2 yatichäwi
Janiw tʼaqhisiñax utjxaniti
1, 2. ¿Kunsa yaqhipax amuyapxaraki?
UKAMPISA, Uraqpachanwa waranq waranqa jaqinakax mayj amuyapxi. Jutïrinxa wali sum jakasipxañäni sasaw sapxi. Ukat aka Uraqinxa janirakiw jan walinakas tʼaqhisiñanakasa utjxaniti sasaw sapxaraki. Niyaw jan walinakax tukusxani ukat wiñayatakiw Uraqix sumäxani, sasaw taqi chuym suyasipki. ¡Jichjatsa uka machaq Uraqix uttʼayaskaspa ukham amuyapxi!
2 Machaq Uraqinxa janiw chʼaxwäwinakasa tʼaqhisiñanakasa lunthatanakasa jan walinakasa ni pisinkañasa utjxaniti, janiw usunakasa usuyasiñasa jachañasa ni jiwañasa utjxaniti, sasaw sapxaraki. Uka tiemponxa, jaqinakax janiw juchanïxapxaniti ukat wali sum wiñayatak mä paraison jakasxapxani. Jïsa, ¡jiwatanakasa jaktayatäpxaniwa ukat wiñayatakiw jakasxapxarakini!
3, 4. ¿Kunatsa uka jaqinakax ukham amuyunakar atinisipxi?
3 ¿Ukham jutir urunakat amuyañax mä samkakïpachati? Janiwa; janiw mä samkäkiti. Uka Paraisox utjaskapuniniwa (Hebreos 11:1). ¿Kunatsa utjaskapuniniwa sistanxa? Kunattix taqi chʼaman Luririsaw ukham arsuwayi.
4 Diosan arsüwipatxa akham siw Bibliaxa: “Diosasti taqi suma arunakapwa jumanakampi phuqhi, kunjämtï jupax arsüna ukhama. Janiw kuna arunakapas jan phuqhasisax pasawaykiti”. “Janiw Diosax jiwir jaqinakjamäkiti. [...] Kunapachatix jupax kunsa arsu ukkhax lurapuniwa. Kunapachatix kunsa arupampix arsu ukkhax phuqhapuniwa.” “Taqi chʼamani Tatitusti juramentompiw arsu.” “Janiw qhipar kuttañax utjkiti, kuntix amtkta ukax phuqhasipuniniwa, kunjamarutix amtkta ukax lurasipuniniwa” sasa (Josué 23:14; Números 23:19; Isaías 14:24).
5. ¿Kuna jisktʼanakarus qhanañchasiñapa?
5 Chiqpachansa, Diosax qalltatpachaw jan tʼaqhisiñan Paraíso utjayañ munäna, ukhamasti, ¿kunatsa jan walinak jan tukjpachäna? Jichhakamax 6.000 maranakäxiwa, ukampis ¿kunatsa jichhakam jan walinak askichañatakix suyaskpacha? Uka jan walinak askichatapatxa ¿Diosax jiwasat armaspachati, jan ukax janich utjpacha?