Diosajj Jeremiasaruw predikir khitäna

Jeremías chacharuw Jehová Diosajj Judá oraqen profetäñapatak ajllïna. Jeremiasajj uka markankirinakaruw predicañapäna, jan walinak jaytapjjañapatakiw ewjjañaparakïna. Ukampis Jeremiasajj akham sänwa: ‘Nayajj wawäsktwa, janiw jaqenak nayraqatan parlañs yatkti’ sasa. Jehová Diosajj sarakïnwa: ‘Jan ajjsaramti, nayaw yanapäma, nayaw kamsasas predicañama uk yatiyaskäma’ sasa.

Diosan mayitaparjamajja Jeremiasajj markan ancianonakapar tantachthapisajj jupanak nayraqatanwa ñeqʼet lurat mä yuru pʼakjañapäna, ukat akham sañaparakïnwa: ‘Jerusalenajj ukhamanwa uñjasiniʼ sasa. Jeremiasajj ukham luräna ukhajja, ancianonakajj wal colerasipjjäna. Yamas Pasjur sat mä sacerdotejj Jeremiasar nuwjänwa, cepo sat pʼiyanakani tablanakaruw amparanakapampi kayunakapamp achuntayäna. Jeremiasajj arum paqaraw jan onjjtañ puedkänti. Qhepüruw Pasjur sacerdotejj antutjjäna. Jeremiasajj akham sänwa: ‘Janiw aguantirjamäjjti. Janiw Diosat parljjäti’ sasa. ¿Cheqapunit Diosat jan parljjpachäna? Sum amuytʼasisajj akham sänwa: ‘Jehová Diosan arunakapajj ninjamaw chuymajan nakhitu. Janiw amuktʼkiristti, parlaskakiwa’ sasa. Ukatwa Jeremiasajj yatiyaskakïna.

Walja maranakatjja, yaqha reyiw Judá mark apnaqjjäna. Sacerdotenakarusa falso profetanakarus Jeremiasan yatiyäwipajj janiw gustkänti. Ukatwa principenakar akham sapjjäna: ‘Aka jaqejj jiwañapawa’ sasa. Jeremiasajj sarakïnwa: ‘Jiwayapjjetätajja, jan juchani jaqeruw jiwayapjjäta. Nayajj kuntï Jehová Diosajj siskitu ukakwa yatiytjja, janiw kuntï nayajj munkta uk yatiykti’ sasa. Uk istʼasasti principenakajj akham sapjjänwa: ‘Janiw aka jaqen jiwañapajj wakiskiti’ sasa.

Jeremiasajj predicaskakïnwa, ukatwa principenakajj wal colerasipjjäna, Jeremiasar jiwayañapatakiw reyir mayipjjarakïna. Reyisti ‘kuntï munapkta uk lurasipkakim’ sasaw säna. Ukatwa jiwañapatakejj katuntasin wali manqha uma phujur jaqontapjjäna, ukajj ñeqʼe phoqänwa. Jukʼat jukʼatwa Jeremiasajj ñeqʼer chhaqantaskäna.

Uk yatisasti, palacion serviri Ébed-Mélec sat jaqejj reyir akham sänwa: ‘Principenakajj mä phujuruw Jeremiasar jaqontapjje. Jan apskañänejj jiwaniwa’ sasa. Ukatwa reyejj Ébed-Mélec chachar akham säna: ‘30 chachanak irpasim, Jeremiasar uka phujut apsunipjjam’ sasa. Kunas kunäskpan Jeremiasajj predicaskakïnwa. ¿Janit jupjamäñ munkasma?