6 yatichäwi
Kunatsa Diosax tʼaqhisiñ jan tukjpacha
1, 2. ¿Kunjamsa nayrïr awk taykasax suma jakäwip aptʼasiwayapxäna?
DIOSAX nayrïr awk taykasar Edén sat Paraison uttʼaykäna ukhaxa, ¿kunas kamachäna? ¿Kunatsa ukan jan jakasxtanxa? ¿Paraison kusisit jakasiñas lantixa, kunatsa jan waltʼäwinakaki ukat tʼaqhisiñanakaki waranq waranqa maranakanx utjawayi?
2 Adanamp Evampiw amtaparjam jan wal lurapxatayna. Janiw jupanakax Diosat ukat kamachinakapat jithiqtasax jan walinakar puriñxa amuyasipkänti. Diosat jithiqtasaw sum jakasipxañäni sasaw jupanakax amuyapxatayna. Ukatwa, kamachinakapar jan istʼasax saranukupxäna (Génesis 3 jalja).
Diosan jachʼa kankañaparuw qallasipxatayna
3-5. Adanamp Evampiruxa, ¿kunatsa ukürpach jan tukjpachäna, ukat yaqha jaqinak lurpakchäna?
3 ¿Kunatsa Diosax ukürpach uka qallasirinakar jan tukjpachäna, ukat wasitat yaqha jaqinak lurkpachäna? Jachʼakankañaparuw qallasipxatayna, ukatwa Jupax uk jan lurkänti.
4 “¿Khitis apnaqañapaxa, ukat khitis sum apnaqaspa?” sasaw qallasipxatayna. Taqi kun Luriri ukat taqi chʼaman Diosaw apnaqañapaxa. Kunattix Jupaw jachʼakankañanixa, ukatwa Jupan apnaqañapax wakiskirixa. Apnaqäwipax qallasitaw uñjasïna. Ukampisa, ¿janit jaqirux sum lurkpachäna? Uka tuqitxa, jutir yatichäwinakanwa yatxatañäni, ukat jaqinakax taqi chuymat luqtapxaspa uksa yatxataskarakiñäniwa.
5 Yaqha qallasïwix akarakiwa: ¿Diosan jan apnaqatax jaqinakax sum jakasipxaspati? Janiwa, Diosax uk yatkchïnsa, jupanakan amtaparjam sarnaqapxañapatakiw jaytäna, ukhamatwa jupanakax Diosat jithiqtasax jan sum jakasipkaspänti, uk amuyasipxañapänwa. Jupanakaw jan wal ajllipxäna, ukatwa Diosax ukhamak uñjäna.
6, 7. ¿Kunatsa Diosax jichhakam jaqinakar munañaparjam sarnaqañapatakix jaytaski?
6 Diosax jupanak pachpa apnaqasiñapatakiw tiempo churäna. Ukhamatwa, Diosamp apnaqayasiñat askïpacha jan ukax jaqinakamp apnaqayasiñach askïpacha, ukax sum qhanstañapäna. Uka tiempox taki kunan nayrar sartapxañapatakiw churasïna. Sañäni: política, industria, ciencia ukat qullasiñ tuqitsa khitin apnaqäwipas askixa uk amuyasipxañapäna.
7 Ukhamasti, Diosax munañanakaparjam sarnaqapxañapatakiw tiempo jichhakamas churaski, chiqpachapunit jupanakpacha apnaqasisax sum jakasipxaspa janicha uk yatipxañapataki. Ukhamatwa jaqix sumankaña, munasiña ukat chiqapar kuns luraña uk ajllipxañapäna. Maysa tuqitxa, tʼaqhisiña, uñisiña ukat jan walinak luraña ukanakwa ajllipxaspäna. Ukat ajllitaparjamaw munasiñansa sumankañansa jan ukax llakisiñansa tʼaqhisiñansa uñjasipxañapäna.
Angelanakaw Diosar kutkatasipxäna
8, 9. 1) ¿Kunjamsa alaxpachan qallasiñax qalltpachäna? 2) Adanamp Evampiru wiytasax ¿khitinakampirus Diosar kutkatasipxañapatakix Supayax wiytatayna?
8 Yaqha tuqit uñjañäni. Janiw nayrïr awk taykasak Diosar qallasipkänti. Ukhamasti, ¿khitinakarak uka pachan utjapxansti? Angelanakaw utjäna. Janïr jaqinakar lurkasaxa, walja angelanakwa Diosax alaxpachan luratayna. Jupanakax ukham amtaparjam sarnaqapxañapataki ukat Diosan apnaqäwipar atinisipxañapatak luratäpxänwa (Job 38:7; Apocalipsis 5:11).
