Chacha warmi jan jaljtañatakix kunas munasi

1, 2. 1) ¿Chacha warmix qhawqha tiempos jakapxañapäna? 2) ¿Kunjamatsa uk jikxatapxaspa?

DIOSAX nayrïr chacha warmir jaqichkäna ukax wiñayatakïnwa. Adanampi Evampix wiñayaw chacha warmjam jakapxañapäna (Génesis 2:24). Mä chachampi mä warmimpi jaqichasaxa sum sarnaqapxaspa ukwa Diosax munäna. Chachas jan ukax warmis yaqhampi ikintasisin juch lurapxaspa ukhakiw divorcior puripxaspa, ukat inas yaqhampi casarasipxchispa (Mateo 5:32).

² ¿Chacha warmix wiñayataki kusisit jakasipxaspati? Jïsa, ukatakix munasiñampi respetompix wali wakiskiripuniw sasaw Bibliax qhanañchi. Panpachani ukarjam sarnaqapxanixa wali kusisitaw jakasipxani ukatxa walja bendicionanakwa katuqapxarakini.

MUNASIÑA

3. ¿Chacha warmix kuna kasta munasiñsa uñachtʼayapxañapa?

³ Bibliax walja kasta munasiñatwa parli. Mayaxa jaqi masir munasktanxa ukawa, kunjamtï mä munat masir munasktanxa ukhama (Juan 11:3). Yaqhasti, kunjamtï familia taypin munasipkixa ukarakïspawa (Romanos 12:10). Kimsïristi, kunjamtï mä chachampi mä warmimpix munasipkixa ukarakïspawa (Proverbios 5:15-20). Chacha warmix taqi uka munasiñanïpxañapawa. Ukampis yaqha kasta munasiñaw utji, ukax mayninakat sipansa wali wakiskiripuniwa.

4. ¿Kuna kasta munasiñas utjaraki?

⁴ Uka kasta munasiñaxa, Griego Arut Qullan Qillqatanakax qillqaskän uka arunxa a·gá·pe satawa. Uka aruw 1 Juan 4:8 qillqatan uñsti, akham siwa: “Diosax munasiñawa” sasa. Chiqpachansa “Diosaw nayraqat jiwasanakar munistu, ukatwa jiwasax juparux munaraktanxa” (1 Juan 4:19). Mä cristianox uka kasta munasiñwa Jehová Diosarus ukat jaqi masiparus uñachtʼayañapa (Marcos 12:29-31). A·gá·pe siski uka uruxa Efesios 5:2 jiskʼa tʼaqanwa uñstaraki, ukanxa akham siwa: “Munasiñan jakapxam, kunjämtix Cristo Tatitux munaskistu ukhama. Jupax jiwasanak laykuw jakañap aptʼasi” sasa. Uka kasta munasiñatwa chiqpach arkirinakajax uñtʼatäpxani sasaw Jesusax satayna, “jumanakatix maynit maynikama munasipxätaxa [a·gá·pe], taqiniw amuyapxani nayan discipulonakaxäpxatama” sasaw säna (Juan 13:35). 1 Corintios 13:13 jiskʼa tʼaqanxa kunjamsa a·gá·pe arux apnaqasi uk uñjañäni, ukanxa akham siwa: “Iyawsañasa, suytʼañasa, munasiñasa jan tukusk[iriwa], ukampis aka kimsatxa munasiñapuniw jiltʼataxa” sasa.

5, 6. 1) ¿Kunatsa munasiñax iyawsäwitsa suytʼäwitsa jilankixa? 2) ¿Kunjamanakatsa munasiñax jan jaljtañatakix yanaptʼi?

⁵ ¿Kunatsa a·gá·pe siski uka munasiñax iyawsäwitsa suytʼäwitsa wali jilankixa? Diosan Arupan utjki uka aski kamachinakarjam apnaqataw uka munasiñaxa (Salmo 119:105). Jiwasataki askinak thaqañat sipansa yaqhanakan askip thaqhañasawa, suma jaqïskpas janisa kunjamtï Diosax munki ukhama. Ukham munasisaw chacha warminakax aka arunakarjam sarnaqapxaspa, Bibliax akham siwa: “Jumanak purax llampʼu chuymampi sarnaqapxam, maynit maynirus perdonasipxarakim jan wali lurasipxsta ukapachaxa. Kunjämtï jumanakarux [Jehová Diosax, NM] perdonapxtamxa, ukhamarak jumanakax perdonapxam” sasa (Colosenses 3:13). Purapat sum apasiñ munapki uka chacha warminakanxa “[a·gá·pe] munasiñax” utjapuniwa, “munasiñasti walja juchanakwa perdonaraki” (1 Pedro 4:8). Amuytʼañäni, munasiñax walja juchanak perdoni siwa, janiw chhaqtayiw siskiti, kuna laykutix taqinis pantjasirïtanwa (Salmo 130:3, 4; Santiago 3:2).

