Tʼaqhisiñax niyaw tukusxani
Inas jumax akham jisktʼasirïsta, “¿kunatsa ukham sinti tʼaqhisiñanakax utjpacha?” sasa. Jaqinakax waranq waranq maranakaw chʼaxwäwinakansa, pisinkañanakansa, jan waltʼäwinakansa, ñanqha luräwinakansa, ina chʼusat tʼaqhisiñanakansa, usuntañanakansa, jiwañansa tʼaqhisit uñjasipxi. Ukat jichha 100 pasir maranakanakwa jukʼamp tʼaqhisiñanakax jilxattawayi. Ukhamaxa, ¿tukuspachänit uka jan waltʼäwinakaxa?
Jïsa ¡ukhamäniwa! ukat jankʼakirakiw phuqasini. Diosan Arupanxa akham siwa: “Ñanqha lurir[ix] [...] chhaqtxaniwa, llampʼu chuymaninakasti uraq katuqapxani, jilarkir sumankañampiw kusisipxarakini”. ¿Ukax qhawqha tiempotakïnisa? Uka tuqitxa Bibliax sarakiwa: “Aski jaqinakax uraq katuqapxani, wiñayatakiw ukan jakapxarakini” sasa (Salmo 37:10, 11, 29).
Diosax tʼaqhisiñanaka ukat jan waltʼäwinaka chhaqtayxani ukhaxa, Uraqpachaw mä paraisor tukuyatäni, ukanxa taqiniw kusisita jan usuntasa wiñayatak jakapxani. Ukat Bibliax akham siwa: “Diosax taqi jachanakapwa nayranakapatxa picharani, janirakiw jiwañas, jachañas utjkxaniti, warariñasa ni usuyasiñasa” sasa (Apocalipsis 21:4).
Uka machaq uraqinwa jiwatanakax jaktanipxani ukhamat jupanakax askinak katuqapxañapataki. Bibliaxa siwa, ‘jiwatanakat ñanqha jaqinakansa, aski jaqinakansa jaktanipxaniw’ sasa (Hechos 24:15). Ukatwa Jesucristox mä ñanqha jaqirux arrepentisitapatsa jupar iyawsatapatsa akham satayna: “Jumax nayampi chika[w] paraisonkxata” sasa (Lucas 23:43).
¿Kunatsa tʼaqhisiñax qalltawayi?
Niyakixay jutïritaki Diosan amtanakapax taqi jaqinakatakis wali askïchïnxa, ¿kunatsa tʼaqhisiñanaka jichhakam utjayaskakpacha?
Diosax Adanampir Evampir lurkatayna ukhaxa, amuyunsa janchinsa jan juchanwa luratayna. Mä suma irnaqäwi churäna ukat mä suma huerto chiqaruw ucharakitayna. Bibliax akham siwa: “Diosasti taqi kuntix lurkän ukanakan sumätapwa uñjäna” sasa (Génesis 1:31). Jupanakatï Luriripar istʼapxaspänxa wawanakapax janiw juchanïpkaspänti, ukat aka Uraqpachawa mä suma paraisor tukuyatäxasapänxa, jaqinakas sumankañanwa wali kusisita wiñayatak jakapxaspäna.
Diosax Adanampir Evampiruxa mä aski churäwi jaytäna, ukax taqi kuns chuymaparjam lurañapatakïnwa, mä arunxa, amtaparuw kuns lurapxañapäna. Janiw mä autjamäpxañapäkänti ukhamat mä qʼiwirin munañaparjam apnaqayasiñatakixa. Ukampisa kusisit sarnaqasipkakiñapatakixa, kuna amtampitï luratäpkänxa ukarjamaw kuns lurapxañapäna, ukat Diosan kamachinakaparjamaw istʼapxañaparakïna. Dios pachparakiw akham saraki: “Nayätwa [Jehová] Tatitu Diosamaxa, nayasti kunatix jumatakix askïki ukwa yatichsma, kawki thakinjamtix sarañamäki ukanjam irparaksma” sasa (Isaías 48:17). Chuymanakaparjamak jan wal sarnaqasaxa sinti jan waliruw puripxasapäna, kunattix jaqinakax janiw jan Diosan apnaqat sarnaqapxañapatak luratäpkiti. Bibliax siwa: “Jaqix janiw alaskiti pachpa jakañapxa, janirakiw tukuyäwipsa munañapar apnaqkaspati” sasa (Jeremías 10:23).
Nayrïr awk taykasaxa Diosar jan istʼasaxa kusisit jakasipkaspas ukham amuyapxäna, ukat ukax jan walitakïnwa. Ukampis Diosamp jan apnaqayasiñ munasaxa yanaptʼap aptʼawayapxi, ukatwa juchanïxapxäna. Ukhamat aynachtʼawayapxäna ukat chuymankipstasas jiwañar puripxarakïna. Jiwasax nayrïr awk taykasat jutatasatwa juchsa ukat jiwañsa katuqawayaraktanxa (Romanos 5:12).
