Wawäkasin Diosan utapar sari

JACHʼA jaqinakampi parlaski uka waynitur uñtma. Jerusalenanxa uka jaqinakaw Diosan utapan yatichapxäna. Uka waynitusti Jesusawa. Jachʼäxiwa. 12 maranïxiwa.

Jesusax Diosa tuqitsa Biblian qillqatäki uka tuqitsa wal yatïna, uk amuyasax wal yatichirinakax muspharapxäna. Ukampisa, Joseyampi Mariampix janirakis akankapkitixä. ¿Kawkinkasipkpachänsa? Yatxatañäni.

Sapa marawa Pascua amtañataki Joseyax familiapampi Jerusalenar sarapxäna. Wali jayänwa Nazaretat Jerusalenkamaxa. Ukapachax janiw autosa trenasa utjkänti. Kayukiw sarapxirïna, ukhamasti Jerusalenarux kimsürutwa puripxäna.

Joseyax walja wawanakanïxänwa. Ukhamasti Joseyax Jesusan sullkanakapar uñjañapänwa. Joseyampi Mariampixa Jerusalenat Nazaretaruw wawanakas irptʼasita kuttʼxapxäna. Jupanakampi chikasti waljanirakiw kuttʼxapxäna, ukatwa Joseyampi Mariampixa Jesusax jupanakamp chikaw jutaskpacha sapxänxa. Ukat jaypʼux Jesusaruw thaqtapxäna. ¡Familiaranakap ukhamaraki uñtʼatanak taypin thaqtapxäna, janiw ukankänti! Ukhamasti Jerusalenaruw thaqtir kuttʼanipxäna.

Diosan utapanwa jikxatapxäna. Yatichirinakaruw ischʼukiskäna ukat jisktʼaskäna. Ukat taqiniw Jesusan yatiñapat wal muspharapxäna. Ukampis Mariax akham sänwa: ‘Ay wawa, ¿kunatarak ukham lurapxistasti? Tatamampi nayampix wali llakitaw thaqhapxsma’ sasa.

‘¿Kunatsa thaqhapxista?’ ‘¿Janit yatipkayäta, Awkijan utapankañajxa?’ sasaw Jesusax säna.

Jïsa, Jesusax Diosat yatiqañwa wal munäna. Jiwasax ukhamäpxarakiñasawa, ¿janichä? Nazaret markanxa, Jesusax sapa semanaw yupaychañatak tantachäwinakarux saräna. Kunattix jupax uka tantachäwinakanxa sum istʼirïna, taqi kunwa Bibliat yatiqirïna. Jesusat yatiqasipxañäni.