⁶ Mä chacha warmix uka kasta munasiñ Diosar uñachtʼayapxi ukat jupanak puras wal munasipxarak ukhaxa janiw jaljtañ munapkiti, jan ukasti wali sumwa jakasipxi, “munasiñax janipuniw tukuskiti” (1 Corintios 13:8). “Munasiña[x] mayaruw tukuyi” (Colosenses 3:14). ¿Jaqichasitanakax kunjamatsa uka kasta munasiñ uñachtʼayapxaspa? Panpachaniw Diosan Arupat liyipxañapa, ukatxa liytʼasax parlapxañaparakiwa; Jesusan munasiñapat yatiqasaxa jupjam amuyunïñataki ukat jupjam sarnaqañatakiw chʼamachasipxañaparaki. Tantachäwinakarus sarapxañaparakiwa, ukanwa Diosan Arupatxa yatichasi, ukat ukham suma munasiñ uñachtʼayañatakixa Diosar mayisipxañaparakiwa, ukax qullan ajayun luräwipawa (Proverbios 3:5, 6; Juan 17:3; Gálatas 5:22; Hebreos 10:24, 25).

RESPETO

7. ¿Kunas respetoxa ukat chacha warmitxa khitis uñachtʼayañapa?

⁷ Mä chacha warmitix chiqapun munasipxani ukhaxa purapatwa repetasipxani, mä arunxa suma chuymampiw uñjasipxani, ukax wali wakiskirirakiwa chacha warmi sum jakasiñatakixa. Diosan Arupax chachanakarus warminakarus mä arunxa taqinirus akham siwa: “Purapata suma chuymampi munasi[pxam]” sasa (Romanos 12:10). Pedrox akham sasaw qillqatayna: “Warmin chachanaka, [warminakamampix] suma chuymampi utjapxam, warmix mä turpa pʼakisiri vasoru uñtatätap laykuxa” sasa (1 Pedro 3:7, MT). ‘Warmisti chachaparux istʼañapapuniwa’ sarakiwa (Efesios 5:33). Maynir suma chuymampi uñjañ munasax amuyumpiw uñjtanxa, amuyatanakapxa sum uñjaraktanxa, ukat kunatï walikïskchi ukanakxa chuymapar purtʼkirpunwa lurañ muntanxa.

8-10. ¿Respetasiñax kunjamatsa chacha warminakarux yanaptʼaspa sum jakasiñatakisa kusisit sarnaqañatakisa?

⁸ Chacha warmi kusisit jakasiñ munirinakax purapatwa suma chuymampi uñjasipxi, ‘janiw khitis jupatakiki askïki ukxa thaqkiti, jan ukasti kunatix maynitaki askïki ukwa thaqi’ (Filipenses 2:4). Janiw chachas ni warmis jupa pachpan askipakxa thaqhapkiti, ukax janiw walïkaspati, ukat sipansa kunas chachatakis jan ukax warmitakis askïki ukwa amuyapxi. Jupa pachpan munañanakapsa apanukupxiwa.

⁹ May maya amuyunïñ tuqitxa respetompi uñjasiñaw chacha warmirux yanaptʼaraki. Taqi kunansa mä amuyunikïpxañapaw sañax janiw walïkiti. Inas chachatakix kunas wali askipunïchispa, ukampis warmitakix janiw ukhamäkaspati, ukat kuntï warmix wal munki ukxa janiw chachax munkarakispati. Ukampis sapa mayniw amuyunakapxa Jehová Diosan kamachinakaparjam walikïskani ukhaxa purapat respeto uñachtʼayasipxañapa (1 Pedro 2:16; ukat Filemón 14 uñxatarakïta). Ukatxa janiw jupanak purax phinqʼachasipxañapäkiti, janiw jaqinak taypinsa ni sapa puras jan wali arunakampix sutichasipxañapäkiti ni sawkasipxañapäkisa.

¹⁰ Chiqpachansa, Diosar munasiñampi ukat chacha warmjam munasiñampi respetompi uñjasiñasa, jaqichäwin sum jakasiñatakix wali askipuniwa. ¿Kunjamatsa chacha warminakax wali wakiskir tuqinakatxa ukarjam sarnaqapxaspa?

