Mä asnow parli

ASNOW parlatayna siri ¿istʼirïtati? ‘Janiw animalanakax parlapkiti’ sasmawa. Ukampis mä qachu asnow parlatayna siw Biblianxa. Kunatsa parlpachäna uk yatxatañäni.

Israelitanakax Canaán uraqir mantañatakix niyaw wakichatäxapxäna. Ukat Moab markan Balac sat apnaqiripaw israelitanakar axsaräna. Ukat Balaam sat chʼikhi jaqiruw jawsayäna, israelitanakar ñanqhachañapataki. Walja qullqi churäma sasaw säna, ukatwa Balaamax Balacan ukar saräna.

Jehová Diosax janiw markapar Balaaman ñanqhachañapxa munkänti. Ukatwa, espadasa aytʼasita mä angelar khitäna, chika thakin saytʼañapataki, Balaamar jarkʼtʼañapataki. Balaamax janiw angelar uñjkänti, asnopakiw uñjänxa. Asnox janiw angelar jakʼachasiñ munkänti, ukatwa thakir ikitattäna. Balaamax wal colerasïna, ukatwa asnoparux lawamp jawqʼjäna.

Ukatxa, Jehová Diosaw qachu asnopas Balaamar parlkaspa ukham istʼayäna. ‘¿Kunatsa jawqʼista, kunsa nayax kamachsma?’ sasaw asnox jisktʼäna.

‘Sonsjamaw sarnaqayista, cuchillonïristxa añchhitpachaw jiwayirisma’ sasaw Balaamax säna.

‘¿Nayrax ukham lurirïsmati?’ sasaw asnox sarakïna.

‘Janiwa,’ sasaw Balaamax säna.

Ukat Jehová Diosax Balaamaruw nayraqatapankaskir angelar uñjayäna. Angelax akham sänwa: ‘¿Kunatsa qachu asnomar jawqʼjta? Nayaw thak jistʼantiri jutta, janiw Israel markar ñanqhachir sarañamäkiti. Asnomatï makataskakitasapänxa, nayax jiwayirisamänwa, ukampis janiw asnomarux kunas paskasapänti’ sasa.

Balaamax sänwa: ‘Juchajawa. Janiw yatkayätti aka chika thakinkatamxa’ sasa. Angelax janiw jarkʼxasxänti, Balaamax Balacan ukar saraskakïnwa. Purisax Israel markar ñanqhachañ yantʼaskakïnwa, ukampis Jehová Diosaw kimsa kut Israel markar bendiciyäna.