21 jalja
Jehová Diosan amtapax wali sum phuqasini
1, 2. 1) ¿Kunsa Jehová Diosax taqi wawanakapatakix muni? 2) ¿Khitinakas mä familiaki Jehová Diosar yupaychapxäna?
ALAXPACHANS akapachansa wawanakapax mayachtʼat jupar yupaychapxaspa ukat wali sum sarnaqasipxaspa, ukwa munasiñapat Jehová Diosax amti. Ukhamwa chiqap sarnaqañ munirinakax munapxaraki.
2 Taqi kun lurañ qalltkäna ukhaw Jehová Diosax amtap phuqañ qalltäna. Nayraqatxa Yuqaparuw luratayna, jaktayatäxäna ukhatxa uka Yuqaw “Diosan jachʼa kʼajkir qhanapaxa, juparakiw kunäkitix Diosax uk uñachtʼayirixa” (Hebreos 1:1-3). Uka Yuqjamax janiw yaqhax utjkiti, Dios sapakiw juparux luratayna. Ukatsti angelanakas jaqinakas uka Yuqampi luratäpxiwa (Job 38:7; Lucas 3:38). Taqi jupanakax mä familiakïpxänwa. Taqinitakis Jehová Diosakïnwa, jupakiw taqi kunxaru Munañani Diosänxa, ukatxa munasir Awkirjama uñjapxäna.
3. 1) ¿Nayrïr awk taykasatxa kunsa taqinis katuqawaytanxa? 2) ¿Adanan wawanakapatakix kunsa Jehová Diosax luräna?
3 Kunapachatï nayrïr awk taykasax yatkasa juchachasipxäna ukhaxa, jiwapxätaw sasaw Diosax satayna, Edenat alisnuküna ukhaxa janiw wawanakaparjam uñjxänti, ukhamatwa taqinis jan mä jachʼa familiakïxapxanti (Génesis 3:22-24; Deuteronomio 32:4, 5). Niyakixay taqinis jupanakan wawapästanxa, ukatpï taqinis juch lurirïtanxa. Ukampis Adanampin Evampin yaqhip wawanakapax chiqap sarnaqañ muniripxasapänwa, uk Diosax yatïna, ukatwa “wawanakapan qhispiyat jaka[sipxañapatakixa]” kunatï munaskäna ukxa wakichäna (Romanos 8:20, 21).
Israelax janiw Diosan markapäxänti
4. ¿Kuna asksa israelitanakax Jehová Diosat katuqapxäna?
4 Adanax luratakäna ukhatxa mä 2.500 maranakäxänwa, ukhaw Jehová Diosax mä qhawqhanir ajllitayna, jupampi sum apasipxañapataki, uka jaqinakatakix wali askipunïnwa ukaxa. Israel markaruw ajllitayna, Leyinakapsa churatayna (Génesis 12:1, 2). Markapjam uttʼayasax amtap phuqañatakiw jupanakarux apnaqäna (Deuteronomio 14:1, 2; Isaías 43:1). Ukampis israelitanakax jiwañansa juchansa katuntatäsipkakïnwa, ukhamax janiw nayrïr awk taykasjam jakasxapxänti.
5. ¿Israelitanakax kunjamsa Diosamp sum apasitanakapxa aptʼawayapxi?
5 Ukhamäkipansa, israelitanakax wali sumwa Jehová Diosampix apasipxäna, ukhamax Awkiparjamaw Diosarux uñjapxañapäna, ukatxa Jupan amtaparjamaw sarnaqapxañapäna. Kunatsa Diosan amtaparjam sarnaqañax wakisixa uksa Jesusax qhanañcharakïnwa (Mateo 5:43-48). Ukampis jupanakax janiw phuqapkänti. Judionakax akham sapxänwa: “mä sapa Awkinikïpxtwa, ukasti Diosawa” sasa, ukampis luratanakapampisa amuyunakapampisa kʼarisitanakapwa uñachtʼayapxi sasaw Jesusax säna (Juan 8:41, 44, 47). 33 j.p. maranwa Jehová Diosatakix uka Leyinakax tukusxäna, ukat israelitanakampi sum apasiñasa tukusxarakïnwa. ¿Ukhamax janit khitis Diosampix sum apasxaspa?
