2 Yatichäwi
¿Khitis Diosaxa?
¿Khitis chiqpach Diosaxa ukat kunas sutipaxa? (1, 2)
¿Diosax kunjam cuerponisa? (3)
¿Kunjam Diosasa? (4)
¿Diosar yupaychañataki santonaka ukat uñnaqanaka apnaqañax wakispachati? (5)
¿Kuna pä tuqitsa Diosat yatiqsna? (6)
1. Jaqixa kunarus yupaychaskakiwa. Ukampisa, Bibliaxa mä CHIQPACH Diosakiw utji siwa. Jupawa alaxpachansa aka Uraqinsa taqi kun luratayna, Jupawa jakañsa churistu, ukhamaxa Juparukiw yupaychañasaxa (1 Corintios 8:5, 6; Apocalipsis 4:11).
2. Diosax kunaymanit aytasitawa, ukampis mä sutinikiwa: JEHOVÁ satawa. Yaqhip Biblianakanxa Diosan sutipax apsutäxiwa, uka lantisti Tatitu jan ukax Dios sasakiw uchxapxi. Ukampis kunapachatï Bibliax qillqaskäna ukhaxa Jehová sutixa mä 7.000 kutiw uñstäna (Salmo 83:18, NM).
3. Jehová Diosax mä cuerponiwa, ukampisa janiw jiwasjamäkiti. “Diosax ajayuwa” siw Biblianxa (Juan 4:24). Mä ajayuxa janiw jiwasjam jakkiti. Diosarux janiw khitisa uñjkaspati. Jehová Diosax alaxpachansa jakaschixa, taqi kunwa uñji (Salmo 11:4, 5; Juan 1:18). ¿Ukat kunas qullan ajayuxa? Janiw Diosjamäkiti, jan ukasti Diosan chʼamapawa (Salmo 104:30).
4. Jehová Diosaxa kunjam Diosasa uk Bibliax qhanañchistu. Wali munasiri, taqi kunsa chiqapar uñjiri, yatiñkankañani ukat wali chʼamani Diosaw siwa (Deuteronomio 32:4; Job 12:13; Isaías 40:26; 1 Juan 4:8). Ukat khuyapayasiri, suma chuymani, juchanaka pampachiri, waxtʼasiri, llampʼu chuymani ukham Diosaw sarakiwa. Istʼasiri wawanakjamaxa Jupat yatiqasiñasawa (Efesios 5:1, 2).
5. ¿Santonakar uñnaqanakaru mayisiñasa altʼasiñasa wakispachati? Janiwa (Éxodo 20:4, 5). Jehová Diosaxa janipuniw ni khitiru ni kunaru yupaychañassa munkiti, Jupa saparukiw yupaychañasax siwa. Ukatxa, santonakaxa janiw yanaptʼañataki chʼamanïpkiti (Salmo 115:4-8; Isaías 42:8).
6. ¿Kunjamatsa Diosar jukʼampi uñtʼsna? Mä tuqitxa, luratanakap uñjasawa uñtʼsna ukat ukanakaxa kunsa Jupata yatichistu uk lupʼisawa jukʼampi uñtʼaraksna. Ukanakaxa wali chʼamani, yatiñani Diosätapwa uñachtʼayistu. Taqi luratanakapanwa munasiñap uñjtanxa (Salmo 19:1-6; Romanos 1:20). Maysa tuqitsti Bibliat yatiqasawa Diosarux uñtʼaraksna. Kunjam Diosasa uka tuqitwa Bibliax jukʼamp qhanañchistu. Ukat kunas amtapaxa, kuns mayistu ukanakwa yatiyarakistu (Amós 3:7; 2 Timoteo 3:16, 17).
[5 janan fotonakapa]
Luratanakapampita Bibliampita yatiqasaw Diosar uñtʼsna