JESUCRISTJAM PʼIQTʼAÑA

11. ¿Bibliarjamax khitis mä jaqichäwin pʼiqtʼañapa?

¹¹ Chachax familia pʼiqtʼañapatak lurataw sasaw Bibliax qhanañchi. Ukhamasti, warmipas wawanakapas kunjamsa yupaychañ tuqitsa jañchi tuqitsa jikxatasipxi ukarjamaw Jehová Diosar cuenta churapxani. Taqi kunsa amuyumpiw Diosan munañaparjam amtañapa, ukatxa yatiqasiñjamaw sum sarnaqañaparaki. “Warminaka, chachanakamarux istʼapxam Tatiturjama. Chachax warmin pʼiqipawa, kunjämatix Cristox [taman, NM] pʼiqipäki ukhama” (Efesios 5:22, 23). Ukampis chachax pʼiqtʼirinirakiw sasaw Bibliax qhanañchi. Pablox akham qillqatayna: “Cristowa taqi chachan pʼiqipaxa, chachasti warmin pʼiqiparakiwa, kunjämatix Diosax Criston pʼiqipäki ukhama” sasa (1 Corintios 11:3). Khititix pʼiqipäki ukatwa amuytʼasir chachanakax yatiqasipxi.

12. ¿Pʼiqtʼañ tuqitsa istʼasirïñ tuqitsa Jesusax kuns uñachtʼayistu?

¹² Jehová Diosaw Jesusan pʼiqipaxa, ukat jupax kunjamtï istʼañapäkixa ukhampunwa Diosarux istʼi. Ukat akham säna: “Janiw nayax munañaxarjama lurañ munkti, jan ukasti Awkixax khitankitu ukan munañaparjamaw lurta” sasa (Juan 5:30). ¡Jiwasatakix wali askipuniwa! Jesusax “taqi kunatix utjki ukatxa nayrïriwa” ukatxa jupaw Mesiasäxarakïna (Colosenses 1:15). Alaxpachar sarir cristianonakaruw pʼiqtʼañapäna, Diosan Apnaqäwipansa juparakiw apnaqañapäna, angelanakatsa jilankañapänwa (Filipenses 2:9-11; Hebreos 1:4). Jesusax ukham wali aski lurañanïkasasa, wali suma suytʼäwinïkasasa janiw qhurükänti, janirakiw jan iyawsirïkänsa, jan ukasti jaqinakarux sum uñjäna. Janiw arkirinakaparux munañaparuki apnaqañ munkänti, janirakiw nayaruw istʼapxañama sasax siskänti. Jan ukasti wali munasiri khuyapayasiri ukhamänwa, pisinkirinakarus jukʼamp sum uñjäna. Jupax akham sänwa: “Nayar jutapxam taqi qarjatanaka jatjatanaka, nayaw samarayapxäma. Nayan yugoxa apapxam, ukatsti nayat yatiqasipxarakita. Nayasti llampʼu chuymani, altʼat chuymanirakïtwa, ukatwa almaman samarañapxa jikxatapxäta. Nayan yugoxasti jasa apañakiwa, khumuxasti sinti phisnakirakiwa” sasa (Mateo 11:28-30). Jupampïñax wali sumänwa.

13, 14. ¿Chachax kunjamsa Jesusat yatiqasisax pʼiqtʼañapa?

¹³ Jesusax kunjam jaqïnsa ukwa familian sum jakasiñ munir chachax yatxatañapa. Mä suma chachaxa janiw warmiparux axsaraykiti, janiw warmiparux munañaparjam jan wal apnaqkiti. Jan ukasti wal munasi, suma chuymampiw uñjaraki. Niyakixay Jesusax ‘altʼat chuymanïchïnxa’ ukhamax chachanakax jukʼamp altʼat chuymanïpxañapawa, Jesusat sipansa chachanakax pantjasirïpxiwa, ukatwa warmix chachapar juch pampachañapa. Ukhamasti, “nayax pantjastwa” sañax chʼamäkchisa, mä altʼat chuyman chachaxa juchanakapxa uñtʼasiwa. Chachatï altʼat chuymani ukat amuyasiri ukhamänixa, warmitakix jupar istʼañax janiw chʼamäkaniti, ukampis jachʼa jachʼa tukuri, taqi kunsa munañapar lurañ muniri ukhamänixa jupar istʼañax wali chʼamäniwa. Maysa tuqitxa, istʼasir warmixa pantjasitap amuyasisax perdón mayirakiwa.

