Discipulonakajj espíritu santo katoqapjjäna

Jesusajj alajjpachar sarjjäna uka urutjja tunka urunakaw pasjjäna, ukhaw discipulonakajj espíritu santo katoqapjjäna. Uka urojj Pentecostés Fiestänwa, 33 marana. Walja lugaranakatwa jaqenakajj Jerusalén markar uka fiestatak purintapjjäna. Jesusan mä 120 discipulonakapajj mä altus utanwa tantachasisipkäna, ukhamaruw wali musparkañajj pasäna. Sapa discipulon pʼeqepjjaruw mä ninajj uñstäna, yaqha arunakwa parlañ qalltapjjarakïna. Ukhamarus wali chʼamani thayaw uka utan suynarakïna.

Jerusalenar jaya markanakat sarapkäna uka jaqenakajja, suynir istʼasajj jankʼakiw uka utar tʼijupjjäna. Jesusan discipulonakapar yaqha arunak parlir uñjasajj wal musparapjjäna. Akham sapjjarakïnwa: ‘Aka jaqenakajj Galileatäpjjewa, ¿kunjamatarak yaqha arunak parlapjjesti?’ sasa.

Ukhamaruw Pedrompi mayni apostolonakampejj taqe jaqenak nayraqatan saytʼasipjjäna. Pedrojj akham sasaw qhanañchäna: ‘Jumanakaw Jesusar jiwayapjjtajja, ukampis Jehová Diosaw jupar jaktayi. Jichhajja Jesusajj alajjpachan Diosan kupëjjapankaskiwa. “Churapjjämaw” sapkitäna uka espíritu santo apayanipjjarakitu, ukatwa aka milagronak jumanakajj istʼapjjta uñjapjjarakta’ sasa.

Jaqenakajj wal musparapjjäna. Pedron arunakapajj uka jaqenakan chuymaparuw purtʼäna, ukatwa akham jisktʼapjjäna: “¿Kun lurapjjañajas wakisispa?” sasa. Pedrosti sarakïnwa: ‘Juchanakamat arrepentisipjjam, sapa maynis Jesucriston sutipjjar bautisasipjjam. Ukatjja espíritu santo katoqapjjäta’ sasa. Mä 3.000 jaqenakaw uka urojj bautisasipjjäna. Uka urutwa Jerusalenan walja discipulonakajj jiljjattäna. Espíritu santon yanaptʼapampejja apostolonakajj walja congregacionanakwa uttʼayapjjäna. Kuntï Jesusajj yatichkäna taqe ukanakwa machaq discipulonakar yatichapjjäna.