Apnaqirjamaw Jesusax manti

MAYJASIRI pä juykhunakar qullasaxa Jesusax Jerusalén jakʼankir mä jiskʼa markaruw purïna. Ukat pä arkirinakaparuw akham säna: ‘Aka markar mantapxma, ukat mä asno qallwa jikxatapxäta. Uk jararasin jisktanirapipxita’ sasa.

Uka asno jisktanipxäna ukhaxa, Jesusaw ukar latʼxatawayäna. Ukham latʼxatataw Jerusalén markar mantäna, janiw jayäxänti. Kunapachatï markar jakʼachasïna ukhaxa walja jaqinakaw katuqir mistunipxäna. Niya taqiniw isinakap thakir jantʼaktʼarapipxäna. Yaqhipanakasti palmera ramanakwa jantʼaktʼarapipxäna, ukat akham sapxänwa: ‘¡Jehová Diosan sutipampi jutki uka apnaqirixa Diosan bendicitäpan!’ sasa.

Khuri nayrapachanakanwa, machaq apnaqirit uttʼayatanakaxa asnor latʼxatat Jerusalenar mantapxirïna jaqinakampi uñtʼayasiñataki. Ukhamwa Jesusax mantäna. Akankaski uka jaqinakaxa Jesusan apnaqirïñap munapxatapwa uñachtʼayapxäna. Ukampis janiw taqini munapkänti. Jesusax Diosan utapar sarkäna ukhax kamachapxänsa ukaw ukxa sum qhanañchistu.

Diosan utapanxa Jesusax juykhunakar suchʼunakaruw qulläna. Wawanakax uk uñjasax Jesusaruw jachʼañchapxäna. Ukat sacerdotenakax wal colerasipxäna, ukat akham sasaw Jesusar sapxäna: ‘¿Aka wawanakax kuns sasipki uk istʼtati?’ sasa.

‘Jïsa, istʼasktwa. ¿Janit jumanakax qullan qillqatanakanxa: “Wawanakan lakapatwa Diosax jachʼañchäwinak mistuyani” sas qillqat liytʼapkta?’ sänwa Jesusaxa. Ukhamasti Diosan churata apnaqirirux wawanakax jachʼañchasipkakïnwa.

Jiwasanakax uka wawanakjamarakïñasawa, ¿janichä? Inas yaqhip jaqinakaxa Diosan apnaqäwipat parlañ jarkʼchistaspa. Ukampis jiwasanakax parlaskakiñäniwa kuntï Jesusax jaqinak layku lurkani uka tuqinakatxa.

Kunapachatï Jesusax aka Uraqinkkäna ukapachaxa janïraw apnaqañ qalltkänti. ¿Kunapachatsa apnaqañapäxänxa? Uka tuqitwa arkirinakapax yatiñ munapxäna. Uka tuqit jichhax liytʼañäni.