1 yatichäwi
¿Chiqapuniti Diosax sum jakasiñas munpacha?
1, 2. ¿Kunsa jaqinakax Diosat jisktʼasipxi, ukat kunatsa?
INAS jumax ukham jisktʼasirïsta: “Sum jakasiñas munir Diosatï utjchixa, ¿kunatsa tʼaqhisiñanak jan tukjpacha?”, sasa. Taqiniw ukham tʼaqhisiñanakan uñjastanxa jan ukax yaqhanakar tʼaqhisirsa uñjtanxa.
2 Jïsa, nayratpachaw chʼaxwäwinakasa tʼaqhisiñanakasa lunthatasiñanakasa jan walinakasa pisin jakasiñas utjawayi, ukat familiaranakax jiwxapxi ukhaxa, wali llakitaw uñjastanxa, jaqinakax ukham jan walinakan uñjasiwayi. Patak millón jukʼamp jaqinakaw jachʼa chʼaxwäwinakanxa 1900 maranakanxa jiwarawayapxi. Yaqhanakasti usuchjata, jan utani ukat jan yänakani ukhamaw uñjasiwayapxi. Jichha tiemponakanxa walja muspharkañ jan waltʼäwinakarakiw jaqinakarux jachañansa tʼaqhisiñansa uñjasiyaraki.
3, 4. Diosax tʼaqhisiñanak jan tukjatapatxa, ¿kunsa jaqinakax amuyapxi?
3 Wali llaktʼataw jaqinakax akham amuyapxi: “Diosatï utjchixa, janiw sum jakasiñas munkiti” sasa. Jan ukax janiw Diosax utjkiti sasaw yaqhanakax sapxaraki. Amuytʼañataki, Nayrïr Jachʼa Chʼaxwäwinxa maynix yaqha kasta jaqïtap laykuw arknaqat uñjasitayna ukat wali munat familiaranakapasa masinakapas jiwapxatayna, ukatwa akham sas jisktʼasïna: “Kunapachatï yanap munkäyat ukhaxa, ¿kawkinkäns Diosaxa?” sasa. Alemania markankir soldadonakax Payïri Jachʼa Chʼaxwäwin jaqinakar jiwarayapkäna ukhaxa, mä jaqix uka jan walinak uñjasax akham sasaw satayna: “wali llakitaw chuymajan jikxatasta” sasa.
4 Kunjamtï uñjktanxa, kunatsa munasir Diosax jan walinak ukhamak uñjaskpacha ukxa, waljaninakaw jan sum amuyapkiti. Ukatwa, Diosax janiw utjkiti, utjchisa janiw sum jakasiñas munkiti sasin sapxi. Tʼaqhisiñanakax utjañapapuniwa, sasaw yaqhipax sapxaraki.
[2, 3 jananakan fotopa]
Niyaw paraison jakasxañäni, janiw tʼaqhisiñax utjxaniti