10 Yatichäwi
Diosan uñisit luräwinaka
¿Diosax janiw walïkiti siski ukanakxa kunjam uñjañamasa? (1)
¿Chachasa warmisa kunsa jan lurañapäki? (2)
¿Kamsapxisa cristianonakax kʼarisiñxatxa? (3) ¿Qullqit anatañatsa? (3) ¿Lunthatasiñatsa? (3) ¿Nuwasiñatsa? (4) ¿Layqasiñxatsa? (5) ¿Machantasiñxatsa? (6)
¿Kunjamsa jan wali luräwinaka maynix armaspa? (7)
1. Diosan yupaychirinakapax kunatï walïki ukxa munasipxiwa, ukat kunatï jan walïki ukxa uñisipxañapawa (Salmo 97:10). Ukhamax Diosan uñisit jan wali luräwinakxa janiw lurapxañapäkiti. ¿Kawkïris ukanakaxa?
2. Qʼañu lurañanaka: Janïr jaqichatäkasin ikintasiñasa, jaqichatäxasin yaqhanakampi ikintasiñasa, uywanakampi qʼañu lurañasa, familiaranakampi sarnaqañasa ukat chachapura warmipura qʼañunak lurañasa Diosatakixa wali jachʼa juchawa (Levítico 18:6; Romanos 1:26, 27; 1 Corintios 6:9, 10). Jan casaras chikthapitanakaxa jaljtapxañapawa jan ukax casarasipxañapawa (Hebreos 13:4).
3. Kʼarisiña, qullqit anataña, lunthatasiña: Jehová Diosax janiw kʼariskaspati (Tito 1:2). Ukat Diosampi iyawsatäñatakixa janiw kʼarisipxañapäkiti (Proverbios 6:16-19; Colosenses 3:9, 10). Qullqit anatañanakaxa qullq jukʼamp munayiriwa. Cristianonakaxa ukatwa lotería, bingo satäkisa ukanakan jan anatapkiti, ni caballo tʼijurinakatsa apuestapkiti, janirakiw ukanakar uñtasita jan walinaksa lurapkiti (Efesios 5:3-5). Janiw lunthatäpkiti, ni lunthatatanaksa yatkasa alapkaspati, janirakiw jan kamsasa kuns apasipkaspati (Éxodo 20:15; Efesios 4:28).
4. Phiñasiña, nuwasiña: Colerasiñaxa nuwasiñaruw apistaspa (Génesis 4:5-8). Nuwasirinakax janiw Diosampi sum apasipkaspati (Salmo 11:5; Proverbios 22:24, 25). Jan wal lurkatas janiw ukhamat ukham kuttʼayañasäkiti (Proverbios 24:29; Romanos 12:17-21).
5. Layqasiñanaka: Yaqhipanakaxa ajayunakaruw jawsapxi qullayasiñataki. Yaqhipanakasti yaqhanakaruwa layqxayapxi usuntañapataki jan ukax jiwañapataki. Satanasaw taqi ukanakxa lurayi. Ukhamaxa janiw cristianonakax ukanak lurapxañapäkiti (Deuteronomio 18:9-13). Layqanakata jarkʼaqasiñatakixa Jehová Diosar jakʼachasiñasawa (Proverbios 18:10).
6. Machantasiña: Vino, alcohol jan ukax cerveza mä jukʼa umtʼañaxa walikïskiwa (Salmo 104:15; 1 Timoteo 5:23). Ukampisa jiljañasa machjasiñasa Diosatakixa juchawa (1 Corintios 5:11-13; 1 Timoteo 3:8). Sint umasaxa usuntasmawa ukatxa familiamsa jan waliruwa aptʼasma. Ukatxa, yaqha juchanakaruw purtʼasirakismaxa (Proverbios 23:20, 21, 29-35).
7. Diosax janiw walïkiti siski ukanak lurir jaqinakax “janiw Diosan reinopanxa katuqatäpkaniti” (Gálatas 5:19-21). Chiqapuni Diosar munassta ukat kusisiyañ munsta ukhaxa uka jan walinakxa apanukxätawa (1 Juan 5:3). Kuntï Diosaxa janiw walïkiti siski ukxa uñisiñamawa (Romanos 12:9). Sum sarnaqirinakampi sarnaqañamawa (Proverbios 13:20). Yatxatat cristiano masinakasaw wal yanaptʼapxistaspa (Santiago 5:14). Ukat Diosat mayisiñamapuniwa ukaw wal yanaptʼätamxa (Filipenses 4:6, 7, 13).
[20, 21 jananakan fotonakapa]
Machañsa, lunthatasiñsa, qullqit anatañsa, nuwasiñsa Diosax uñisiwa