Mä angelaw Mariampi parli

AKA suma uñnaqtʼan tawaqux María satawa. Israelitänwa, Nazaret markanwa utjasïna. Diosax suma jaqïtapxa yatïnwa. Ukatwa Gabriel sat mä angelap khitanïna. ¿Gabriel angelax Mariar kamsänsa uk yattati? Uk yatxatañäni.

‘Aruntatätawa, Diosan suma uñjat warmi. Jehová Diosax jumampiwa’ sänwa Gabriel angelaxa. Mariax janiw uka jaqir uñtʼkänti. Ukat kunatsa ukham aruntpachïtu sasaw Mariax sustjasïna. Ukampis jan sustjasiñapatakix Gabrielaw arxayäna.

‘María jan axsaramti, Jehová Diosan munatätawa. Ukatwa jumax mä waw ususïta. Jesús sasaw sutiyarakïta’ sänwa.

Ukat Gabrielax akham sas qhanañchaskakïnwa: ‘Uka wawasti wali aytatäniwa, Alaxpach Diosan Wawapa satarakïniwa. Jehová Diosaw juparux apnaqirit Davitarjama uttʼayani. ¡Ukampis Jesusax wiñay apnaqirïniwa, ukat apnaqäwipasa janiw tukjatäkaniti!’ sasa.

‘¿Kunjamataraki ukhamaspasti?’ sasaw Mariax jisktʼäna. ‘¿Kunjamatsa jan chachanïkasax wawaniristxa?’ sänwa jupaxa.

‘Qullan ajayuw jumxar purini, ukatwa Diosan Wawapa satänixa’ sasaw Gabrielax säna. Ukat saskakïnwa: ‘Elisabet sata familiaramat parltʼañäni. Elisabetax wawanïñapatakix chuymanïxiw sapxän jaqinakaxa. Ukampis mä wawanïniwa. Ukhamax amuypachätawa, Diosatakix janiw kunas chʼamäkiti’ sasa.

Ukat Mariaxa, ‘¡nayax Jehová Diosan uywatapätwa! Kunjamtï siskta ukax phuqaspan’ säna. Ukat angelax sarxänwa.

Ukat jankʼakiw Mariax Elisabetar tumptʼir saräna. Elisabetax Mariar istʼäna ukhaxa, purakapankir wawax kusisiñat unxtänwa. Ukat Elisabetax qullan ajayumpi phuqtʼatänwa, ukat akham sasaw Mariarux säna: ‘Taqi warminakat sipansa jumax Diosan bendicitätawa’ sasa. Niya kimsa phaxsiwa Elisabetampi Mariax qamaräna, ukat Nazaretaruw kuttʼxäna.

Mariaxa José sat chachamp casarasiñatakïnwa. Ukampis kunapachatï Joseyax Marian usurïtap yatïna ukhaxa, janiw walïkaspati jupampi casarasiñax sänwa. Ukatwa Diosan mä angelapax akham säna: ‘Mariar warmit irptasiñxa jan axsaramti. Uka wawax Diosan Wawapawa’ sasa. Ukhamasti Mariampi Joseyampixa casarasxapxänwa, ukat Jesusan yuriñapwa suyapxäna.