‘Alaxpachar saririnakaruw’ mayachthapisi
6. ¿Efesios 1:9, 10 qillqatankki uka ‘amtäwix’ kunatakisa?
6 Yaqhip chachanakas warminakas wali sum Diosampix apasipxaspa sasaw apóstol Pablox satayna. Amuyañataki, iyawsäwin jaqinakax alaxpachankir familia taypinkapxañapatakiw Jehová Diosax wakichatayna, uka tuqitxa Pablox akham qillqatayna: “[Diosax] ukhamarakiw uñtʼayistu jan amuytʼkañ amtäwipxa, ukasti kuntix jupax munañaparjam amtki ukawa. Aka amtäwirjamawa phuqhasini kunapachatix uka urux purkani ukkhaxa. Diosasti mayachthapiniwa taqi kunsa, alaxpachankirinaksa aka uraqinkirinaksa, Criston munañapankañapataki” sasa (Efesios 1:9, 10). Uka amtäwxa Jesucristow phuqañapänxa. Jupïpanwa Diosax jaqinakar katuqaspa: mä qhawqhanix alaxpacharuw sarapxani, jupanakax jaktʼatakïpxiwa, ukatxa walja jaqinakasti Uraqinwa wiñayataki jakasipxani.
7. ¿Khitinakas uka “alaxpachankirinakaxa”?
7 Nayraqatxa, Pentecostés 33 j.p. maratwa “alaxpachankirinakarux”, mä arunxa, Cristompi chika Diosan Apnaqäwipan apnaqapkani ukanakaruw mayachthapisïna. Kuntï Jesusax jiwasin jikxatawayki ukaruw iyawsapxi, ukhamatwa Diosatakix chiqa chuymäpxi (Romanos 5:1, 2). Uka qhipatsti, jan judío jaqinakamppacharuw mayachthapisïna, ukhamata uka “alaxpachankirinakax” 144.000 jaqinakar puripxañapataki (Gálatas 3:26-29; Apocalipsis 14:1). Mä qhawqhanikiw jichhürunakanxa aka Uraqinkxapxi.
‘Uraqinkirinakaruw’ mayachthapisi
8. ¿Khitinakas “uraqinkirinakaxa”, ukat kunjamsa Jehová Diosampix apasipxi?
8 Uka pachparakiw “uraqinkirinakarux”, mä arunxa Uraqin wiñay jakapkani ukanakaruxa mayachthapisiski, jupanakax millón millonäpxiwa. Alaxpachar sarapkani uka cristianonakamp chikarakiw jupanakax Jehová Diosan sutip jachʼañchapxi, ukat yupaychäwipsa wali jachʼaruw aptapxi (Isaías 2:2, 3; Sofonías 3:9). Jupanakax Jehová Diosarux “Awki” sapxarakiwa, jupaw jakañ churistu sapxiwa. Jesucriston wila wartasitaparuw iyawsapxi, ukatwa Diosax jupanakar katuqaraki (Apocalipsis 7:9, 14). Niyakixay juchararäsipkchixa, ukhamax janïraw Diosax chiqpach wawanakaparjam uñjkiti.
9. ¿Kuna arunakas Romanos 8:21 qillqatan jaqinakataki utji?
9 Kunapachatï jaqinakax ‘esclavüñata’ antutatäpxani, ukwa aka Uraqin jakapkani ukanakax wal suyapxi (Romanos 8:21). Cristox yanapirinakapampi wali tʼaqhisiñ urunak Armagedonan tukuyxani ukhaw jaqinakaxa esclavüñatxa samarapxani. Ukhamax Supayan ñanqha pachapax tukjatäniwa, ukat Cristox waranq mara apnaqxani ukhaxa walja bendicionanakwa katuqañäni (Apocalipsis 19:17-21; 20:6).
