¿Bibliat jukʼampi yatiqañ munasmati?
¿Kunatsa Bibliax liyiña?
BIBLIAX Diosan munasir kamachinakapaniwa, ukatwa yaqha libronakatxa mayjaxa (1 Tesalonicenses 2:13). Yatichäwiparjam sarnaqätaxa jumatakix askïniwa. Diosaru munasiñamax jilxataniwa, “taqi kunatix askïki ukhamarak chiqäki” uka Churiri Diosarux jukʼampirakiw jakʼachasïta (Santiago 1:17). Jupar mayisiñwa yatiqäta, jan waltʼañanakankkäta ukhaxa Diosax yanapätamwa. Ukatxa, Biblian kamachinakaparjam sarnaqätaxa, Diosax wiñay wiñay jakañwa churätma (Romanos 6:23).
Bibliax qhanañchiri chiqanakaniwa. Bibliat yatiqirinakaxa, walja jaqinakaru apnaqir kʼari amuyunakat qhispiyatäpxiwa. Sañäni: jiwatanakat chiqa yatiñaxa, jiwatanakaru axsarañatsa qhispiyistuwa, ukhamaraki jiwir familiarasasa, uñtʼat masinakasasa tʼaqhisisipkpachaw sañatsa qhispiyarakistuwa (Eclesiastés 9:5, 10). Jaktaniñxata Biblian yatichäwipaxa, jiwirin familiaranakaparusa chuymachtʼiwa (Juan 11:25). Ñanqha angelanakat chiqa yatiñaxa qhanañchistuwa, layqasirinakaru sarañaxa jan walïtapa, amuytʼayarakistuwa kunatsa akapachanxa jan waltʼañanakax utji.
Bibliankiri Diosan yatichäwinakapaxa, sum jakañwa yatichistu. Sañäni, ‘suma jakañan jakasaxa’, janchinsa kʼumaräsnawa (1 Timoteo 3:2). “Ukatpï taqi kunatix qʼañuchkistaspa ukatxa jithiqtañasaxa, ukatsti qʼuma sarnaqañasawa janchisansa ukhamaraki ajayusansa” kʼumara jakasiñasataki (2 Corintios 7:1). Bibliankiri Diosan iwxanakaparjama sarnaqañaxa, jaqichasit jakäwiruxa kusisiyiwa ukat maynikikpa munasiñarus yanaparakiwa (1 Corintios 6:18).
Diosan Aruparjam sarnaqasaxa, jukʼampiw kusisïta. Bibliat yatiñaxa chuymsa qhanartʼayiriwa, suytʼäwimpi kusisiñampi chuririwa. Ukhamaraki, jukʼampi khuyapayasiri, munasiri, kusisita, sumankiri, suma jaqi, iyawsäwini ukat yaqha munkañ kankañanakani suma chachäñasataki, warmïñasataki, awkïñasataki, taykäñasataki, wawäñasatakiw yanapistu (Gálatas 5:22, 23; Efesios 4:24, 32).
¿Kunjamänis jutïr urunakaxa uk jisktʼasirïtati? Diosan arunakapaxa jutïr urunakatakix yatiyistuwa kawkhanktansa pacha saräwinxa. Janiw jichha urunakatakik parlkiti, jan ukasti yatiyarakistuwa kunjamsa Diosax Uraqxa niya kusipachaptayani (Apocalipsis [Revelación] 21:3, 4).
Bibliat yatiqañataki yanapäwi
Jumax inas Biblia liytʼirïsta, ukampis yatiqañax wali chʼamirïchi. Inas jisktʼanakamaru Biblian jaysanakapa jikxatañxa jan yatkstati. Jan llakisimti, janiw jumakïktati. Diosan Arupa yatiqañatakixa taqiniw yanaptʼir muntanxa. Jehová Diosan Qhanañchirinakapax millón millón jaqinakaruw 235 markanakana Bibliat inaki yatichtʼasipki. Jupanakaxa kusisitaw yanaptʼapxätamxa.
Biblian qallta yatichäwinakapa jukʼat jukʼat nayraqat yatiqañaxa wali askiwa (Hebreos 6:1). Jukʼampi yatiqaskakïtaxa, “waña manqʼax” mä arunxa chʼama yatichäwinak yatiqañaxa jasakïxaniwa (Hebreos 5:14). Aka yatichäwinakax Bibliatawa, ukampisa Bibliat apstʼata yaqha qillqatanakawa aka chʼama yatichäwinaka yatiqañ yanapätam, akïr folletjama ¿Kunsa Diosax jiwasanakaru mayistu?
¿Bibliat yatiqañataki sapa semana tiempo apstʼasismati?
Bibliat yatichayasiñatakixa, kuna horänisa ukat kawkhankanisa ukax sapa maynitawa. Walja jaqinakaw utapan yatiqapxi. Telefonotsa yatichayasipxarakiwa. Yatichäwinakax sapaqatatakiwa, —janiw jachʼa tamanakatakïkiti— khitis yatiqaskakispawa kuna luräwinïpasa qhawqha yatiñanïpasa. Yantʼañataki jisktʼanakax janiw utjkiti, ukat janirakiw jiskʼachatäkätati. Bibliat jisktʼanakamaruxa jaysasiniwa ukata Diosaru jakʼachasiñ yatiqarakïta.
Bibliat yatichayasiñatakixa janiw qullqix churañäkiti (Mateo 10:8). Inakiw yatichasi yaqha yupaychäwinakankiripasa jan ukax janisa, Diosan Arupa chiqpachapuni yatiqañ munirinakatakiwa.
¿Khitinakasa jumamp chika yatiqapxaspa? Familiamaruwa ukat munat masinakamaruwa jawsasma, jan ukax juma sapakisa.
Waljaninakaw Bibliat yatiqañatakixa sapa semanan mä hora apstʼasipxi. Ukampisa, tiemponïkasina jukʼampi yatiqañ munstaxa jan ukax jukʼa tiemponïkstasa, Jehová Diosan Qhanañchirinakapax yanaptʼapxapunïtamwa.
Jawsatätawa yatichayasiñataki
Jehová Diosan Qhanañchirinakapampiw parlasma. Aka aynachankiri mä markaruwa qillqasma. Bibliata inaki yatichayasiñamatakixa jupanakaw utamaru mä yatichiri khitanipxani.
□ Aka folleto apayanipxita ¿Kunsa Diosax jiwasanakaru mayistu?
□ Utana Bibliata inak yatichayasiñatakiw yatxatañ muntha.
Jiskʼa tʼaqanakaxa Qullan Arunaka Bibliat apstʼatawa, jan ukhamäkanixa qhanañchasiniwa.