Mä asnow parli

Israelitanakajj niya 40 maranakaw wasarankjjapjjäna. Wali chʼamani markanakaruw atipjapjjäna. Jichhajj Moab pampanwa carpanakap uttʼayapjjäna, Jordán jawirat inti jalsu toqena. Suma Oraqer mantañatakis jukʼakiw faltjjäna. Ukhasti Moab markan Balac reyipajj ‘israelitanakaw oraqej aparitani’ sasaw wal ajjsarayasïna. Ukatwa Balaam sat jaqerojj Moab markar jawsayäna, ukhamat israelitanakar maldisiñapataki.

Ukampis Jehová Diosajj Balaamar akham sänwa: ‘Janiw israelitanakar maldisiñamäkiti’ sasa. Ukatwa Balaamajj jan sarañ munkänti. Balac reyejj mayampiw jawsayäna, ‘kuntï munkta ukwa churäma’ sasaw sarakïna, ukampis Balaamajj janiw sarañ munkänti. Ukatjja Diosajj Balaamar akham sänwa: ‘Saräta ukhajj kuntï siskäma ukakwa parläta’ sasa.

Balaamajj qachu asnopatwa Moab markar saräna. Jehová Diosajj janiw maldisïtati siskchïnsa, israelitanakar maldisiñ amtampiw saräna. Ukatwa Diosan angelapajj kimsa kuti thakin uñstäna. Janis jupajj uñjkchïnjja, asnopajj uñjänwa. Nayrïr kutinjja, asnojj thakit saraqasaw mä campor mantäna. Payïr kutinjja, asnojj perqar jitkatasaw Balaaman kayup perqar usuchjäna. Qhepatjja, oraqeruw liwitattäna. Kimspach kutinwa Balaamajj mä lawamp asnor jawqʼjäna.

Ukatwa Jehová Diosajj asnor parlayäna. Asnojj akham sasaw Balaamar jisktʼäna: ‘¿Kunats jawqʼesta?’ sasa. Balaamajj sarakïnwa: ‘Ukham lurasajj jan amuytʼasir jaqerjamaw uñjayista. Mä espadanirista ukhajj jiwayirismawa’ sasa. Asnosti sänwa: ‘Walja maranakaw nayajj jumar qʼepnaqjjsma, ¿nayrajj ukham lurirïsmati?’ sasa.

Ukatsti Jehová Diosan yanaptʼataw Balaamajj angelar uñjäna. Angelajj akham sänwa: ‘Janiw israelitanakar maldisïtati sasarakis Jehová Diosajj sistamjja’ sasa. Balaamasti sarakïnwa: ‘Cheqas sarasajj pantjastwa. Jichhajj utajaruw sarjjäjja’ sasa. Ukampis angelajj akham sänwa: ‘Moab markar saräta ukhajj kuntï Diosajj siskätam ukakwa parläta’ sasa.

¿Balaamajj istʼasirïñ yateqpachänti? Janiwa, qhepatjja kimsa kutiw israelitanakar maldisiñ yantʼäna. Ukampis uka kimsa kutinjja, maldisiñat sipansa Jehová Diosajj bendisiyänwa. Qheparojj israelitanakajj Moab markaruw atacapjjäna, ukanwa Balaamajj jiwäna. Jupajj qalltatpach Jehová Diosar istʼaspäna ukaw jukʼamp walïspäna, ¿janicha?