Diosan apnaqäwiparuw qallasiwayäna
¿Kunats Diosax Adanarus Evarus ukjpach tʼunjasax jan wasitat yaqha chacha warmi lurkpachäna? Jehová Diosax taqi kunxar munañaniwa, ukaruw qallasipxatayna mä arunxa apnaqäwiparuw qallasipxatayna. Akham sasaw qallasipxäna: ¿khitikis apnaqañapaxa, ukat khitikirakis yäpar apnaqaspa? Ukhamaxa, ¿Diosan apnaqäwipat jithiqtasax wali sumti qamasipxaspäna? Diosax jaqinakar tiempo churäna munañanakaparjam sarnaqapxañapataki, ukhamatwa Diosan apnaqäwipati jan ukax jupanakan apnaqasitapach askix uk amuyapxañapänxa, ukwa Diosax jan mayampitak uñachtʼayañ munäna. Jan Diosan yanaptʼatax kunjamakis política tuqitsa, alakip tuqitsa yupaychäw tuqitsa apnaqasipxaspäna uk uñachtʼayañatakix tiempow munasïna.
¿Kunjamakis apnaqasiwayapxixa? Ukham waranq waranqa maranak jaqin apnaqäwinakapax kunayman jan walinak utjatappunwa uñachtʼayi. Ukampis 1900 pasïr maranakanxa jukʼamp jan waltʼäwinakaw utjawayi, walja millón millón jaqinakaw jiwarapxäna (holocausto), ukat 100 millón jaqinakaw chʼaxwäwinakanxa jiwarapxaraki. Ukat jichhürunakanxa lunthatasiñasa, nuwasiñanakasa sapürutjam utjaskakiwa. Ukat droga sat qullanakamp qulljasirinakax jukʼampiw jilxattasipkaki. Maynimp maynimp ikintasisa jan ukax maynimp jan wal sarnaqasaxa kunayman usunak apkatasipxi, ukham usuntirinakax jilxattaskakirakiwa. Manqʼat tʼaqhisiñanakasa usuntañanakas sapa maraw waljanir jiwarayi. Taqi chiqanwa familian sum jakasiñax aynachtʼawayxaraki. Ukampis janipuniw khitis uka jan waltʼäwinakxa askichkiti, ukhamätapxa sum amuyasxaraki. Janipuniw khitis chuymankipstañarusa, usunakarusa ukat jiwañarusa atipkarakiti.
Kunjamtï jichhürunakax jaktanxa ukanakax Biblian qillqatapunïxänwa. Akapachan tukusiñap “qhipa urunakanxa jan wali tiemponakaw” utjani sasaw Bibliax qhanañchi. “Ukampis jan wali jaqinakax ukhamarak sallqjirinakasa jan walit jukʼamp jan waliruw sarapxani” siski uka arunakaxa Bibliarjamaw phuqasiskaraki (2 Timoteo 3:1-5, 13).
Niyaw tʼaqhisiñax tukusxani
Diosat jithiqtas jan apnaqayasis sarnaqañaxa janiw utjxaniti, taqi kuntï uñjktan ukanakaw niya ukhamätapxa uñachtʼayarakistu. Diosat jithiqtat jaqinakaxa janipuniw apnaqäwinakapampix askinak jikxatapkaspati, ukat sumankañsa, kusisiñsa, jan usuntañsa, wiñayatak jakañsa Diosan apnaqäwipakiw apanispa. Ukhamaxa, qhawqha tiempos jaqinakax tʼaqhisisipki ukax niyaw tukusiski. Diosax niyaw aka Uraqina jan waltʼäwinakxa askichani, ukat aka ñanqha pacharux tʼunthapirakini.
Ukat Biblian mä profecianxa siwa: “Uka reyinakan [jichürunakan] apnaqañapkamasti, alaxpachankiri Diosax mä yaqha reino [alaxpachan] saytʼayarakini, uka reinosti [...] taqi [jichhürunakan utjir] yaqha reinonakarux tukjani, wiñayan wiñayapaw uka reinox utjarakini” sasa (Daniel 2:44). Jehová Diosan jachʼakankañapax jachʼañchatäniwa mä arunxa Diosakiw apnaqirjam uttʼasiñapa, alaxpachankir Apnaqäwip taypi, ukaw Biblian yatichäwipaxa. Kunas utjañapäna ‘qhipa urunakanxa’ uka tuqit parlkasaxa Jesusax akham sänwa: “Diosan reinopat aka suma yatiyäwisti aka uraqpachanwa yatiyatäni, ukhamat taqi markanakan yatipxañapataki, ukatsti akapachan tukusiñapaw jutani” sasa (Mateo 24:14).
Bibliankir mä profeciapanxa akham sarakiwa: “Aski luriri qʼuma jaqinakasti, aka uraqinwa wiñayatak jakapxani. Ukampis jan wali sarnaqir jaqinakasa, jan sum phuqhasa sarnaqirinakasa, aka uraqitxa apanukuta tukjatäpxaniwa” sasa (Proverbios 2:21, 22). Askinakakiw kawknïrinakas Diosan amtanakapax uk yatxatapxi ukat ukarjamas sarnaqapxaraki. Jesucristox akham sarakïnwa: “Aka wiñay jakañax juma sapa chiqpach Diosar uñtʼañanwa utji, ukhamarak Jesucristoru kawkïrirutix jumax khitankta ukaru” sasa (Juan 17:3). Jïsa, “akapachax tukusirikiwa [...], ukampis kawkïritix Diosan munañap lurki ukax wiñayatakiw jaki” (1 Juan 2:17).
Jiskʼa tʼaqanakaxa Qullan Arunaka Bibliat apstʼatawa.