Diosjam yaqha munasitasax janiw utjkaspati

Jumatakix wali khusapunïspawa Diosan munasitapäñaxa. Diosax yatichätamwa kunjamsa kusisisa, jan llakisisa jakasisma; kunaymani kʼari yatichäwinakatsa jan wali luräwinakatsa qhispiyarakïtamwa. Diosax mayisitanakamarusa istʼarakiniwa. Chuymamsa qhanartʼayaniwa ukatxa janirakiw kunsa axsarxätati (Salmo 71:5; 73:28). Llakinkkäta ukhasa Diosax yanaptʼätamwa (Salmo 18:18). Ukampisa, Diosax wiñay jakañwa churiristamxa (Romanos 6:23).

Kunapachatix Diosaru jakʼachastan ukhaxa, munasitanakaparux jakʼachasiraktanwa. Diosan munasitanakapaxa munat masinakamarakïniwa. Jumatakix jilatanakamjam kullakanakamjamäniwa. Kusisitaw Diosat yatichapxätam, yanaptʼapxätam, walik yatiqasktaxa sapxarakïtamwa.

Janiw Diosjamäktanti. Diosan munasitapäñatakixa wakisiwa ak yatiñasa: Diosan munasitapäñaxa janiw sañ munkiti munat masisarjam uñjaña. Jiwasanakat sipansa jupax walja maranakaniwa, ukhamaraki jukʼampi yatiñani ukat wali chʼamaniraki. Jupa sapakiw Apnaqirisaxa. Ukatpï, jupan munasitapäñatakixa juparux istʼañasapuniwa, mayitanakapsa lurañasarakiwa. Diosaru istʼañaxa askisatakipunïniwa (Isaías 48:18).