Damasco thakina

¿KHITIS uraqin jaqusiski uk yattati? Saulo satawa. Jupaw Estebanar qalamp kʼupjiri jaqinakan isinakapxa uñjaskäna. ¡Wal kʼajtaski uk uñtma! ¿Kunas kamachaski?

Estebanan jiwatapatxa, Saulox Jesusan arkirinakapar jan wali lurañatakiw thaqhir saräna. Utanakar mantasinxa Jesusan arkirinakapar qatatsusinwa carcelar katuntayäna. Ukatxa Jesusan walja arkirinakapaw yaqha markanakar sarxapxäna, ukatsti uka markanakanwa “suma yatiyäwinak” yatiyapxäna. Ukampis Saulox uka markanakaruw Jesusan arkirinakapar thaqhiri saräna. Akanxa Damascoruw saraskäna, ukat thakinxa akham muspharkañaw pasäna:

Akatjamat mä jachʼa qhanax Saulorux alaxpachat qhanxatäna. Jupax uraqiruw jaqnuqtäna, kunjamtï akan uñjasiski ukhama. Ukat mä aruw akham säna: ‘¡Saulo, Saulo! ¿Kunatsa arknaqista?’ sasa. Saulompi chikaskäna uka jaqinakax jachʼa qhanxa uñjapxänwa ukat uka arxa istʼapxarakïnwa ukampis janiw kun sañs muni ukxa amuyapkänti.

‘¿Khitïtas Tata?’ sänwa Sauloxa.

‘Khitirutï arknaqkta uka pachpa Jesusätwa’ sänwa uka aruxa. ¿Kunatsa ukham säna? Kunattixa, jan walinak Jesusan arkirinakapar Saulox lurkäna ukhaxa, Jesusarus uk lurkaspa ukhamänwa.

Ukat Saulox akham sasaw jisktʼäna: ‘¿Tata, jichhax kun lurañajsa munta?’ sasa.

‘Sartam ukat Damascor mantma. Ukanwa kunatix lurañamäki uk yatisïta’ sänwa Jesusaxa. Kunapachatï Saulox saytʼäna ukhaxa janiw kuns uñjkänti. ¡Juykhuptänwa! Ukatwa, jupampi chikaskäna uka jaqinakax Damascor irpapxäna.

Ukat Jesusax Damascon mä arkiriparuw akham säna: ‘Sartam Ananías, Chiqapa satäkis uka caller sarma. Judasan utapan Saulo sat jaqiruw thaqtäta. Yanapirijatakiw ajllista’ sasa.

Iyaw sasaw Ananiasax saräna. Kunapachatï Saulor uñjäna ukhaxa, luqxatasaw akham säna: ‘Jesús Tataw khitanitu wasitat uñjxañamataki, qullan ajayun phuqtʼatäñamataki’ sasa. Ukaratpacharakiw Saulon nayranakapatxa sillpʼinakjama willirtxäna, ukat wasitatwa uñjxäna.

Yaqha markanakar yatiyir sarañatakix Saulox wal yanaptʼäna. Apóstol Pablot uñtʼatäxarakïnwa, jupatxa jukʼamp yatxataskañäni. Ukampis Pedrox Diosan aruparjam kuns luratayna uk nayraqat yatxatañäni.