¹⁴ Diosax wali sumwa warmirux lurarakitayna, ukhamatwa warmix familian sum jakasiñatakix yanaptʼarakispa. Amuytʼan chachax sum uk yati, warmin arunakapxa istʼiwa. Warminakax wali khuyaptʼayasirïpxiwa, kuna jan wal uñjasasa jankʼakiw kuns lurañ munapxi, ukanakaw familiar sum uñjañatakisa jiwaskam sum apasiñasatakis munasi. Niya taqi warminakaw utapxa wali sum kʼachachañxa munapxi. Proverbios 31 jaljanxa mä ‘suma warmit’ parli, uka warmix wali qʼaphänwa kuns lurtʼakirïnwa, ukatwa familiapax wali sum jikxatasïna. ¿Kunatsa? Kunattix ‘chachapax taqi chuymaw jupar katuyasïna’ (Proverbios 31:10, 11).

15. ¿Jesusat yatiqasisax kunjamatsa chachax warmipar munasispa ukat respeto uñachtʼayaspa?

¹⁵ Yaqhip chiqanakanxa chachanakarux wal jachʼañchapxi, ukat chachanakar kun jisktʼañas janiw walïkiti. Uka chiqanakanxa warmix mä uywatäkaspas ukhamwa chachanakax uñjapxi. Ukham pantjat pʼiqtʼañaxa janiw walïkiti, warmimpix janiw suma apasipkiti, Diosampis ukhamaraki (1 Juan 4:20, 21 uñxatäta). Maysa tuqitxa yaqhip chachanakax janiw pʼiqtʼapkiti, jan ukasti warmimpiw utxa apnaqayapxi. Cristor istʼir chachax janiw taqi kuns warmiparuk luraykiti, janirakiw jiskʼachkarakisa. Jan ukasti Jesusat yatiqasisaw wali munasiñampi uñji, ukat Pablon aka arunakaparjamaw sarnaqi: “Chachanaka, munasipxam warminakamaru, kunjämtix Cristox [tamaru, NM] munasi, ukhamarak jakañapsa jupa layku aptʼasiwayi ukhama” (Efesios 5:25). Jesusax wal arkirinakapar munasïna, ukatwa jakañapsa jupanak laykux aptʼasïna. Mä suma chachaxa jupat yatiqasiñapawa, kunatï warmipatakix askïki ukwa thaqañapa, janiw patronjamäñapäkiti. Chachax Jesusat yatiqaski ukhaxa munasiñsa respetsa uñachtʼayarakiwa, ukat warmixa taqi chuymaw jupar istʼi (Efesios 5:28, 29, 33).

WARMIX CHACHAPAR ISTʼAÑAPAWA

16. ¿Warmix kunjamäñapasa ukat chachax kunjamäñaparakisa?

¹⁶ Adán chachar luräna uka qhipatxa akham sasaw Jehová Diosax säna: “Janiw walïkiti jaqin sapakïñapaxa. Nayax jupatakix mayni jupampi chika jakiri, ukhamaraki yanaptʼiri lurarapï” sasa (Génesis 2:18). Diosax ‘yanaptʼirïñapatakiw’ Evar luratayna, janiw chachapar kutkatasiñapatakix lurkataynati. Chachaw familiarux wali munasiñampi apnaqañapa, ukat warmisti taqi chuymaw munasiñsa respetsa uñachtʼayañaparaki, ukatxa istʼasirïñaparakiwa.

17, 18. ¿Kunanakansa warmix chiqpachapuni chachapar suma yanaptʼaspa?

¹⁷ Ukampis mä suma warmix janiw istʼasiñak yatkiti. Jan ukasti chachax kuntï amtki ukarux yanaptʼiwa. Chiqpachansa chacha warmpacha mä amtanikïpxi ukhaxa janiw uk lurañax chʼamäkiti. Ukampis jan mä amtanikïpxi ukhaxa warmix chachan amtaparux yanaptʼañapawa, ukhamatwa askinak jikxatapxaspa.

