Jumax Diosar uñt’añamawa

KUNAPACHATÏ iwxt’ayasiñ munktan ukhaxa, ¿janit khititï atinisiñjamäki ukamp yanapt’ayasir sarksna? Ukampis uka iwxt’irirux atinisipunstan ukhaxa, chiqpachansa janis jichhpach uka iwxt’anakax yanapt’kchistanixa taqi chuymaw uk phuqañ munañäni. Biblian iwxt’anakapat askinak apsuñatakixa, Luririparuw uñt’añasa. Chiqpachansa, mä “munata” amigopjamaw jupamp uñt’ayassna (Isaías 41:8).

² Khitimpis amigoñ munstan ukhaxa, nayraqatxa sutip yatiñ muntanxa. Ukhamax ¿Biblian parlki uka Diosax sutinïpachati? Jïsa, Jupa pachpaw akham sas qhanañchäna: “Nayatwa [Jehová, NM] Tatitux, ukarakiw sutixaxa, janirakiw munkäti kunatix nayar churañäki ukxa yaqhar churayañxa, janirakiw idolonakarus yupaychaykäti naya lantxa” sasa (Isaías 42:8). Jupan sutipaxa Jehová satawa, ukat hebreo arunxa akham qillqanakampiw qillqt’asiraki: יהוה ukat kupi tuqit qalltasinxa ch’iqa tuqiruw liyt’aña. Biblian Hebreo Arut Qullan Qillqatanakapanxa niya paqallqu waranq kutiw uñstaraki. Ukat Diosan sutipaxa “Jupaw taqi kunsa utjayi” sañ muni, mä arunxa amtanakap phuqañatakix kunaxay wakischini ukaruw Jehová Diosax tukuspa jan ukax luratanakapampiw amtap phuqayarakispa. Ukampis hebreo arunxa uka sutix luraskakiña sañ munaraki. ¿Ukax kamsañs muni? Jehová Diosax amtanakap phuqaskakiwa sañwa muni. Ukhamax Jupax mä jakkir Diosawa, janiw aliq jan uñt’at ch’amakïkiti.

³ Jehová Dios pachpaw Luririru tukuwayi (Génesis 1:1). Ukat “Jupaw alaxpacha, akapacha, jach’a qutsa lurir Diosaxa, ukhamarak taqi ukanakan utjirinaksa” (Hechos 14:15). Jehová Diosaw taqi kun luratayna, Adán ukat Eva uka nayrïr chach warmirusa. Ukhamaxa, jupaw ‘jakañ’ churir Diosaxa (Salmo 36:9). Ukat Juparakiw taqi kunatï utjki ukarux uñjaskaraki. Ukhamatwa taqpach jaqinakarux ‘yatiyäna jupan jakatapa, jaqinakar aski luratap tuqi. Jupaxay jallsa, suma cosechanaksa churchistuxa, ukhamarak walja manq’añanaksa jiwasanakan kusisiñasataki’ (Hechos 14:17). África ukat Asia uksa markanakanxa nayra awkinakaparuw yupaychapxi, jupanakas jakañ churkaspa ukhama. Ukampis ¿khititï lurkistu, jakañs utjayaskaki, ukat nayrïr chach warmirus wawanïpxañapataki lurawaykäna jupampix janit wali manüksnas ukham jikxatasktanxa? Uka tuqittï lup’iñänixa akham sasaw sarakiñäni: “Tata, nanakan Diosaxa, jumax askïtawa jach’añchäwi, gloria, ukhamarak munañanïña katuqañatakixa. Jumaw taqi kuns ina ch’usat lurtaxa, munañamatarakwa taqi kunas jakaskaraki, juman uskutarakiwa” sasa (Apocalipsis 4:11).

⁴ Biblian qillqatanakapanwa Luriri Jehová Diosarux uñt’sna, ukat kunjam Diosasa uksa yatiqaraksnawa. Ukanxa “Diosax munasiñawa” sasaw qhanañchi (1 Juan 4:16; Éxodo 34:6, 7). Jumatï Génesis librot Apocalipsis librokam liyt’ätaxa, Diosan wali munasiritapwa qillqatanakapanx yatiqäta. Ukhamax sapüru Diosan arupa liyt’añamatakiw achikt’apxsma, ukhamatwa Luririrux uñt’arakïta. Ukat khitinakatï Biblia wali sum uñt’apxi ukanakamp yanapt’ayasis yatiqañamarakiwa (Hechos 8:26-35). Ukham Biblia liyisaxa, Jehová Diosax chiqapa Diosätapsa ukat ñanqha lurañanak jan wiñayatak ukhamak uñch’ukirïtapsa amuyarakïtawa (Deuteronomio 32:4). Jaqinakatakixa chiqapampi ukat munasiñamp uñjañaxa wali ch’amawa, ukampis Jehová Diosax wali yatiñanïtapatxa, chiqapampi ukat munasiñampi uñjañatakixa janiw pantjaskiti (Romanos 11:33; 16:27). Niyakixay Jupax taqi ch’aman Diosächixa, ukhamax taqi amtanakap phuqañatakix ch’amaniwa (Génesis 17:1). Ukat Biblian jikxatkäta uka iwxt’anakarjam sarnaqätaxa, jiwaspachpataki wali askïtapwa amuyt’ata, ukat Luririsarus juk’ampirakiw munasirakïta.

⁵ Ukampisa, oración taypirakiw Diosarux jak’achassna. Jehová Diosaxa “mayisitanakar ist’irïtawa” siw Bibliaxa (Salmo 65:2). Ukat Jupax “ch’amaniwa kuntix mayktan, lup’karaktan ukanakata juk’ampi lurañataki, ch’amap tuqi jiwasanak taypina luratapata” sarakiwa (Efesios 3:20). Amuyt’añataki, mä “munata” amigomatï yanapt’ayasiñatakik juman ukar jutaspa ukhaxa, inas jupat jan wal amuychisma. Chiqpachansa, ukhamarakiw jumax oración tayp mayisiñ munpachätaxa, ukampis janiw kuntï munktan ukanakak Diosar mayisiñasäkiti, jan ukasti yuspärañataki ukat jach’añchañatakirakiw mayisiñasa (Filipenses 4:6, 7; 1 Tesalonicenses 5:17, 18).