8 Yatichäwi

Diosaru kusisiyiri familia

¿Awkix kuna lurañanisa familia taypinxa? (1)

¿Chachaxa warmiparux kunjam uñjañapasa? (2)

¿Kunsa awkix lurañapa? (3)

¿Warmixa kuna lurañanisa familia taypinxa? (4)

¿Awkinakampita wawanakampita kunsa Diosax mayi? (5)

¿Bibliax kamsis jaljtañampita divorciompitxa? (6, 7)

1. Chachaw familian pʼiqipax siw Biblianxa (1 Corintios 11:3). Chachax mä sapa warminikïñapawa, ukat warmipampix kamachinakarjam casaratäñapawa (1 Timoteo 3:2; Tito 3:1).

2. Kunjamtï jupapacha munaskixa ukhamwa chachax warmiparu munasiñapaxa. Kunjamtï Jesusax arkirinakaparu uñjkänxa ukham uñjañaparakiwa (Efesios 5:25, 28, 29). Janipuniw nuwañapäkiti ni jan walinaksa sañapäkiti. Jan ukasti, sum uñjañapawa ukat respetañapawa (Colosenses 3:19; 1 Pedro 3:7).

3. Awkiwa familiapatakix wal irnaqañapa. Warmiparusa wawanakaparusa manqʼaña, uta, isi churañapawa. Ukatxa Dios tuqitsa yatichañaparakiwa (1 Timoteo 5:8). Diosata ukhamaraki Diosan amtanakapampita yatiqañatakixa awkiw pʼiqtʼañapaxa (Deuteronomio 6:4-9; Efesios 6:4).

4. Warmisti chachapatakix suma yanapirïñapawa (Génesis 2:18). Chachaparuxa wawanak yatichañwa yanaptʼañapa (Proverbios 1:8). Warmix munasiñampi familiapar uñjaspa ukwa Jehová Diosax muni (Proverbios 31:10, 15, 26, 27; Tito 2:4, 5). Warmisti chachaparuxa istʼañapapuniwa (Efesios 5:22, 23, 33).

5. Wawanakaxa awk taykaparu istʼapxapuniñapawa, ukwa Diosax muni (Efesios 6:1-3). Awkis taykasa wawanakaparu yatichapxañapawa ukat chiqañchapxañapawa, ukwa Diosax munaraki. Awkis taykasa wawanakapataki tiempo apstʼasipxañapawa jupanakampi Bibliat yatiqañataki ukhamaraki kunjamsa jikxatasisipki uka tuqita yanaptʼañataki (Deuteronomio 11:18, 19; Proverbios 22:6, 15). Janiw wawanakaparux wali qhuruchasisa chiqañchapxañapäkiti (Colosenses 3:21).

6. Kunapachatï chacha warmixa jan waltʼayasipki ukhaxa Biblian iwxanakaparjama askichapxañapawa. Bibliax munasipxam ukat juchanak pampachasipxam sistuwa (Colosenses 3:12-14). Diosan Arupaxa janiw jaljtapxam siskiti jan waltʼañanak askichañatakixa. Ukampisa warmixa saraqxaspawa kunapachatï 1) chachaxa jani familiataki irnaqañ munkchi, 2) wali nuwasirïchi, jiwayirjamächi, ukat 3) janipuni Jehová Diosaru yupaychayañ munkchiti ukhaxa (1 Corintios 7:12, 13).

7. Chachas warmisa janiw yaqhanakampi sarnaqañapäkiti. Yaqhanakampi ikintasiñax Diosatakisa warmitakisa jan ukax chachatakisa wali jachʼa juchawa (Hebreos 13:4). Chachasa jan ukax warmisa jaqichatäkasina yaqhampi ikintaschi ukhakiw divorcioru puripxaspa siw Bibliaxa, ukat ukhakirakiw yaqhampis jaqichasispa (Mateo 19:6-9; Romanos 7:2, 3). Yaqhampi casarasiñ layku Bibliar jan istʼasa divorciasiñarux Jehová Diosax uñisiwa (Malaquías 2:14-16).

[16, 17 jananakan fotonakapa]

Munasir awkixa familiapataki wal irnaqi ukat Diosatsa yaticharakiwa

[17 janan fotopa]

Awk taykax wawanakar yatichaspa chiqañchaspa ukwa Diosax muni