Jerusalenan suyapxi

AKA jaqinakax Jesusan arkirinakapawa. Jesusar istʼasaw Jerusalenan qhiparapxäna. Uka utan taqinis suyasipkäna ukhaw mä jachʼa thayan thaytʼatapjam istʼasïna, ukat uka utaruw phuqantäna, ukat jankʼakirakiw chhaqtawayxäna. Ukatxa sapa maynin pʼiqipxaruw mä laxrar uñtata ninanakax uñstäna. ¿Sapaqatan nin nakhaskir uñjtati? ¿Kamsañs ukax muni?

¡Mä milagrünwa! Jesusax wasitampiw alaxpachan Awkipampïxäna, ukat arkirinakaparuw Diosan qullan ajayup apayanïna. ¿Kun lurañsa qullan ajayux yanaptʼpachäna uk yattati? Jupanakax taqiniw yaqha arunaka parlapxäna.

Walja jaqinakarakiw Jerusalenatxa jachʼa thayjam istʼasin chhukthapinipxäna, kunas pasän uk yatiñataki. Yaqhip jaqinakax israelitanakan Pentecostés fiestap amtiriw yaqha anqa markanakat jutapxäna. ¡Wal uka jaqinakaxa muspharapxpachäna! Kunattix Jesusan arkirinakapax uka jaqinakan arunakapatwa Diosan luratanakapatxa qhanañchapxäna.

Jayat jutir jaqinakax akham sapxänwa: ‘Aka jaqinakax Galileankir jaqinakarakisä. Ukhamasti, ¿kunjamataraki jupanakasti markanakasan parlat arunaksti parlapxisti?’ sasa.

Uk qhanañchañatakixa Pedrow saytʼäna. Kunjamsa Jesusar jiwayapxäna ukat kunjamsa Jehová Diosax jaktayäna uka tuqitwa Pedrox jachʼat yatiyäna. ‘Jichhax Jesusax alaxpachan Diosan kupïxapankxiwa’ sasa. ‘Diosan arsutaparjamaw qullan ajayu Jesusax apayani. Ukatwa aka milagronakax lurasi’ sasa.

Pedron arunakap istʼasaxa, Jesusan tʼaqhisitapatxa wali llaktʼataw walja jaqinakax uñjasipxäna. ‘¿Kun lurapxañajasa?’ sasaw jisktʼapxäna. Pedrox akham sänwa: ‘Jan wali luräwinakam apanukupxañamawa ukat bautisasipxañamawa’ sasa. Uka urpachawa 3.000 jaqinakax bautisasipxäna ukhamatwa Jesusan arkirinakapäxapxäna.