¡Kusipachax jakʼankxiwa!

Aka Uraqina jan wali luräwinakaxa uñachayistuwa kusipachax jakʼankxatapa. Janira Kusipach purinkipanxa, wali chʼama tukuñ urunakaw utjani sasaw Bibliax nayrapachax säna. Jichhaw uka urunakan jakasktanxa. Bibliaxa akanakaw phuqhasiñap siwa:

Jachʼa nuwasïwinaka. “Mä jachʼa markax yaqha jachʼa marka contraw nuwasini, mä markasti yaqha marka contrarakiw sartani” (Mateo 24:7). Aka profeciax phuqhasxiwa. 1914 uka marat aksaruxa, pä jachʼa nuwasïwinakampi ukat walja jiskʼa nuwasïwinakampiw utjawayi. Millón millón jaqinakawa uka nuwasïwinakan jiwarapxi.

Uraqpachankir usunaka. “Usunaka[x] taqi chiqana” utjani (Lucas 21:11). ¿Aka arunakax phuqhasxiti? Jïsa. Cáncer, chuyma usunaka, tisik usu, chujchu usu, sida, ukat yaqha usunakampixa millón millón jaqinakaw jiwarapxi.

Machʼanaka. Taqi chiqanwa jaqinakax manqʼat pistʼata uñjasipxi. Sapa marawa, millón millón jaqinakax manqʼatjam jiwarapxi. Aka yaqha unañchaxa Kusipachax wali jakʼankxatapwa uñachayistu. Bibliax siwa: ‘Machʼanakaw’ utjani sasa (Marcos 13:8).

Uraqi khatatinaka. “Uraqi khatatinakas walja chiqanakana” utjani (Mateo 24:7). Ukasti jichhürunakanxa phuqhasxarakiwa. 1914 uka marat aksaruxa Uraqi khatatinakanxa millón jilaw jaqinakax jiwarapxi.

Ñanqha jaqinaka. ‘Qullqi chuymanaka’, ‘jupanak jaqïñaki munir jaqinakaw utjani’. ‘Kusisiñanaka Diosat sipana jukʼamp munirinaka’. Wawanakaxa ‘awkir taykar jan jaysirinaka’ (2 Timoteo 3:1-5, MT). ¿Ukham jaqinakax jichhürunakan waljanixaya? Janiw Diosarux yäqapkiti, Diosat yatiqañ munirinakarusa janiw waltʼayapkiti.

Ñanqha luräwinaka. ‘Ñanqha luräwisti mirantaniwa’ (Mateo 24:12, MT). Amuypachätawa aka qhipa maranakanxa ñanqha luräwinakaxa walpuni jilxatawayi. Lunthatakiwa kawkhans utjaski janiw ukhamaki sarnaqañjamäxiti, kʼarimpi sallqjirinakasa ukat nuwasirinakasa taqi chiqanwa utji.

Diosan Reinopax jakʼankxatapwa taqi akanakax uñachayistu. Bibliax siwa: “Akanak pasir uñjapkäta ukkhaxa, yatipxam Diosan reinopax jakʼankatapa” (Lucas 21:31). Ukampisa, ¿kunas Diosan Reinopaxa? Aka Uraq kusipachaptayiri Diosan alaxpachankir Apnaqäwipawa. Jaqinakan taqi apnaqäwinakap lantiwa uttʼayatäni (Daniel 2:44).