¹⁸ Yaqha tuqinakatwa warmix chachar yanaptʼarakispa, ukhamat suma pʼiqtʼirïñapataki. Janiw kunsa churkistati sañat sipansa warmix yuspäraspawa familia pʼiqtʼatapatxa. Ukampis chachar yanaptʼkasaxa ak amtañaparakiwa: ‘suma chuymanïñampi, llampʼu chuymanïñampixa wali askiw Diosatakixa’ (1 Pedro 3:3, 4; Colosenses 3:12). ¿Ukat chachax jan cristianükchi ukhasti? Ukhamäkipansa Qullan Qillqatanakax akham siwa: Warminakax “chachanakapar munirinaka, wawanakapar munirinaka, qʼumanaka, utap uñjasirinaka, suma jaqinaka, chachanakapar jaysirinaka” ukhamäpxañapaw siwa “Diosan arupata jan ñanqha parlapxañapataki” (Tito 2:4, 5, MT). Ukat yaqhip luräwinakax jan jupatakix waljamäkanixa ‘suma chuymampi, llampʼu chuymampi’ ukhamaw qhanañchañapa, ukhamatwa chachax respetaspa. Jan iyawsir yaqhip chachanakaxa ‘warminakapan suma sarnaqäwip tuqiw Diosatakix jikxatatäpxi jan kuna arumpi, jan ukasti jupanakan suma sarnaqapxatap uñjasawa’ (1 Pedro 3:1, 2, 15; 1 Corintios 7:13-16).

19. ¿Dios nayraqatan jan walïki uk luram satax kamachañapas warmixa?

¹⁹ Diosatakix kunatï jan walïki uk chachax warmipar lurayañ munaspa ukhaxa, ¿kamachaspas warmixa? Ukhaman uñjasisax akwa warmix amtañapa, Diosaw taqi kunxaru munañani jachʼa Apnaqirixa, ukat apostolanakax Diosar jan istʼapxamti satax kunsa lurapxatayna ukat yatiqasipxañaparakiwa. Hechos 5:29 qillqatax akham siwa: “Pedrompi apostolunakampix arsupxänwa: ‘Nanakanxa Diosar nayraqat istʼapxañaxaw wakisi, jaqinakar sipansa’” sasa.

SUM PARLTʼASIÑA

20. ¿Munasiñampi respetompix kuna tuqinsa wali askirakixa chacha warmi jakäwinxa?

²⁰ Chacha warmi parltʼasipki ukhaw munasiñsa respetsa purapat uñachtʼayasipxañaparaki. Warmipar munasir chachax amtanakapatsa, llakinakapatsa luratanakapatsa, ukat yaqhanakatsa warmipampix parltʼasipuniwa. Ukwa warmix munaraki. Ukat chachasti jupampi parltʼasiñatakix tiempo apstʼasipuniwa ukat arunakap istʼasax munasiñamp respetomp uñachtʼayi (Santiago 1:19). Yaqhip warminakax janiw chachajax nayatakix tiemponïxiti sasaw sapxi, ukax wali llakkañawa. Chiqasa, niyakixay jan tiemponi sarnaqatächixa, yaqhip chachanakax walja tiempow irnaqir sarapxi, ukat yaqhip warminakax pisin sarnaqasax irnaqiriw sarapxaraki. Ukampis chacha warmiw purapat tiempo apstʼasipxañapa. Jan ukhamäkanixa, purapatwa jayarstʼayasipxaspa, ukat chachas jan ukax warmis yaqhanakampiw sarnaqxapxaspa, sinti jan waltʼañanakaw utjaspa.

21. ¿Sum parltʼasiñax kunjamatsa chacha warmir sum jakasiñxa yanaptʼaspa?

²¹ Kunjamsa chacha warmix parlastan ukax wali wakiskirirakiwa. “Suma arunakax [...] jaqin chuymapatakisa muxsawa, cuerporus chʼamañcharakiwa” (Proverbios 16:24). Maynix cristianüskpas janisa, Biblian aka iwxanakapax wali askiwa, akham siwa: “Parlatanakamasti sumäñapapuniwa, [jayuñchatäpan, NM]” sasa (Colosenses 4:6). Awisax chʼama urunakaw utjaspa, ukhamax chachan jan ukax warmin suma arunakapax wali askipuniw maynitakixa. Tiempopar arsuta suma arunakaxa ‘qurimpi qullqimpi’ sasiw siw Biblianxa (Proverbios 25:11). Kunjams arsuñäni ukat kunjam arunakampis parlañäni ukax wali wakisiriwa. Sañäni, inas maynix qhuru arunakampi “¡Punk jistʼkatam!” sas tuqintchispa. Ukampis “¿Mirä ampsuma punku jistʼkatasmati?” sas suma chuymampi ukat suma arunakampi sañäni ukhaxa arunakasax ‘jayuñchtʼatäkaspas’ ukhamäniwa.

22. ¿Kunjamatsa chacha warmix wali sum parlasipxapunispa?