10. ¿Kuna yupaychäw qʼuchsa Jehová Diosan luqtirinakapax qʼuchupxani?
10 Chiqasa, kunapachatï “uraqinkirinakampi” “alaxpachankirinakampix” mayachtʼasipxani ukhaxa wali kusiskañäniwa, alaxpachankiri yupaychirinakaxa akham sasaw kusisiñat arsupxi: “Jachʼätawa, muspharkañarakïtawa. Jumarakïtaw taqi kun luriri jachʼa Diosaxa. Sarnaqäwinakamas chiqaparakiwa, markanakan Reyipa. Tata, ¿khitiraki jan axsariristamsti? ¿Khitiraki jan yupaychiristamsti? Juma sapakïtaw qullanaxa. Taqi markanakaw jutasina jumarux yupaychapxarakïtam, chiqa aski luratanakam uñjapxatap layku” sasa (Apocalipsis 15:3, 4). Ukhamasti, Jehová Diosan taqi yupaychirinakapaw chiqpach Diosarukix mayachtʼata yupaychapxani. Jiwatanakarus jaktayasiniwa ukhamatwa jupanakasa arunakapampix Jehová Diosar yupaychapxarakini (Hechos 24:15).
Jutïrinxa wali sum jakasxañäni
11. ¿Wali tʼaqhisiñ urunak pasir jaqinakax kunjams sarnaqasipxani?
11 Wali tʼaqhisiñ urunak qhipatsa ukat Armagedón qhipatsa, Uraqinxa janiw jan wali luräwinakax utjxaniti, Supay Satanasas janiw ‘akapach diosäxaniti’. Janiw Jehová Diosan yupaychirinakaparux jan waltʼayxaniti (2 Corintios 4:4; Apocalipsis 20:1, 2). Kʼari yupaychäwinakas janiw Diosan sutipxarux jan walinakxa lurxapxaniti, janirakiw jaqinakarus yaqha yaqha sarnaqayxapxaniti. Diosan luqtirinakaparux janipuniw marka apnaqirinakax mayampsa jan wal uñjxapxaniti ni tʼaqhisiyxapxanisa. ¡Wali sumpun sarnaqasxapxañäni!
12. ¿Juchampita ukhamaraki kunarutï juchax puriykistu taqi ukanakatxa kunjamsa jaqinakarux qhispiyasini?
12 ‘Diosan Corderopaxa, akapachan juchap qʼumachirjamaxa’, jiwatapampix kunsa jikxatatayna, ukarjamaw jaqinakan juchapxa pampachani (Juan 1:29). Jesusax aka Uraqir jutkäna ukhaxa, usutanakarus suchʼunakarus qullänwa, ukhamatwa juch pampachatapxa uñachtʼayäna (Mateo 9:1-7; 15:30, 31). Ukhamaxa, Diosan alaxpach Apnaqäwipan apnaqiripjamaxa; amutunakarusa, juykhunakarusa, uqaranakarusa, suchʼunakarusa, pʼiqi usuninakarusa qullaniwa, ukatxa taqi kasta usuninakaruw qullani (Apocalipsis 21:3, 4). Taqi istʼasir jaqinakawa “juchan munañapatxa” qhispiyatäpxani, ukhamax amuyunakapasa, kuna luräwinakapasa wali askïniw jupanakatakisa Diosatakisa (Romanos 7:21-23). Waranq mar tukuyxani ukhax janiw juchanïxapxaniti, kunjamäpkänti Adanampi Evampixa ukhama, chiqpach Diosar ‘uñtasitäxapxaniwa’ (Génesis 1:26).
13. ¿Waranq mar apnaqañ tukuyxani ukhaxa kamachanis Cristoxa, ukat kunas utjani?
