Jesusajj Sauloruw ajllïna

Saulojj Tarso markan nasïna, ukhamajj romano jaqënwa. Jupajj fariseorakïnwa, judionakan leyinakap wali sum uñtʼäna. Cristianonakarojj wal uñisïna, utanakapat qatatisaw cristiano chachanakarusa warminakarus carcelar llawintirïna. Jupa nayraqatanwa Esteban sat discipulorus wali colerat jaqenakajj qalamp jaqjas jiwayapjjäna.

Saulojj Jerusalenankir cristianonakar preso katuntkasasa, janiw contentaskänti. Ukatwa Damasco markankir cristianonakar katuntaniñatakejj jachʼa jilïr sacerdoter permiso mayïna. Saulojj Damasco markar jakʼachasjjäna ukhajja, akatjamatwa mä qhanajj jupjjar wal qhantʼanïna, jupasti oraqeruw liwnoqtäna. Ukatjja mä aru istʼarakïna, akham siri: ‘Saulo, ¿kunatsa arknaqesta?’ sasa. Saulojj ‘¿khitïtasa?’ sasaw jisktʼäna. Arojj akham sänwa: ‘Nayajj Jesusätwa. Jichhajj sartasin Damascor saram, ukanwa kunsa lurañama uk sapjjätam’ sasa. Ukaratpachaw Saulojj juyktʼjjäna, amparatwa markar wayupjjarakïna.

Damasconjja Ananías sutini mä suma cristianow jakäna. Jesusajj mä visionanwa jupar akham säna: ‘Recta sat callenkki uka Judasan utapar saram, Saulor thaqtanim’ sasa. Ananiasajj akham sänwa: ‘Tata, uka jaqet kunayman parlir istʼta. Jupajj discipulonakamaruw carcelar llawintayaski’ sasa. Ukampis Jesusajj akham sänwa: ‘Jumajj saraskakim, Diosan suma yatiyäwinakap walja markanakan predicañapatakiw nayajj Saulor ajllista’ sasa.

Ukatwa Ananiasajj Saulon ukar sarasin akham säna: ‘Saulo, jilata, Jesusaw mayamp uñj-jjañamatak khitanitu’ sasa. Ukspachaw Saulon nayranakapajj uñj-jjäna. Ukatsti Jesusjjatwa yatjjatäna, arkiriparuw tukjjarakïna. Bautisasjjasajj cristiano masinakapampiw sinagoganakan predicañ qalltäna. Saulor Jesusjjat yatichir uñjasajja judionakajj wal musparapjjpachäna. Ukatwa judionakajj akham sasin jisktʼasipjjäna: ‘¿Janit aka jaqejj Jesusan discipulonakapar uñisiñat arknaqkäna uka jaqëki?’ sasa.

Kimsa maraw Damasco markankir jaqenakarojj predicäna. Ukatwa judionakajj wal uñisipjjäna, jiwayañwa amtapjjarakïna. Uk yatisaw jilat kullakanakajj escapañ yanaptʼapjjäna. Markan jachʼa muralla utjkäna uka ventanatwa mä canastar warkoqapjjäna.

Saulojj Jerusalenar purïna ukhajja, discipulonakaruw jakʼachasiñ munäna. Ukampis jilat kullakanakajj wal jupar ajjsarapjjäna. Ukatwa Bernabé sat mä suma discipulojj apostolonakan ukar Saulorojj irpäna, cheqapun suma jaqëjjatapwa qhanañcharakïna. Saulojj Jerusalenankir congregacionampiw mayachasjjäna, taqe chuymarakiw Diosan suma yatiyäwinakap predicañ qalltäna. Tiempompejja Pablo satäjjänwa.