¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj taqenin yateqkañwa Bibliat yatichapjje. Bibliat yateqañajj akham yanaptʼiristam:
Kusisit jakasiñataki.
Diosan amigopäñataki.
Jutïritak Biblian utjir promesanak yateqañataki.
Aka cheqanjja, aka jisktʼanakaw qhanañchasiskani:
Bibliat yateqañ qalltasajja, ¿Testigor tukuñajapunit wakisini?
Nayrajj mä Testigompis Bibliat yateqaskchiyätjja, ¿wasitat yateqeristti?
¿Kunjamsa Bibliat yatichapjjta?
Mä yatichiriw Bibliat yateqañamatak yanaptʼätam, sapa yatichäwirjamaw yaticharakïtam. ¡Wiñayatakiw kusisit jakasisma! sat qellqatampiw kunsa Bibliajj yatichi, kunjamsa uk yatiñajj yanaptʼiristam uk yateqäta. Jukʼamp yatiñatakejja, aka video uñtasma.
¿Qollqe pagañajj wakisiti?
Janiwa. Jehová Diosan Testigonakapajj Jesusan mayitaparjamaw lurapjjta, “gratisakiw katoqapjjtajja, gratisakirak churapjjam” sasaw jupajj discipulonakapar säna (Mateo 10:8). Kunanakatï Bibliat yateqañatak churaski ukanakat pagañamajj janiw wakiskarakiti, gratisakiw mä Bibliampi ¡Wiñayatakiw kusisit jakasisma! sat mä qellqatampi katoqäta.
¿Qhawqha tiempos Bibliat yatichasi?
Qalltat tukuykamajj 60 yatichäwinakaw yateqasiñapa. Uka yatichäwinakat qhawqsa yateqäta ukajj jumatäjjewa, yaqhepanakajj semanan mä yatichäwi yateqañ amtapjje, yaqhepanakasti jukʼamp yatichäwinakaraki.
¿Kunampis qalltirista?
1. Yatichayasiñatak formulario phoqantam. Datonakam phoqantkäta ukjja, mä Testigon jumampi parlañapatakikiw apnaqasini.
2. Jumar Bibliat yatichañatakejj mä Testigow jawsanïtam. Jupajj kunjamsa Bibliat yatichasi uk qhanañchtʼätam, kuna jisktʼamas utjani uks qhanañchtʼarakïtamwa.
3. Bibliat yatichirimampiw kunjamsa yatichätam uk amtjjapjjäta. Yatichirimajj kawkjanktatï ukanwa yatichiristam, jan ukajj telefonota, videollamada, correo toqew yatichiristam. Niya mä horäspawa, jayäspawa jan ukajj minusäspawa. Qhawqhay tiempomajj utjchi ukarjamaw yateqäta.
¿Bibliat yatichayasiñ yantʼiristti?
Jïsa, yantʼasmawa. Ukatakejj yatichayasiñatak formulario phoqantam. Mä yatichirejj jawsanïtam ukhajja, yateqañ muniristti janicha uk yatiñatakikiw yantʼañ munta sasaw jupar sasma. Ukatjja ¡Wiñayatakiw kusisit jakasisma! sat folletompiw qalltapjjasma, uka folletojj nayrïr kimsa yatichäwinakaniwa.
Bibliat yateqañ qalltasajja, ¿Testigor tukuñajapunit wakisini?
Janiwa. Jehová Diosan Testigonakaparojj jaqenakar Bibliat yatichañajj walsa gustkchejja, janipuniw khitirus aka religionankañapatak khitirus waytʼapkiti. Antisas kuntï Bibliajj yatichki uk respetompiw qhanañchtʼapjje, sapa mayniw kunsa creyini uk amtjjañapa sapjjarakiwa (1 Pedro 3:15).
¿Pachpa Bibliajampit yatichayasirista?
Jïsa. Kawknïr Bibliampis yateqäta ukajj jumatäjjewa. Jehová Diosan Testigonakapajj fácil amuykañäki exactökaraki uka Machaq Mundon Jakirinakataki sat Bibliampis yatichapkstjja, waljaniruw pachpa Bibliapampi yateqañajj gusti.
¿Bibliat yateqañan maynejj compañitaspati?
Jïsa. Taqpach familiamampiw yateqasma, amistadanakamas jumamp chikaw yateqapjjaspa.
Nayrajj mä Testigompis Bibliat yateqaskchiyätjja, ¿wasitat yateqeristti?
Jïsa. Inas jichhajj nayrat sipans yateqañajj jukʼamp gustchïtam. Kunas jichhajj jaqenakar yanaptʼaspa ukarjamaw yatichasi. Nayrat sipansa, jichhajj yateqerimpi yatichirimpiw purapat jukʼamp parltʼasipjje, dibujonakampi, fotonakampi, videonakampiw yatichasiraki.
¿Mayni sapaki Bibliat yateqañatakejj yanaptʼanakajj utjiti?
Jïsa, utjiwa. Mä yatichirimp yatichatajj facilakiw maynejj Bibliat yateqaspa, ukampis yaqhepanakajja sapakiw Bibliat yatjjatañ munapjje. “Bibliat yatjjatañatak yanaptʼanaka” siski uka cheqanjja, gratisakiw uka yanaptʼanakajj utji. Ukanakat yaqhepanakajj akanakawa:
Bibliat yatjjatañatak videonaka. Ukanjja Biblian mä qhawqha yatichäwinakapatwa mä jukʼa qhanañchi.
Bibliat yatiñatak jisktʼanaka. Bibliat walja jisktʼanakaruw ukan qhanañchasi.
Qhanañchtʼat versiculonaka. Wali uñtʼat mä versiculosa yaqhep arunakas kamsañsa muni ukanakaw ukan qhanañchasi.