13 Kunapachatï Cristox jaqinakar sumaptayxani ukhaxa, kuna lurañtï Awkipat katuqkatayna ukxa Juparuw katuyxani: “Cristosti qʼal tʼunjani taqi munañaninakaru, jilïrinakaru, ukhamaraki alaxpach chʼamanakaru, ukatsti Dios Awkiparurakiwa apnaqañapataki taqi kuna katuyxani. Cristox reinañapawa Diosax taqi uñisirinakapar Cristompi atipjaykani ukkhakama” (1 Corintios 15:24, 25). Waranq Mara Apnaqäwix Diosan taqi amtanakapwa phuqani, ukhamax janiw Diosampi jaqinakampi sum apasipxañapatakix yaqha apnaqäwix munasxaniti. Janiw juchas jiwañas utxaniti, jaqinakax qhispiyatäxapxaniwa, ukhamax kuntï Jesusax qhispiyirjam lurkäna ukas janiw munasxaniti. Bibliax akham siwa: “Cristox Diosan Yuqapäkasinxa, Dios Awkirurakiw katuyasxani, Diosax juparu taqi kuna katuyatap layku. Ukhamatwa Diosax taqi kunxarus munañanïni” sasa (1 Corintios 15:28).
14. ¿Jan juchani jaqinakax kuna yantʼansa uñjasipxani, ukat kunatsa?
14 Ukatsti, chiqpach Diosarukiti taqi chuym wiñayataki luqtañ munapxi janicha, uk uñachtʼayapxañapatakiw jan juchan jaqinakarux tiempox churasini. Ukhamawa, Jehová Diosax janïra chiqpach wawanakapjam jaqinakar katuqkasaxa, qhip qhipwa yantʼani. Supayampiru saxranakapampiruw antutasini. Uka yantʼäwinxa Diosar taqi chuym munasirinakax janiw jan askichañjam kuna jan walinsa uñjasipkaniti. Ukampis Diosat jithiqtirinakasa, jan waliru wiytatäsina Diosar jan istʼirinakasa, Supayamp chika saxranakapamp chika jan mayampitaki tukjatäpxaniwa (Apocalipsis 20:7-10).
15. ¿Kunjamsa jakasxapxani Jehová Diosan taqi wawanakapaxa?
15 Uka yantʼäwinxa, Jachʼakankañap tuqita saytʼasir jan juchani jaqinakaruw Jehová Diosax wawanakapjam uñtʼasxani. Ukat uksaruxa, Diosan wawanakapjamaxa wali sumwa jakasxapxani, Diosan alaxpachankir familiapampix mayakïxapxaniwa. Ukhamax mayampwa, angelanakasa jaqinakasa chiqpach Diosarux mayachtʼata yupaychxapxani, ukhamax Jehová Diosan amtapax wali sumwa phuqasini. Uka familiax wiñay wiñayaw utjani, janiw tukuskaniti, ¿jumax uka taypinkañ muntati? Ukhamächi ukaxa, kuntï Bibliax 1 Juan 2:17 jiskʼa tʼaqan siski uka arunakxa taqi chuymaw katuqasïta, ukanxa akham siwa: “Akapachax tukusi[s]kiwa jan wali luräwinakapamppacha, ukampis kawkïritix Diosan munañap lurki ukax wiñayatakiw jaki” sasa.
Amtañataki
• Janïra Edenan Diosar kutkatasipkäna ukhaxa, ¿kunjamsa Jehová Diosampixa taqi yupaychirinakapax apasipxäna?
• ¿Kun lurapxañapas Diosan taqi luqtirinakapaxa?
• ¿Khitinakarus jutïrinxa Diosax wawanakapjam uñtʼasxani ukat kuna amtap phuqañatakisa?
[190 janan fotopa]
Istʼasir jaqinakax paraisoptayat Uraqinwa kusisit jakasipxani