9 Alaxpachanwa nayraqat qallasipxäna sasaw Bibliax qhanañchi. Mä angelaw taqi kunan munañaparjam sarnaqañ munäna. Ukampisa, jaqinakamp yupaychayasiñ munäna (Mateo 4:8, 9). Uka angelaw Adanamp Evampirux kʼarinakamp Diosar kutkatasipxañapatakix wiytatayna (Génesis 3:1-5). Ukatwa, Supaya (Kʼarisiri) ukat Satanás (Uñisiri) ukham sutinak katuqawayi. Uka qhipatxa yaqha angelanakaruw Diosar kutkatasipxañapatakix wiytarakitayna. Ukanakax saxranakjam uñtʼatäpxiwa (Deuteronomio 32:17; Apocalipsis 12:9; 16:14).
10. Jaqinakan ukat angelanakan kutkatasitapatxa, ¿kunarus purtʼasiyistu?
10 Kunapachatï jaqinakax Diosar kutkatasipxäna ukhaxa, Supayan ukat saxranakan munañaparjamaw sarnaqxapxäna. Ukatwa Bibliax akham sas sutiyi: “Akapach diosa” sasa, uka Supayaw “jupanakan amuytʼanakapxa chʼamaktʼayi jan Criston qhankir arunakapa uñjapxañapataki”. ‘Taqi aka uraqpachaw Supayan munañapanki.’ sasaw Bibliax qhanañcharaki. Ukat Jesús pachpaw akham sarakitayna, ‘akapacha apnaqiri’ sasa (2 Corintios 4:4; 1 Juan 5:19; Juan 12:31).
Pä jan waltʼäwinaka
11. Supayax Diosar qallasisaxa, ¿kuna jan waltʼäwinaksa uñstayäna?
11 Supayax Diosar qallasisax yaqha jan waltʼäwinakwa uñstayäna. Chiqansa, Diosaruw kʼarintäna, jaqinak lurasax pantjasiwa ukat janiw khitis jan waltʼäwinakanxa Diosarux yupaychxaniti sasaw qallasïna. Jaqinakatï jan walinakampi yantʼata uñjasipxaspa ukhaxa, Diosarux ñanqhachapxaspawa sasaw säna (Job 2:1-5). Ukhamwa, Supayax chiqpachpunti Diosarux yupaychapxi janicha uk payachayasiyäna.
12-14. ¿Kunjamsa uka pä jan waltʼäwinakax tiempompix qhanstañapäna?
12 Ukhamasti, kunjamsa aka jan waltʼäwinakax askichasini ukat kunjamsa Jupar qallasipkäna ukax askichasini, ukwa chʼikhi jaqinakax amuyasipxañapäna, ukatakiw Diosax tiempo churäna (Éxodo 9:16 liytʼarakismawa). Tiempompix kunjamxay jaqinakax lurapxchïni ukarjamaw uka pä jan waltʼäwinakax askichasiñapäna, ukatakiw tiempo churatayna.
13 Chiqpachansa, ¿kunas tiempompix Diosan jachʼakankañapat ukat Apnaqäwipat qhanstañapäna? ¿Jaqinakax Diosat sipansa jukʼamp sumti apnaqasipxaspäna? Jaqinakax kunayman apnaqäwinakwa uttʼayasipxi, ¿ukanakat maynikis Diosat jithiqtatax chʼaxwanaka, lunthatasiñanaka, jan waltʼäwinak aka uraqit chhaqtayaspati, ukat sumankañ apanispati? ¿Maynikis taqinirus taqi kun jakañatakix wakiski uk churaspati? ¿Ukat usuntañarus chuymankipstañarus ukat jiwañarus tukjaspati? Diosan Apnaqäwipakiw taqi ukanak askichaspa (Génesis 1:26-31).
14 Payïr jan waltʼäwitsti, ¿kunas jaqinakat tiempompix uñachtʼayasiñapäna? ¿Diosax jaqinakar amtaparjam sarnaqañatak lurasax pantjaspachänti? ¿Jupanakat maynis jan walinakamp yantʼatax Diosar luqtasipkakispati? ¿Diosan apnaqäwip munirinakax utjpachati?
[13 janan fotopa]
Diosax jaqinakan nayrar sartapxañatakiw walja tiempo churaski
[Fotojj khitin apsutasa]
Aka fotoxa NASA jupanakankiwa