²² Suma arunakasa, kusisit ajanumpi ukat suma chuymampi maynir uñkatañasa, munasiñasa wali wakisiriwa sum parltʼasiñatakixa. Chachas jan ukax warmis wali sum parltʼasiñ munapxani ukhaxa, kuntï sapa maynis munapki ukxa jan imtʼasaw yatiyasipxani, ukat jan walinakansa purapat yanaptʼasipxarakini. “Mayjtʼatanakarux chʼamañchtʼapxam” sasaw Diosan Arupax sistu (1 Tesalonicenses 5:14). Awisax chachaw llakit jikxatasispa, awisax warmirakiw wali llakit jikxatasispa. ‘Chʼamañchir arunakampi’ llakitar arxayañax wali askipunïspawa (Romanos 15:2).

23, 24. ¿Chacha warmi sum apasipxañapatakix kunjamsa munasiñampi respetompix yanaptʼaspa? ¿Khitinakatsa yatiqassna?

²³ Munasiñampi ukat respetompi purapat uñjasiri, chacha warminakatakixa jan mä amtanikïñax janiw sinti jan walïkiti. Janiw mäki ‘wal qhuruchasipkiti’ (Colosenses 3:19). Panpachaniw ak amtapxañapa: “Suma arumpi kuttʼayañaxa colerañxa apaqiwa” (Proverbios 15:1). Chachax warmipar jan ukax warmis chachapar kunatï amuyki uk sani ukhaxa janiw jiskʼachasipxañapäkiti, ni phinqʼachasipxañapäkisa. Jan ukasti jukʼamp sum uñtʼasiñatakiw ukxa purapat uñjapxañapa. Jan mä amuyunïkasax panpachaniw mä amtaruki puripxañapa.

²⁴ Amtañäni, mä kutix Abrahamaruw Sara warmipax mä jan waltʼäw askichañatakix iwxtʼatayna, ukat Abrahamax janiw iyawskänti. Ukat “kuntix Sara warmimax mayktam ukanakxa phuqhaskakim” sasaw Diosax jupar säna (Génesis 21:9-12). Abrahamax ukarjam lurasax walja bendicionanakwa katuqäna. Ukhamasti, warmix jan chachapjam amuykani ukhaxa, chachax warmin arunakap istʼañapawa. Ukampis janiw warmikirakix parlañapäkiti, jan ukasti kuntï chachax amuyki ukxa istʼañaparakiwa (Proverbios 25:24). Maynix kunsa munañaparuki lurañ munasax janiw munasiñsa ni respetsa uñachtʼaykaspati.

25. Chachax chachjamaw warmipatakix munasiñ tuqit phuqañapa, warmis ukhamaraki, ¿uk phuqañatakix kunjamsa qhan parltʼasiñax yanaptʼarakispa?

²⁵ Kuntï chachax munasiñ tuqit chachjam phuqañapäki ukat warmis warmjam phuqañapäki uka tuqit qhan parltʼasiñax wali askirakiwa. Maynix jupan munañanakapak thaqhaskan ukhaxa janiw chacha warmix waltʼayasxapxaspati. Ukhamasti purapat qhan parltʼasiñaw utjañapa, ukatxa llampʼu chuymanïpxañaparakiwa. Ukampis maynitï chachapan jan ukax warmipan askïñap munkani ukhaxa janiw uka tuqit sinti jan waltʼayasiñanakax utjkaspati. Ukhamasti uka tuqinsa ukat yaqhanakansa warmisan jan ukax chachasan ‘askïñap munañasawa, janiw jiwasan askïñasaki munañasäkiti’ (1 Corintios 7:3-5; 10:24).

26. ¿Kunjamsa Diosan Arupax jan waltʼañanakansa kusisiñ jikxatañxa yanaptʼistaspa?

²⁶ Diosan Arupax wali suma iwxanakaniwa. Chiqpachansa janiw taqi chacha warminakax sumpun jakasipkiti. Ukampis Biblian yatichäwinakaparjam mä arunxa Jehová Diosan kamachinakaparjam sarnaqapxani, ukhamaraki Diosan arunakaparjam munasiñan sarnaqapxani ukat purapat respetasipxani ukhaxa janiw chacha warmjamax jaljtapkaniti, jan ukasti wiñayaw wali sum jakasipxani. Ukatxa janiw jupanakaki jachʼar aptatäpkaniti, jan ukasti khititï chacha warmi uttʼayki uka Jehová Diosaw wali jachʼar aptatäni.