11 Yatichäwi
Diosan jan iyawsata costumbrenakampi yatichäwinakampi
¿Kuna kasta costumbrenakas yatichäwinakas jan walïki? (1)
¿Awkisa Yuqasa qullan ajayusa mayakiw sapxañapati cristianonakaxa? (2)
¿Kunatsa chiqa cristianonakax Navidadsa, Semana Santsa, uruyasiñanaksa jan amtapki? (3, 4)
¿Jiwatanakax ñanqhachapxistaspati? (5)
¿Jesusax mä cruzanti jiwäna? (6)
¿Khitirus kusisiyañasaxa? (7)
1. Janiwa taqi yatichäwinakasa costumbrenakasa jan walïkiti. Ukampisa kʼari yupaychäwinakan uñstayata jan ukax kʼari yatichäwinakarjam uñstayatanakaxa Diosatakix janiw walïkiti (Mateo 15:6).
2. Awkisa Yuqasa qullan ajayusa mayakiw sapxiwa: ¿Jehová Diosax kimsa diosäpachati, mä arunxa, Trinidadäpachati? Janiwa. Jehová Dios Awkisaxa, ‘chiqpach sapa Diosawa’ (Juan 17:3; Marcos 12:29). Jesusax Diosan jilïr Yuqapawa, Diosar jaysiriwa (1 Corintios 11:3). Awkixa Yuqat sipansa jilïriwa (Juan 14:28). Qullan ajayux janiw Diosjamäkiti, jan ukasti Diosan chʼamapawa (Génesis 1:2; Hechos 2:18).
3. Navidadampi Semana Santampi: Jesusax janiw diciembre phaxsit 25 urunak saraqatarux yurkänti, jan ukasti octubre phaxsi qalltaw yurïna, uka urunakansti awatirinakax anqanwa arumax uywanakapa uñjapxirïna (Lucas 2:8-12). ¿Jesusax yuriw uruja amtapxätaw sispachänati cristianonakaruxa? Janiwa. Jan ukasti jiwataj amtapxäta sataynawa (Lucas 22:19, 20). Navidadasa kunatï uka urunakan luraski ukanakasa kʼari yupaychäwinakan uñstayatawa. Semana Santasa ukhamarakiwa, ukanxa pachachanak kallnaqapxi ukat jan manqʼataw sarnaqapxi. Nayrïri cristianonakax janiw Navidadsa Semana Santsa amtapxirïkänti, chiqpach jichha cristianonakasa janirakiw ukanakxa amtapkiti.
4. Uruyasiñanaka: Jehová Diosaru jan yupaychiri pä jaqinakaw uruyasipxatayna, uka pä uruyasiñatakwa Biblian qillqataxa (Génesis 40:20-22; Marcos 6:21, 22, 24-27). Nayrïri cristianonakaxa janiw uruyasipxirïkänti. Uka costumbrexa nayra kʼari yupaychäwinakan uñstayatarakiwa. Chiqa cristianonakax yaqha urunakaw waxtʼasipxisa qamartʼasipxisa.
5. Jiwatanakar axsaraña: Jiwatanakax janiw kunsa lurapkaspati ni amuyapkarakispasa. Janiw jiwatanakaru yanapksnati, ni jupanakas ñanqhachapkarakistaspati (Salmo 146:4; Eclesiastés 9:5, 10). Almax jiwiriwa; janiw jiwatatxa jukʼampi jakxiti (Ezequiel 18:4). Ukampis ñanqha angelanakaw jiwatanakan ajayupaxa jakaskaspasa ukham amuyayistu. Jiwatanakar yupaychañasa, axsarañasa janiw walïkiti (Isaías 8:19).
6. Cruz: Jesusax janiw mä cruzan jiwkänti, jan ukasti mä lawan jiwäna. Griego aruta cruz sasa Biblianakan jaqukipapxi uka aruxa janiw krusjata pä law sañ munkiti jan ukasti mä lawak sañ muni. Cruzax nayra kʼari yupaychäwinakan uñstayatawa. Nayrïri cristianonakax janiw cruz apnaqapxirïkänti ni yupaychapxirïkänsa. Ukhamaxa, ¿Diosar yupaychañataki cruz apnaqañax walïskaspati, kamsasmasa? (Deuteronomio 7:26; 1 Corintios 10:14.)
7. Uka costumbrenaka ukat uka yatichäwinaka armañaxa wali chʼamäspawa. Inasa familiaranakamasa, munata masinakamasa ukanak amtaskakiñäni sapxchïspa. Ukampisa Diosar kusisiyañaw wali askixa jaqi masiru kusisiyañat sipansa (Proverbios 29:25; Mateo 10:36, 37).
[22 janan fotopa]
Jehová Diosaxa janiw kimsa diosäkiti
[23 janan fotopa]
Navidadaxa nayra kʼari yupaychäwinakan uñstayatawa
[23 janan fotopa]
Jiwatanakaruxa janiw axsarañasäkiti ni yupaychañasäkisa