Gabriel sat angelaw Mariar visittʼäna

Mariajj Galileanwa Nazaret markan jakäna, jupajj Elisabetan familiarapänwa. José sat mä carpinteromp casarasiñatak parlatarakïnwa. Elisabetajj sojjta phajjsi usurëjjäna ukhaw Gabriel angelajj Mariar uñstäna, ukat akham sänwa: ‘María kamisaki. Jumajj Jehová Diosan suma warmit uñjatätawa’ sasa. Kuntï angelajj sañ munkäna uk janiw Mariajj amuykänti, ukatwa angelajj akham qhanañchäna: ‘Jumajj usuriptätawa, mä yoqall wawa ususïta. Jesús sasaw sutiyäta. Jupajj Reyïniwa, Reinopasti wiñayatakirakïniwa’ sasa.

Mariajj akham sarakïnwa: ‘Nayajj janiw chachanïkti, ¿kunjamarak wawanïriststi?’ sasa. Gabrielajj akham sänwa: ‘Janiw kunas Jehová Diosatakejj chʼamäkiti. Espíritu santow jumjjar jutani, ukhamatwa wawanïyäta. Elisabet familiaramas usurirakiwa’ sasa. Mariasti sarakïnwa: “¡Nayajj Jehová Diosan esclavapätwa! Kuntï jumajj siskta ukajj nayan phoqaspan” sasa.

Mariajj Elisabet familiarapar visitiriw saräna, jupajj qollunak jakʼankir markanwa jakasïna. Ukaruw Mariajj purïna, arunttʼäna ukhajj Elisabetan purakapankkäna uka wawajj walpun onjjtäna. Espíritu santomp phoqtʼatäsajja, Elisabetajj akham sänwa: ‘María, Jehová Diosaw bendistamjja. ¿Khitirakït nayasti, Mesiasan mamapajj nayan ukar visitir jutañapatakisti?’ sasa. Mariasti sänwa: ‘Nayajj Jehová Diosaruw taqe chuymajamp jachʼañchta’ sasa. Mariajj kimsa phajjsiw Elisabetamp quedasïna, uka qhepatwa Nazaretankir utapar kuttʼjjäna.

Joseajj Marian usurïtap yatïna ukhajja, janiw casarasiñ munjjänti. Ukatwa mä angelajj samkan uñstäna, akhamwa säna: ‘Mariamp casarasiñ jan ajjsaramti. Jupajj janiw kuna jan walsa lurkiti’ sasa. Ukhamasti Joseajj Mariampiw casarasjjäna utaparuw apasjjarakïna.