychañat sipansa lurat diosanakaruw yupaychapxäna. Ukat Jeremiasaxa, lurapxatanakamatxa Diosax tukjapxätamwa sänwa. Uk istʼasax wal larusipxäna.

Walja maraw pasxäna. Josiasax jiwxänwa. Kimsa phaxsi jiwatapatxa Joaquim yuqapaw apnaqirjam uttʼayatäxäna. Jeremiasax israelitanakar saskakïnwa: ‘Janitï sum sarnaqapkätaxa Jerusalenax tʼunjatäniwa’ sasa. Sacerdotenakax Jeremiasar katuntasax akham sapxänwa: ‘Jeremiasax jiwañapawa; markas contraw parli’ sasa.

¿Jeremiasax kamachpachänsa? ¡Janiw axsarkänti! Taqiniruw akham säna: ‘Jehová Diosaw akham parlañajataki khitanitu. Janitï jan wali sarnaqäwinakama apanukupkätaxa, jupax Jerusalenxa tʼunjaniwa. Ukampis ak amtapxañamawa: jiwayapxitätaxa, jan juchan jaqiruw jiwayapxäta’ sasa.

Apnaqirin yuqanakapax janiw Jeremiasar jiwayapkänti, ukampis israelitanakax jan walinak lurasipkakïnwa. Uka qhipatxa Nabucodonosor sata apnaqiriw Babiloniat jutäna, ukat Jerusalenankirinakampiw nuwarasipxäna. Ukat israelitanakarux irnaqirinakapatakiw apasxäna. Waranq waranq jaqinak Babiloniar apapxäna. ¿Jumar ukham jan uñtʼat markar apapxiristamsti, kamsasmasa?