Diosan munasitanakapax jan walinak lurapkiti

Satanasaxa jucha lurañanakaruw wiytistu. Diosan munasitapäñatakixa, kuntix Jehová Diosax uñiski ukxa uñisiñasarakiwa (Salmo 97:10). Diosan munasitanakapaxa akanakwa jan lurapxañapäkiti:

Wachuq juchanaka. Jaqichatäxasinxa “janiw yaqhanakampi wachuqa lurätati.” (Éxodo 20:14.) Janir jaqichaskasa ikintasiñaxa, jucharakiwa (1 Corintios 6:18).

Machantasiña. “Janiw Diosan markapar mantkaniti [...] machirinakasa” (1 Corintios 6:10).

Jiwayaña, sullsuña. “Janiw jiwayätati.” (Éxodo 20:13.)

Lunthatasiña. “Janiw lunthatätati.” (Éxodo 20:15.)

Kʼarisiña. Jehová Diosaxa “kʼari parlañanakaru” uñisiwa (Proverbios 6:17).

Nuwasiñanaka ukat colerampi atipayasiñanaka. Jehová Diosaxa “ñanqha lurañ [jan ukax nuwasiñ] munirinakarusti walpun uñisi” (Salmo 11:5). Janchin jan wali luräwinakanapax ‘colerasiñanakawa’ jan ukax qʼapisiñanakawa (Gálatas 5:19, 20).

Qullqit anatañanaka. “Jan chikachasipxamti khititix” anatañanakana apaqtʼañ munasaxa “lunthatasiski ukanakampixa.” (1 Corintios 5:11.)

Yaqha kasta jaqinakaru jan ukax yaqha markankirinakaru uñisiñanaka. “Uñisirinakamarux munapxam, Diosat mayirapipxarakim” (Mateo 5:43, 44).

Diosan iwxanakapaxa askisatakiwa. Jan walinakaxa lurañjamakipuniwa, ukampisa Jehová Diosan yanaptʼapampi ukhamaraki Qhanañchirinakapan yanaptʼapampixa, Diosan uñisita jan wali luräwinakatsa jithiqtasmawa (Isaías 48:17; Filipenses 4:13; Hebreos 10:24, 25).